ඉන්දීය ක්‍රීඩාලෝලීන්ගේ ද ඔල්වරසන් මැදින් රන් දිනූ කෙටිදුර වීරයා

741
Shehan Ambepitiya

ශ්‍රියන්ත දිසානායක, සුගත් තිලකරත්න සහ රොහාන් ප්‍රදීප් කුමාර වැනි මෙරට කෙටිදුර ධාවනය කලඑලි කළ දැවැන්තයන්ගේ සමුගැනීමෙන් පසු අගාධයට යමින් තිබූ කෙටිදුර ධාවනයට නව ජීවයක් එක් කරමින් ජාත්‍යන්තර කෙටිදුර ධාවනයේ දස්කම් දැක්වීමට සමත් වූ ඔහු නමින් ශෙහාන් අඹේපිටිය යි.

1990 ජනවාරි මස 17 ක්‍රිකට් ක්‍රීඩාවට මහත් ළැදියාවක් දැක්වූ පවුලක උපත ලද ශෙහාන් සිය මූලික අධ්‍යාපනය අරඹන්නේ රාජගිරිය ජනාධිපති විද්‍යාලයෙනි. ක්‍රීඩාවට ළැදියාවක් දැක්වූ පවුල් පසුබිමක හැදී වැඩුනත්, ශෙහාන් වයස අවුරුදු 12ක් පමණ වන තුරුව ක්‍රීඩාවට මහත් මැළිකමක් දැක්වූ නිසාවෙන් ක්‍රීඩාවට යොමු නොවී අධ්‍යාපනයට මූලිකත්වය දීමට තීරණය කර තිබුණි.

සිය ක්‍රීඩා දිවියේ ආරම්භය පිළිබඳව The Last Lap වැඩසටහනේ දී ශෙහාන් අදහස් දැක්වුවේ මෙලෙසිනි,

“ඇත්තම කියන්න ඕන මම හරි කම්මැළි ක්‍රීඩකයෙක්, අපේ අම්මා මාව තල්ලු කරන්නේ නැත්නම් මම ගෙදරමයි ඉන්නේ. ඉස්කෝලේ දී ගත්තත් ඒමයි, මම පොත පතම තමයි, වෙන කිසිම දේකට කිසිම අවධානයක් නෑ පොතේම ඉන්න ක්ලාස් එකේ පැත්තකට වෙලා.

මගේ ඉස්සෙල්ලම පාසල වෙන්නේ කෝට්ටේ ජනාධිපති විද්‍යාලය, අපි ගත්තොතින් ෆැමිලි එකේ හැමෝම ක්‍රිකට් සෙල්ලම් කරලා තිබ්බේ. හැමෝම හිතුවේ මමත් ක්‍රිකට් සෙල්ලම් කරයි කියලා, ඒත් මම හැදුවේ ඉගෙන ගන්න එක විතරක් කරන්නයි. ඉස්කෝලේ නිවාසාන්තර ක්‍රීඩා උළෙල දවස්වල අපේ ඉස්කෝලේ ශිෂ්‍ය නායකයෝ අපේ පන්තියට ඇවිල්ලා අපි හැමෝමවම ග්‍රවුන්ඩ් එකට ඇදගෙන ගියා.

මමත් ඉතින් කම්මැළිකමේ ගියා ගිහින් සිලෙක්ෂන් ට්‍රයල් එක දින්නා, ඊට පස්සේ ස්පෝර්ට් මීට් එකට තේරුණා ඒකත් දින්නා, පස්සේ මම හිතුවා මම තමයි නේ හයියෙන්ම දුවන ළමයා කියලා මගේ වයසේ, පස්සේ සර්කිට් මීට් එකට දිව්වා ඒකත් දින්නා ඊට පස්සේ පළාත් තරගවලට ගියා ඒකේ මම තුන්වැනියා වුනා, එතකොටයි මම හිතුවේ මට වඩා දුවන අය ඉන්නවනේ මාත් මේකේ දෙයක් කරන්න ඕන කියලා”  

