ඉන්දීය ඕස්ට්‍රේලියා ටෙස්ට් තරගාවලියට අදාලව පැවැත්වීමට නියමිතව ඇති සිව්වැනි ටෙස්ට් තරගය බ්‍රිස්බෙන් හිදී පැවැත්වීමට නියමිතයි. කෙසේ වෙතත් එම තරගය සඳහා සහභාගී වුවහොත් එළඹෙන පෙබරවාරි මාසයේ දී ඉන්දියාවේ පැවැත්වීමට නියමිත එංගලන්ත තරගාවලිය අවදානමකට ලක්වනු ඇති බව විදෙස් මාධ්‍ය වාර්තා කරයි.
ඉන්දීය කණ්ඩායම සහ කළමනාකාරිත්වය මේ පිළිබඳව සාකච්ඡා කරමින් සිටින බව ද වාර්තා වේ. පසුගිය දා එක්සත් රාජධානියෙන් වාර්තා වූ කොරෝනා වයිරසයේ නව ප්‍රභේදය ආසාදනය වූ පුද්ගලයන් කීපදෙනෙකු බ්‍රිස්බෙන් නුවරින් ද වාර්තා වීම නිසා එම නගරය දින තුනක කාලයක් සම්පූර්ණ වසාදැමීමකට ලක් කිරීමට තීරණය කර තිබුණි.
බ්‍රිස්බෙන් ආශ්‍රිතව වාර්තා වන කොරෝනා වයිරසය නිසා සිව්වැනි ටෙස්ට් තරගය එහි පැවැත්වුවහොත් තරගාවලිය අවසන් වීමෙන් පසුව ඉන්දීය කණ්ඩායමට නැවත සිය රටට පැමිණීමෙන් පසුව ස්වයං නිරෝධායනයට ලක්වීමට සිදු වනු ඇත.
කෙසේ වෙතත් තවමත් ඉන්දියාව ඕස්ට්‍රේලියාවේ සිට පැමිණෙන පුද්ගලයන් සඳහා තහනමක් පනවා නැත. කෙසේ වෙතත් එක්සත් රාජධානියේ සිට පැමිණෙන සියලු ගුවන් මගීන් සඳහා සතියක් රජයේ මධ්‍යස්ථානවල ස්වයං නිරෝධායන කාලසීමාවක් සහ නිවසේ නිරෝධායන කාලසීමාවක් ගතකිරීම අනිවාර්ය කිරීමට දිල්ලි ප්‍රාන්ත ආණ්ඩුව පසුගිය දා තීරණය කළේය.
මෙම නිරෝධායන නීති රීති හේතුවෙන් පෙබරවාරි මස 5 වැනිදා ආරම්භ වීමට නියමිත එංගලන්ත ටෙස්ට් තරගාවලියට යම් බලපෑමක් ඇතිවිය හැකි බව ඉන්දීය ක්‍රිකට් ආයතනයේ අවධානයට යොමුව තිබේ.
බ්‍රිස්බෙන් ආශ්‍රිතව වාර්තා වන රෝගීන් හේතුවෙන් ඕස්ට්‍රේලියා අගමැති Scott Morrison පසුගිය දා විශේෂ නීති කීපයක් පැනවීමට කටයුතු කළේය. ඒ අනුව සමාජය තුල නව වයිරසය ව්‍යාප්ත වීම වැළැක්වීම සඳහා Queensland ප්‍රාන්තය සම්පූර්ණ වසාදැමීමකට ලක් කිරිමට ද ඔහු තීරණය කළේය.
මේ හේතුවෙන් ඕස්ට්‍රේලියා Big Bash තරගාවලිය සඳහා සහභාගී වීමට එම ප්‍රාන්තයට පැමිණ සිටි Sydney Sixers සහ Brisbane Heat කණ්ඩායම්වලට ඔවුන්ගේ හෝටල් තුලම රැඳී සිටීමට නියෝග කර තිබේ. කණ්ඩායම්වලට අවසර හිමිවන්නේ පුහුණුවීම් සඳහා පමණි.
Queensland ප්‍රාන්තය සහ ගැබා ක්‍රීඩාංගණයේ තරග පැවැත්වීම පිළිබඳව ඕස්ට්‍රේලියා ක්‍රිකට් ආයතනය සහ ඉන්දීය ක්‍රිකට් ආයතනය සති කීපයක සිට සාකච්ඡා කරමින් සිටී. Cricbuzz වෙබ් අඩවිය වාර්තා කළ ආකාරයට පුහුණුවීම් සඳහා අවසර හිමිනොවන්නේ නම් ඉන්දීය කණ්ඩායම බ්‍රිස්බෙන් වෙත යාම පිළිබඳව සිය අකැමැත්ත ප්‍රකාශ කර ඇත.
තවත් ක්‍රිකට් පුවත්:
- ඉන්දීය ක්‍රීඩකයින් දෙදෙනෙකු ඉලක්ක කරගනිමින් සිදු කළ අකටයුත්ත!
- එංගලන්තය දෙපිල බෙදී පුහුණු තරගයක
- COVID-19 පාලනයට සංගා – මහේල පෙරට එයි
- දකුණු අප්‍රිකාවේ සිට එංගලන්ත සටනට එන ශ්‍රී ලංකා සංචිතයේ වෙනසක්
- ශ්‍රී ලංකා යොවුන් ක්‍රිකට් පුහුණුකාරීත්වයට අලුත් මුහුණක්
කෙසේ වෙතත් මේ වන විට සිඩ්නි ක්‍රීඩාංගණයේ පැවැත්වෙන තුන්වැනි ටෙස්ට් තරගයේ තුන්වැනි දිනය අවසන් වීමෙන් පසුව ඕස්ට්‍රේලියා ක්‍රිකට් ආයතනයේ ප්‍රධාන විධායක නිලධාරි Nick Hockly ඉන්දීය ක්‍රිකට් කණ්ඩායම සහ එහි කළමනාකාරිත්වය සමඟින් විශේෂ සාකච්ඡාවක් සිදු කර තිබේ. එහි දී කණ්ඩායම් එකඟ වූ ආකාරයට සිව්වැනි ටෙස්ට් තරගය ගැබා ක්‍රීඩාංගණයේ පැවැත්වීමට තීරණය වී ඇත. ඒ පිළිබඳව අවසන් තීරණය ඉරිදා (10) ගැනීමට නියමිතය.
ඉන්දීය ඕස්ට්‍රේලියා තුන්වැනි ටෙස්ට් තරගයේ සිව්වැනි දිනය නිමා වන විට ලකුණු 407ක ඉලක්කයක් හඹා යන ඉන්දීය කණ්ඩායම කඩුලු දෙකක් දැවී ලකුණු 98ක් වාර්තා කර තිබුණි. හෙට තරගයේ අවසන් දිනයයි.
ඉන්දීය ඕස්ට්‍රේලියා ටෙස්ට් තරගාවලිය සඳහා තරග හතරක් ඇතුළත් වන අතර කණ්ඩායම් දෙකම එක් තරගය බැගින් ජයග්‍රහණය කර සම තත්ත්වයේ පසුවේ.
Cricbuzz ඇසුරිනි
>> තවත් ක්‍රිකට් පුවත් සඳහා පිවිසෙන්න <<
