ස්විස්ටර්ලන්තයේ පැවති Citius Meeting Bern 2022 මලල ක්‍රීඩා තරගාවලියට සහභාගී වූ හෙල්ල විසිකිරීමේ ශූර සුමේධ රණසිංහ එහි තෙවැනි ස්ථානය දිනා ගැනීමට සමත් වුනා.
ලෝක මහාද්වීපික සංචාරයට අයත් ලෝකඩ කාණ්ඩයේ තරගාවලියක් වූ මෙම තරගාවලියේ හෙල්ල විසිකිරීම ඉසව්වෙන් මීටර් 74.55ක දස්කමක් වාර්තා කරමින් තෙවැන්නා ලෙස සුමේධ තරගය අවසන් කළා.
මීටර් 78.72ක දස්කමක් පෙන්නුම් කළ Rolands Štrobinders ඉසව්වේ පළමු ස්ථානය දිනා ගත් අතර මීටර් 76.52ක දුරක් වාර්තා කළ Felise Vahai Sosaia එහි දෙවැනි ස්ථානය දිනා ගත්තා.
මෙම තරගාවලිය සඳහා සුමේධට අමතරව තවත් ක්‍රීඩිකාවන් දෙදෙනෙකු සහ එක් ක්‍රීඩකයෙකු ශ්‍රී ලංකාව නියෝජනය කරමින් සහභාගී වූවත් ඔවුන්ට ජයග්‍රහණ ලබා ගැනීමට හැකි වුනේ නැහැ.
- සාරංගි රන් දිනයි!
- ශ්‍රී ලංකා ක්‍රීඩිකාවන් රිදි පදක්කමක් ලක්මවට දිනා දෙයි
- 61 වැනි ඉන්දීය ප්‍රාන්ත මලල ක්‍රීඩා ශූරතාවය
- ඉන්දියාවට ගිය අමාෂා සහ අරුණ අවසන් මහා තරගයට
තරගාවලිය නියෝජනය කළ පළමු ශ්‍රී ලාංකිකයා ලෙස මීටර් 400 ශූර කාලිංග කුමාරගේ පිටියට පිවිසි අතර තත්පර 46.36ක කාලයකින් එම ඉසව්ව අවසන් කළ ඔහුට හිමි වුනේ හයවැනි ස්ථානය.
මෑත කාලයේ කැපී පෙනෙන ක්‍රීඩිකාවක් වූ සාරංගි ද සිල්වා හට මෙම තරගාවලියේ දී සුපුරුදු දස්කම් අතරට පැමිණීමට නොහැකි වූ අතර මීටර් 6.19ක දුරක් වාර්තා කරමින් ඇය කාන්තා දුර පැනීම ඉසව්ව නිමා කළේ සිව්වැන්නා ලෙසයි.
ඔවුන්ට අමතරව මෙම තරගාවලියේ කාන්තා මීටර් 800 ඉසව්ව සඳහා ගයන්තිකා අබේරත්න සහභාගී වූ අතර මිනිත්තු 2:04.48ක කාලයකින් ඉසව්ව අවසන් කළ ඇයට හිමි වුනේ හයවැනි ස්ථානයයි.
මෙම ස්විස්ටර්ලන්ත සංචාරයේ දී තරගාවලි ද්විත්වයකට සහභාගී වූ ශ්‍රී ලංකා ක්‍රීඩක ක්‍රීඩිකාවන් පදක්කමක් ද්විත්වයක් දිනා ගත් අතර සුමේධගේ ලෝකඩ පදක්කමට අමතරව සාරංගි ද සිල්වා විසින් මීට පෙර තරගාවලියේ දී රන් පදක්කමක් දිනා ගන්නට සමත් වුනා.
මෙම සංචාරයට එක්වූ ක්‍රීඩක ක්‍රීඩිකාවන් ලෝක මලල ක්‍රීඩා ශූරතාවයට සහභාගී වීමට හැකියාවක් පවතින අයවලුන් නිසාවෙන් මෙම සංචාරයේ දී හිමි කරගන්නා ප්‍රසාද ලකුණු ඔවුන්ට එම ශ්‍රේණිගත කිරීම්වල ඉහළට පැමිණීමට වැදගත් වනවා.
>> තවත් මලල ක්‍රීඩා පුවත් සඳහා පිවිසෙන්න <<