සිය දක්ෂතා පිළිබඳව අවබෝධ කරගැනීමෙන් අනතුරුව නලින් විතාරණ මහතාගේ මගපෙන්වීම යටතේ සිය ක්‍රීඩා හැකියාවන් ඉතා ඉක්මනින් දියුණු කර ගත් ශෙහාන් පාසල් මලල ක්‍රීඩා පිටිය සිය ආධිපත්‍යට යටත් කර ගැනීමට සමත් වන අතර ඔහු වයස අවුරුදු 16 වන විට සමස්ත ලංකා පාසල් මලල ක්‍රීඩා තරගාවලියේ මීටර් 100 ඉසව්ව නව තරග වාර්තාවක් ද සමඟින් නිමා කිරීමට සමත්ව තිබුණි.

එලෙස පාසල් මලල ක්‍රීඩා පිටියේ ඉහළ දස්කම් දක්වන මොහු පිළිබඳව මෙරට මලල ක්‍රීඩාවට විශිෂ්ට ක්‍රීඩක ක්‍රීඩිකාවන් රැසක් දායාද කළ ප්‍රවීණ මලල ක්‍රීඩා පුහුණුකරුවෙකු වන සුනිල් ගුණරත්න මහතාගේ නෙත ගැටෙන්නේ ශෙහාන්ගේ වාසනාවට මෙනි.

දුටු සැණින් මෙම ක්‍රීඩකයාගේ සහජ දක්ෂතාවය පිළිබඳව අවබෝධ කර ගත් සුනිල් ගුණරත්න මහතා ඔහුට තමන් සමඟින් පුහුණුවීම් කටයුතු සිදු කිරීමට ආරාධනා කරන අතර එම ආරාධනාව පිළිගත් ශෙහාන් හට කොළඹ ගේට්වේ විද්‍යාලයට ඇතුළත් වීමට ද වරම් හිමි විය.

සිය ක්‍රීඩා දිවියේ දෙවන ගමන එලෙස ආරම්භ කරන ශෙහාන් ඉන් පසුව සුනිල් ගුණවර්ධන මහතාගේ අධීක්ෂණය යටතේ පුහුණුවීම් කටයුතු ආරම්භ කරමින් දමයන්ති දර්ශා වැනි මෙරට බිහි වූ ශ්‍රේෂ්ඨතම ක්‍රීඩක ක්‍රීඩිකාවන් සමඟින් පුහුණුවීම් කටයුතු සිදු කිරීමින් එම ක්‍රීඩිකාවන්ගේ මග පෙන්වීම ද යටතේ ඉතා ඉක්මනින් සිය දස්කම් දියුණු කරගැනීමට සමත් විය.

Shehan Ambepitiya
ශෙහාන් අඹේපිටිය (දකුණේ) සිය පුහුණුකරු සුනිල් ගුණවර්ධන (වමේ) මහතා සමඟ

එම දස්කම් නිසාවෙන් 2007 ලෝක යොවුන් මලල ක්‍රීඩා උළෙලට සහභාගි වීමට වරම් ලද ශෙහාන් එහි දී ජයග්‍රහණයක් ලබා ගැනීමට අසමත් වූවත් ලොව 21 වැනි වේගවත්ම යොවුන් මලල ක්‍රීඩකයා වීමට සමත් වන අතර වයස අවුරුදු 18ක් වන විට මෙරට මීටර් 100 ජාතික කිරුළ ලබා ගැනීමට ද ඔහු සමත් විය.

එම ජයග්‍රහණයෙන් පසුව 2008 වසරේ දකුණු ආසියාවේ වේගවත්ම කනිෂ්ඨ ක්‍රීඩකයා බවට පත්වීමට සමත් වූ ශෙහාන් ආසියානු කනිෂ්ඨ ක්‍රීඩා උළෙලේ මීටර් 100 දෙවැන්නා ලෙස අවසන් කරමින් ආසියාවේ දෙවැනි වේගවත්ම ක්‍රීඩකයා බවට පත්වීමට සමත් වූ අතර එම වසරේම ලෝක කනිෂ්ඨ මලල ක්‍රීඩා උළෙල සඳහා සහභාගි වෙමින් ලොව 7 වැනි වේගවත්ම කනිෂ්ඨ ක්‍රීඩකයා බවට පත්වීමට ශෙහාන්ට හැකි විය.

