ශ්‍රී ලංකා පාපන්දු ක්‍රීඩාව ජනප්‍රිය කිරීම සඳහා ශ්‍රී ලංකා පාපන්දු සම්මේලනය සහ Dialog Play අත්වැල් බැඳගනී.
මේ අනුව සුපර් ලීග් තරගාවලියේ සියලුම තරග 81ක් Dialog Play ජංගම යෙදුම ඔස්සේ සජීවීව විකාශය කිරීමට නියමිත අතර. ඒත් සමඟ මෙරට ප්‍රමුඛතම දේශීය පාපන්දු තරගාවලිය රට පුරා සිටින ක්‍රීඩා ලෝලීන්ට වඩාත් සමීප වනු ඇත.
ශ්‍රී ලංකා පාපන්දු ක්‍රීඩාවේ තවත් වැදගත් ඉදිරි පියවරක් සනිටුහන් කරමින්, ශ්‍රී ලංකා පාපන්දු සම්මේලනය (FFSL) සහ ප්‍රමුඛතම ඩිජිටල් ප්‍රවාහන වේදිකාවක් වන Dialog Play එක්ව කටයුතු කිරීමට ගිවිසුම්ගත වීම සමඟයි මෙම නව පරිවර්තනය සිදු වන්නේ.
මෙම හවුල්කාරිත්වය යටතේ, මෙරට ප්‍රමුඛතම දේශීය පාපන්දු තරගාවලිය වන සුපර් ලීග් තරගාවලියේ සියලුම තරග 81 Dialog Play ජංගම යෙදුම ඔස්සේ සජීවීව විකාශය කෙරේ. ඒ අනුව, රටේ ඕනෑම ප්‍රදේශයක සිටින පාපන්දු ලෝලීන්ට තම ජංගම දුරකථන ඔස්සේ තරග සජීවීව නැරඹීමටත්, තමන් කැමති කණ්ඩායම්වලට සහයෝගය දැක්වීමටත් අවස්ථාව සැලසෙනු ඇති.
පාපන්දු නිවසේ දී පැවැති මාධ්‍ය හමුවේදී අදහස් දැක්වූ ශ්‍රී ලංකා පාපන්දු සම්මේලනයේ සභාපති ජස්වර් උමර් මහතා ප්‍රකාශ කළේ, මෙම හවුල්කාරිත්වය සුපර් ලීග් තරගාවලියේ වටිනාකම, ප්‍රචාරණය සහ ජනප්‍රියත්වය ඉහළ නැංවීම සඳහා සම්මේලනය ගෙන ඇති වැදගත් පියවරක් බවයි.
“ශ්‍රී ලංකාවේ ප්‍රමුඛතම විදුලි සංදේශ සමාගම වන Dialog සමඟ හවුල්කාරිත්වයකට එක්වීමට ලැබීම පිළිබඳ ව අපි සතුටට පත්වන අතර, ඔවුන්ට අපගේ ස්තුතිය පුද කරනවා. මෙම සහයෝගීතාව මඟින් ක්‍රීඩකයන්, ක්‍රීඩා සමාජ සහ ක්‍රීඩා ලෝලීන් අතර පාපන්දු ක්‍රීඩාව කෙරෙහි වැඩි උනන්දුවක් ඇති වේවි. එමෙන්ම, තම ජංගම දුරකථන ඔස්සේ පාපන්දු ක්‍රීඩා කිරීමට, තරග නැරඹීමට සහ ක්‍රීඩාව රසවිඳීමට වැඩි පිරිසක් යොමු වනු ඇතැයි අපි විශ්වාස කරනවා. අපගේ දේශීය තරගාවලිය වඩාත් පහසුවෙන් නැරඹීමට අවස්ථාව සැලසීම තුළින්, රට පුරා පාපන්දු ක්‍රීඩාව වර්ධනය කිරීම සඳහා අපි තවත් වැදගත් පියවරක් තබා තිබෙනවා.”
- SAFF U20 තරගාවලිය සඳහා ශ්‍රී ලංකා පාපන්දු සංචිතය නම් කරයි
- පිහිනන්න නොදැන ඔලිම්පික් ගිය පිහිනුම් ශූරයා
- ගංගා සිය තරග වටයේ පළමු ස්ථානයට!
- ඉන්දියාව පළමු පදක්කම දිනයි, බ්‍රසීලයට නොසිතූ පරාජයක්!