ජාත්‍යන්තර කෙටිදුර ධාවන පිටියේ නොකඩවා දැක්වූ දස්කම් නිසාවෙන් 2008 පොදුරාජ්‍ය මණ්ඩලීය යොවුන් මලල ක්‍රීඩා උළෙල සඳහා සහභාගි වූ ශෙහාන් එහි දී සුපිරි දස්කම් දක්වමින් මීටර් 100 (තත් 10.43) සහ 200 (තත් 21.27) ඉසව් නව තරගාවලි වාර්තා සමඟින් ජය ගැනීමට සහ මීටර් 100 සහය දිවීමේ ඉසව්වේ ද ඉහළ දස්කම් පෙන්නුම් කරමින් සිය කණ්ඩායම රන් පදක්කමක් කරා ගෙන යාමට සමත්වන්නේ කලකට පසුව මෙරට පිරිමි කෙටිදුර ධාවනයට ලද විශාලතම ජයග්‍රහණයක කොටස්කරුවෙකු වෙමිනි..

Shehan Ambepitiya
ශෙහාන් අඹේපිටිය (දකුණේ සිට පළමුව) 2008 පොදුරාජ්‍ය මණ්ඩලීය යොවුන් ක්‍රීඩා උළෙල අතරතුර දී

සිය ක්‍රීඩා දිවියේ ලද විශාලතම ජයග්‍රහණය පිළිබඳව ශෙහාන් අදහස් දැක්වුවේ මෙලෙසිනි,

“රටවල් 72ක ක්‍රීඩකයන් සහභාගි වුනා ඒ තරගාවලියට, ඒකෙන් මීටර් 100 අවසන් වටයට මුළු ආසියාවෙන්ම තේරුණේ මම විතරයි. ඉතින් එදා ඉන්දියාවේ 30,000ක විතර ප්‍රේක්ෂකයන් පිරිසක් ඇවිත් හිටියා එයාලා ඔක්කොම චියර් කළෙත් මට.

ඇත්තටම ඒක ජීවිතේ අමතක නොවෙන අවස්ථාවක්, මොකද මම එතනට යන්නේ ලෝකේ 7 වැනි වේගවත්ම ක්‍රීඩකයා වෙලා. ඒ නිසා මට ලොකු අවස්ථාවක් තිබුණා එකේ රන් පදක්කම දිනා ගන්න, ඉතින් මගේ වයස අවුරුදු 18ක් වෙද්දී පොදුරාජ්‍ය මණ්ඩලීය ක්‍රීඩා උළෙලේ මීටර් 100, 200 සහ 100 සහය දිවීමේ රන් පදක්කම් තුනම දිනා ගන්න සමත් වෙනවා. අදටත් මීටර් 100 තරග වාර්තාව කැඩිලා නෑ, මට අදටත් ලොකු ආඩම්බරයක් තියෙනවා ඒ ලබා ගත් ජයග්‍රහණය ගැන”

කනිෂ්ඨ පිටියේ දැක්වූ ඉහළ දස්කම්වලින් අනතුරුව 2009 ලෝක ශූරතා මලල ක්‍රීඩා උළෙලට ද සහභාගි වීමට වරම් ලද ඔහු එහි දී ලෝක ශූර ක්‍රීඩකයන් රැසක් සමඟ ගැටෙමින් තරග වැදීමට සමත් වන අතර 2010 වසරේ පැවති දකුණු ආසියානු ක්‍රීඩා උළෙලේ දී මීටර් 100 ඉසව්ව ජය ගනිමින් දකුණු ආසියානු ශූරයා බවට පත්වීමට ද සමත් විය.

දකුණු ආසියාවේ ලද ජයත් සමඟින් 2010 වසරේ පොදුරාජ්‍ය මණ්ඩලීය ක්‍රීඩා උළෙල සඳහා සහභාගි වූ ශෙහාන් මීටර් 100 ඉසව්වේ මුල්ම වරට අවසන් පූර්ව වටයට පැමිණි ක්‍රීඩකයා බවට පත්වීමට සමත් වන අතර එම අවසන් පූර්ව වටයේ දී තත්පර 10.31ක කාලයකින් ඉසව්ව නිමා කරමින් සිය පෞද්ගලික හොඳම කාලය වාර්තා කිරීමට ද ඔහු සමත් විය.

මෙම දස්කම් සමඟින් කලකට පසු කෙටිදුර ධාවනයෙන් ඔලිම්පික් බලාපොරොත්තුවක් මෙරටට ගෙන ඒමට ශෙහාන්ට හැකි වන අතර එයට අමතර සහයක් ලෙස ලෝක මලල ක්‍රීඩා සංගමයේ මැදිහත් වීම මත ජැමෙයිකාවේ පුහුණුවකට යාමට ද ශෙහාන්ට වරම් හිමි විය.

එලෙස ලෝක ශූර ක්‍රීඩකයන් රැසක් සමඟින් පුහුණුවීම් කටයුතු සිදු කරමින් සිය දස්කම් ඔපමට්ටම් කරගෙන ඔලිම්පික් උළෙල සුදුසුකම් ලැබීමේ බලාපොරොත්තුවෙන් ශෙහාන් ජැමෙයිකාව වෙත පිටත් වන නමුත් එම ගමන සිය ක්‍රීඩා දිවියේ හැරවුම් ලක්ෂය වේ යැයි ඔහු නොසිතන්නට ඇත.

වසර දෙකක පුහුණුවකට ජැමෙයිකාව බලා ගිය ශෙහාන් ප්‍රවීණ පුහුණුකරු Glen Mills යටතේ පුහුණුවීම් කටයුතු සිදු කරන නමුත් එම පුහුණුවේ දී මතුවෙන ගැටලු නිසාවෙන් ඔහු ආබාධ තත්වයකට පත්වෙන අතර එම ආබාධය නිසාවෙන් ඔහුට ඔලිම්පික් සුදුසුකම් ලබා ගැනීමේ සිහිනයට ද තිත තබමින් සිය ක්‍රීඩා දිවියේ හොඳම කාලයේ දී ක්‍රීඩා පිටියෙන් ඉවත්ව සිටීමට සිදු විය.

ශෙහාන් අඹේපිටිය (මැද) Usain Bolt (දකුණේ) සහ ඔහුගේ පුහුණුකරු Glen Mills (වමේ) සමඟ

“මම හිතන්නේ මගේ ජීවිතයේ ඊළඟ වෙනස වෙන්නේ එතැනින්, මොකද ජැමෙයිකාව ගත්තම පුහුණු කටයුතු හරි වෙනස්, හැබැයි මම ගොඩක් දේවල් ඉගෙන ගත්තා. ජැමෙයිකානු ක්‍රීඩකයෝ ගත්තම එයාලා හරි Professional, එයාලා කෑම කන්නේ නිදා ගන්නේ හැමදේම කරන්නේ ක්‍රීඩාව වෙනුවෙන්.

ඒ වගේම තමයි එතන ගොඩක් ප්‍රශ්න තිබ්බා ඒ පුහුණු වීමේ, ඒකත් එක්ක මට හොඳින් දක්ෂතා දක්වන්න බැරි වුනා. ඒ පුහුණුව ගැන කතා කළොත් ඒ තරම් සාර්ථක පුහුණුවීමක් තිබ්බේ නෑ. මොකද එහේ ගත්තොතින් හැමෝටම එකම සුප් එකක් හදලා වගේ එකම workout එක දෙන්නේ, එතකොට Usain Bolt බෝල්ට් කරන එකමයි මාත් කරන්න ඕනේ. උසේන් බෝල්ට් ගත්තම විශාල ක්‍රීඩකයෙක්, ඉතින් එයාගේ ශරීරයට ඔරොත්තු දෙන දේවල් මට හරියන්නේ නෑ.