- විරේන්ට පළමු තරගයෙන් පරාජයක්
පසුගිය වසර තුන තුළ ශ්‍රී ලංකා ජාතික පාපන්දු කණ්ඩායම අත්කරගත් කැපී පෙනෙන ප්‍රගතිය සහ සමස්තයක් ලෙස මෙරට පාපන්දු ක්‍රීඩාවේ වර්ධනය පිළිබඳව ද සභාපතිවරයා මෙහිදී අදහස් දැක්වීය. මෙම ප්‍රගතිය අඛණ්ඩව පවත්වාගෙන යාම සඳහා නවෝත්පාදන, උපායමාර්ගික හවුල්කාරිත්වයන් සහ අඛණ්ඩ ආයෝජනවල වැදගත්කම ද ඔහු අවධාරණය කළා.
Dialog Axiata හි මාධ්‍ය සහ නිවාස සේවා අංශයේ උප සභාපති පුබුදු අලුත්ගෙදර මහතා ප්‍රකාශ කළේ, මෙම හවුල්කාරිත්වය ආයතන දෙක අතර දිගුකාලීන සහයෝගීතාවක ආරම්භය පමණක් බවයි.
තවද, Dialog Play වේදිකාව හරහා උසස් තත්ත්වයේ පාපන්දු අන්තර්ගතයන් ක්‍රීඩා ලෝලීන්ගේ ජංගම දුරකථන වෙත සෘජුවම ගෙන යාමට හැකියාව පවතින බවත්, ඒ මඟින් තමන් කැමති කණ්ඩායම්වල තරග සමඟ නිරන්තරයෙන් සම්බන්ධ වී සිටීමට ක්‍රීඩා ලෝලීන්ට අවස්ථාව ලැබෙන බවත් ඔහු සඳහන් කරන ලදී.
සුපර් ලීග් තරගාවලිය ශ්‍රී ලංකාවේ ප්‍රමුඛතම දේශීය පාපන්දු තරගාවලිය වන අතර, එයට ක්‍රීඩා සමාජ 10ක් සහභාගී වේ. පළමු වටය සහ සුපර් සික්ස් වටය ඇතුළත් තරග ආකෘතියක් යටතේ පැවැත්වෙන මෙම තරගාවලියේදී සමස්ත තරග 81ක් පැවැත්වේ. මෙරට ප්‍රමුඛ පෙළේ ක්‍රීඩා සමාජ සහ ක්‍රීඩකයන්ට තම දක්ෂතා ප්‍රදර්ශනය කිරීමටත්, ඉහළම දේශීය තරගකාරී මට්ටමකදී තරග වැදීමටත් මෙම තරගාවලිය වැදගත් වේදිකාවක් සපයයි.
මෙම හවුල්කාරිත්වය හරහා දේශීය පාපන්දු ක්‍රීඩාවේ ප්‍රවේශය පුළුල් කිරීම, ක්‍රීඩා ලෝලීන්ගේ සහභාගීත්වය සහ උනන්දුව ඉහළ නැංවීම, ක්‍රීඩා සමාජ සහ ක්‍රීඩකයන්ගේ ජනප්‍රියත්වය වර්ධනය කිරීම සහ පාපන්දු ක්‍රීඩාවේ වාණිජමය වර්ධනය සඳහා නව අවස්ථා නිර්මාණය කිරීම ශ්‍රී ලංකා පාපන්දු සම්මේලනයේ සහ Dialog Play හි අරමුණයි.
සෑම තරගයක්ම ක්‍රීඩා ලෝලීන්ට වඩාත් සමීප කරමින්, වඩාත් සම්බන්ධිත, පහසුවෙන් ප්‍රවේශ විය හැකි සහ ඩිජිටල් තාක්ෂණයෙන් බලගැන්වුණු අනාගතයක් කරා ශ්‍රී ලංකා පාපන්දු ක්‍රීඩාව තවත් පියවරක් ඉදිරියට තබනු ඇති.
දෙස්, විදෙස් පාපන්දු පිටිය පිළිබඳ සියලු උණුසුම් තතු විත්ති ඔබ වෙත සමීප කිරීමට ThePapare සූදානම්, රැඳී සිටින්න ශ්‍රී ලංකාවේ අංක එකේ ක්‍රීඩා නාලිකාව ThePapare සමඟින්.