එයාලා ළඟ හිටියේ ලෝකේ වේගවත්ම ක්‍රීඩකයා ඉතින් එයාලා එයා ගැන තමා 100%ම අවධානය දුන්නේ. ඉතින් ඒකත් එක්ක අපිට වැඩි අවධානයක් ලැබුණේ නැහැ, ඉතින් ඒකත් එක්ක මට ඇත්තටම හොඳ දක්ෂතා දක්වන්න හම්බෙන්නේ නෑ ඔලිම්පික් සුදුසුකම් ලබන්න තරම්”

තවත් විශේෂාංග ලිපි:

එම ආබාධය නිසාවෙන් සිය ක්‍රීඩා දිවියේ හොඳම කාලයෙන් වසර 1 ½කට ආසන්න කාලයක් ක්‍රීඩා පිටියෙන් ඉවත්ව සිටීමට ශෙහාන්ට සිදු වන අතර 2014 වසරේ නැවත ක්‍රීඩා පිටියට අවතීර්ණ වූවත් සිය සුපුරුදු දස්කම් අතරට පැමිණීමට ශෙහාන් අසමත් වූවත් ඔහුට වෙනත් වගකීමක් පැවරීමට මලල ක්‍රීඩා බලධාරීන් තීරණය කරනවා.

එතැන් පටන් තනි ඉසව්වන්ට දෙන අවධානය අවම කළ ශෙහාන් ජාත්‍යන්තර තලයේ තරගාවලි ඉලක්ක කරගනිමින් හිමාෂ ඒෂාන්, විනෝජ් සුරංජය වැනි කෙටි දුර පිටියේ යොවුන් ක්‍රීඩකයන් සමඟින් එක්ව මීටර් 100X4 සහය දිවීමේ කණ්ඩායම පිහිටුවා ගැනීමට කටයුතු කරන අතර එම යොවුන් ක්‍රීඩකයන්ට අවශ්‍ය මාර්ගය පෙන්වමින් කණ්ඩායම ශක්තිමත් කිරීමේ වගකීම ද ශෙහාන්ට හිමි විය.

එතැන් පටන් එම යොවුන් ක්‍රීඩකයන් ද කළමනාකරණය කර ගනිමින් සිය කණ්ඩායම ඉතා ඉක්මනින් ඉහළ රිද්මයකට ගෙන ඒමට සමත් වන අතර 2015 වසරේ පැවති ආසියානු ක්‍රීඩා උළෙලේ දී මීටර් 100X4 සහය දිවීමේ තරගය තත්පර 39.28ක කාලයකින් අවසන් කරමින් එම ඉසව්වේ ජාතික වාර්තාව බිඳ හෙළමින් සිය මුල්ම ඉලක්කය සම්පූර්ණ කරගැනීමට සමත් විය.

එම තරගයේ දී ඉතා කුඩා කාලයකින් ආසියානු පිටියේ පදක්කමක් දිනා ගැනීමට තිබූ අවස්ථාව ශෙහාන් ඇතුළු කණ්ඩායමට අහිමි වූවත්, 2016 වසරේ පැවති දකුණු ආසියානු ක්‍රීඩා උළෙලේ දී මීටර් 100X4 සහය දිවීමේ තරගය තත්පර 39.96ක කාලයකින් අවසන් කරමින් රන් පදක්කම දිනා ගැනීමට සමත් විය.

Shehan Ambepitiya
ශෙහාන් අඹේපිටිය  ඇතුළු කණ්ඩායම 2016 පොදුරාජ්‍ය මණ්ඩලීය ක්‍රීඩා උළෙලේ දී

2018 එම පැවති පොදුරාජ්‍ය මණ්ඩලීය ක්‍රීඩා උළෙලේ මීටර් 100X4 ඉසව්වේ ඉතිහාසයේ මුල්ම වරට අවසන් වටයට තේරී පත්වීමට ශෙහාන් ඇතුළු කණ්ඩායම සමත් වූ අතර එහි දී එම ඉසව්ව තත්පර 39.08ක කාලයකින් අවසන් කර නැවත වරක් ජාතික වාර්තාව අලුත් කිරීමට ද ඔවුන්ට හැකි විය.

සහය දිවීමේ කණ්ඩායම සමඟින් ඉහළ දස්කම් දැක්වීමෙන් අනතුරුව 2019 දකුණු ආසියානු ක්‍රීඩා උළෙල සඳහා සුදුස්සන් තේරීම් තරග ලෙස පැවැත්වූ ජාතික මලල ක්‍රීඩා ශූරතාව ආරම්භයේ දී ම සිය සුපුරුදු ඉසව්ව වූ මීටර් 100 ඉසව්වේ පසුබෑමට ලක්වන ශෙහාන් තත්පර 10.87ක කාලයක් වාර්තා කරමින් තරගය හත්වැන්නා බවට පත්වෙමින් නිමා කළේය.

Shehan Ambepitiya
ශෙහාන් ඇතුළු කණ්ඩායම 2018 පොදුරාජ්‍ය මණ්ඩලීය ක්‍රීඩා උළෙල අතරතුර දී

එයින් පසු මීටර් 200 ඉසව්ව සඳහා වූ මූලික තරග සඳහා ඉදිරිපත් වූ ශෙහාන් එම තරගය තත්පර 21.60ක කාලයකින් අවසන් කරමින් ජය ගැනීමට සමත්වූවත් එම ජයෙන් පසුව සියල්ලන් පුදුමයට පත්කරමින් සිය වසර 16ක ක්‍රීඩා දිවියට සමුදීමට ශෙහාන් තීරණය කරන ලදි.

“ඒක ඇත්තටම මම අවුරුදු කිහිපයක් තිස්සේ ඔලුවේ තියාගෙන හිටපු අදහසක්, අපේ රටේ ක්‍රීඩාවේ වාතාවරණයත් එක්ක හරි අමාරුයි ක්‍රීඩාවේ නිරත වෙන්න. ඉතින් ඒකත් එක්ක මට අවුරුදු 29ක් වුනා මම ඇත්තටම ප්ලෑන් කළේ ගිය අවුරුද්දේ දකුණු ආසියානු ක්‍රීඩා උළෙලෙන් සමුගන්න. 

ඒත් ජාතික ශූරතාවයට ආවට පස්සේ මම මීටර් 100 සහ 200ට සහභාගි වුනාට පස්සේ මට හිතුණා ඇත්තටම දැන් මේ ඇති කියලා, ඉතින් ඒ වෙලාවෙම මම සමුගන්න තීරණය කළා.”

එලෙස මෙරට කෙටිදුර ධාවන ඉතිහාසයේ තවත් යුගයක් නිමා කරමින් ශෙහාන් අඹේපිටිය පසුගිය වසරේ දී ක්‍රීඩාවෙන් සමුගත්ත ද, ඔහුගෙන් පසු හිමාෂ ඒෂාන්, විනෝජ් සුරංජය වැනි ශක්තිමත් දෙවැනි පෙළක් නිර්මාණය කිරීමට ශෙහාන්ට හැකි විය.

Shehan Ambepitiya
ශෙහාන් අඹේපිටිය ක්‍රීඩා පිටියට සමුදුන් අවස්ථාව

සමුගැනීමෙන් පසු බොහෝ ක්‍රීඩකයන්ට මෙන් පුහුණුකරුවෙකු වීමට ශෙහාන්ට ද ආරාධනා රැසක් ලැබුනත්, තමන්ට හිමි නොවූ දෙය තමන්ගෙන් පසු ක්‍රීඩක ක්‍රීඩිකාවන්ට ලබා දීමටත්/ තමන් මුහුණ පෑ ගැටලුවලට අනෙකුත් ක්‍රීඩකයන්ට මුහුණ දීමට ඉඩ නොදීමේ අධිෂ්ඨානයෙන් පරිපාලනයට පිවිසීමට ශෙහාන් තීරණය කරන ලදි.

ක්‍රීඩා පිටියෙන් සමුගැනීමෙන් පසු ඉදිරි සැලසුම් පිළිබඳව The Last Lap වැඩසටහනේ දී ශෙහාන් අදහස් දැක්වුවේ මෙලෙසිනි,

“මම ක්‍රීඩාවෙන් සමුගත්ත වෙලාවෙම මම හිතුවා ඇත්තම මම පරිපාලනයට ඇවිල්ලා මේ ක්‍රීඩාවේ වෙනසක් කරන්න ඕන කියලා, මගේ කාලේ මට වෙච්ච දේවල් මගෙන් ඉස්සරහට එන ළමයින්ට වෙන්න දෙන්න නරකයි. ඉතින් ඒකත් එක්ක මම හිතාගත්තා මම මේ ක්‍රීඩාවේ වෙනසක් කරන්න ඕන කියලා.

අදටත් මට ගොඩක් අය පුහුණුකරන්න කියලා එන්න කියනවා, ඒත් ඇත්තටම මට පුහුණුකරුවෙක් වෙන්න අවශ්‍ය නෑ. මට ඕන මගේ රටේ ඉන්න ක්‍රීඩකයෝ වෙනුවෙන් වෙනසක් කරන්න මේ ක්‍රීඩාවේ නැවතත්.

මලල ක්‍රීඩාව කියන්නේ ලංකාවට වැඩිම ජයග්‍රහණ ගෙනාපු ක්‍රීඩාව, දකුණු ආසියානු මට්ටමේ ඉඳලා ඔලිම්පික් මට්ටම දක්වා අපට පදක්කම් ගෙනාපු ක්‍රීඩාව මේ මට්ටමට වැටිලා තියෙන එක තමා දුකකට තියෙන්නේ. ඉතින් ඒකත් එක්ක තමා මට නැවතත් අවශ්‍ය වෙන්නේ මේ ක්‍රීඩාව වෙනස් කරලා පරණ තත්වෙට ගේන්න.”

ක්‍රීඩාවේ වෙනසක් සිදු කිරීමේ අදහසින් ක්‍රීඩා පිටියෙන් සමුගත් ශෙහාන් හට නව ක්‍රීඩා අමාත්‍යවරයා විසින් පත් කරන ලද ක්‍රීඩා කාර්ය සාධන කමිටුවේ ද අසුනක් වෙන් කිරීමට ක්‍රීඩා අමාත්‍යවරයා තීරණය කර තිබුණේ ක්‍රීඩාවේ සංවර්ධනය පිළිබඳව ශෙහාන්ට ඇති දැනුමෙන් නිසි සේවාව ලබාගැනීමේ අරමුණෙනි.

ක්‍රීඩකයෙකු ලෙස ද අපමණ බාධක මැද්දේ වසර 16ක් රට වෙනුවෙන් සිය සේවාව ලබා දීමෙන් අනතුරුව සිය දිවියේ ඉතිරි කාලය ද ක්‍රීඩාවේ දියුණුව වෙනුවෙන් කැප කරන ශෙහාන් වැන්නන් බිහිවන්නේ කලාතුරකිනි. 

මේ වන විට ක්‍රීඩා පරිපාලනයට ද සිය සේවාව ලබා දෙන ශෙහාන්ගේ ඉදිරි සැලසුම් සියල්ල සාර්ථක කරගනිමින් මෙරට මලල ක්‍රීඩාවට නැවත වරක් ස්වර්ණමය යුගයක් ඇති කිරීමට අවශ්‍ය ශක්තිය ධෛර්යය ලැබේවායි  ThePapare.com අප ඔහුට සුබ පතන්නෙමු.

>> තවත් විශේෂාංග ලිපි සඳහා පිවිසෙන්න <<

Watch – දකුණු ආසියාව රජ කළ වේගයේ කුමාරයා – The Last Lap | EP 3