ශ්‍රී ලංකා – බටහිර ඉන්දීය කොදෙව් පළමු ටෙස්ට් ක්‍රිකට් තරගය පසුගිය දා Sir Vivian Richards ක්‍රීඩාංගණයේ දී ජය පරාජයෙන් තොරව අවසන් වූයේ, කෝඩුකාර ශතක දෙකක බලපෑම මත ය. තරගයේ අවසන් දිනය උදා වෙන්නේ කොදෙව්වන්ට ජයග්‍රහණය වෙනුවෙන් ලකුණු 340ක අවශ්‍යතාවක් සමඟිනි. ඒ වෙද්දී ඔවුන් සතුව තිබුණේ කඩුලු 9ක් පමණි.
ශ්‍රී ලාංකිකයන්ගේ බලාපොරොත්තුව වූයේ කාලයකට පසු ලැබෙන ටෙස්ට් ජයග්‍රහණයක් පිළිබඳව ය. දකුණු අප්‍රිකාව සහ එංගලන්තය සමඟ පැවති ආසන්නතම තරගාවලි දෙකේ තරග 2 බැගින් පරාජය වෙමින් සිටි ශ්‍රී ලංකා ක්‍රීඩකයෝ ද එකී පිපාසාවෙන් ම පෙළෙන්නට ඇත.
නමුත් ඒ තීරණාත්මක දිනය කොදෙව්වන් නමින් ලියැවෙන්නේ ශ්‍රී ලාංකිකයන්ගේ බලාපොරොත්තු ඈතට තල්ලු කරමිනි. ඔවුන් දිනය අවසන් කරමින් තරගය අවසන් කරන විට ප්‍රතිවාදී ශ්‍රී ලංකා පන්දු යවන්නන්ට ලබා දී තිබුණේ තවත් කඩුලු 3ක් සමඟ ඉනිමේ කඩුලු 4ක් පමණි. කොදෙව්වෝ එම දිනයේ දී මනා සංයමයකින් යුතුව පන්දුවට පහර දෙමින් ලකුණු 202ක් වාර්තා කරන්නේ ඉනිමේ සම්පූර්ණ ලකුණු සංඛ්‍යාව 234ක් බවට පරිවර්තනය කර ගනිමිනි.
Nkrumah Bonner
කොදෙව්වන්ගේ ගැලවුම්කරු වෙන්නේ දෙවැනි ඉනිමේ පළමු කඩුල්ල බිඳ වැටුණ පසු පිටියට පිවිසි 32 හැවිරිදි දකුණත් පිතිකරු Nkrumah Bonner ය. මේ වසරේ බංග්ලාදේශයට එරෙහිව ටෙස්ට් වරම් දිනා ගත් Bonner ඒ වෙද්දී ක්‍රීඩා කරමින් සිටියේ තම ටෙස්ට් තරග දිවියේ 6 වැනි ඉනිමයි.
බංග්ලාදේශය සමඟ පැවති මංගල ටෙස්ට් තරගාවලියේ දී තරග දෙකක දී අර්ධ ශතක දෙකක් සමඟින් ලකුණු 231ක් ලබා සිටි ඔහුට මෙම තරගයේ දී ඉදිරිපෙළ පිතිකරුවෙක් ලෙසින් වඩාත් වගකීම් සහිත ඉනිමක් ක්‍රීඩා කිරීමට උපදෙස් ලැබෙන්නට ඇත. ඒ බැව් සිතෙන්නේ ඔහු තම අර්ධ ශතකය ලබා ගැනීමට පන්දු 126ක් වැය කිරීම නිසා ය.
කෙසේ වෙතත් ශ්‍රී ලංකාවට ලැබෙන්නට තිබූ ජයග්‍රහණයක් වැළැක්වූ Bonner තරගය අවසන් වන විට පන්දු 274කට මුහුණ දෙමින් හතරේ පහර 13ක් සහ හයේ පහරක් සමඟින් නොදැවි ලකුණු 113ක් ලබා ගත්තේ ය. ඔහුගේ එම මංගල ශතකය තරගය අවසානයේ තරගයේ වීරයා සම්මානයෙන් ද ඇගයීම් ලැබුවේ ය.
තවත් ක්‍රිකට් පුවත්:
- “මේ ඉනිම මගේ තාත්තාට”
- Virat Kohli තවත් කඩඉමක් පසුකරයි
- මාස 13කට පසුව ලෝක ටෙස්ට් ශූරතාවලියේ දී ශ්‍රී ලංකාවට ලකුණු වැටෙයි
- පැතුම්ගේ ශතකයට මහේලගෙන් සුබ පැතුම්
- ප්‍රේක්ෂක පැතුම් මල්ඵල ගැන්වූ පැතුම්ගෙන් වාර්තාගත ශතකයක්
රටක් වසඟ කළ පැතුම්ගේ දක්ෂතාව
තරගයේ වීරයා ලෙස බටහිර ඉන්දීය කොදෙව් ක්‍රීඩක Bonner ලෙසින් නම් වූවත් කාගේත් කතාබහට ලක් වූයේ අපේ පැතුම් නිස්සංක වෙත ය. පැතුම් මේ තරග සංචාරයට එක්වෙන විට පළමු පෙළ තරගවල 67.54ක සාමාන්‍යයක් පවත්වා ගෙන සිටියේය. එය මෙරට ක්‍රීඩකයෙක් පළමු පෙළ තරගවල ලබා සිටි ඉහළම සාමාන්‍ය ගණනය විය. එමෙන්ම එකී දක්ෂතාව ලෝක ඉතිහාසයේ සිව්වැනි තැනට ශ්‍රේණිගත වී තිබුණේ ය.
එකී ලැයිස්තුවේ පැතුම්ට ඉහළින් සිටි සියල්ලෝම ක්‍රිකට් ලෝක ඉතිහාසයේ ගෞරවය පාත්‍ර වූවෝය. එහි පළමු තැන ඕස්ට්‍රේලියාවේ Don Bradman සතු විය. ඔහු 1927-1949 කාලයේ දී තරග 234ක ඉනිම් 338ක දී 95.14ක සාමාන්‍යයක් පවත්වා ගෙන සිටියේය.
දෙවැනි තැන 1929- 1951 කාලයේ ඉන්දියාවේ Vijay Merchant තරග 150ක ඉනිම් 234ක දී සාමාන්‍ය 71.64ක් රඳවා ගෙන සිටියේය. එහි තෙවැනියා වූයේ බටහිර ඉන්දීය කොදෙව් ජාතික George Headley ය. ඔහු 1927-1954 කාලයේ දී තරග 103ක ඉනිම් 164ක දී 69.86ක සාමාන්‍යයක් රඳවා ගෙන සිටියේය.
මේ පතාකයන් අතරට පත් පැතුම් තමන්ට ලද පළමු ටෙස්ට් ක්‍රිකට් තරගයේ දී ම ශතකයක් වාර්තා කරමින් එවැන්නක් කළ ශ්‍රී ලාංකීය සිව්වැනි පිතිකරුවා බවට පත් විය. පැතුම්ට ප්‍රථම, බ්‍රෙන්ඩන් කුරුප්පු 1987 දී නවසීලන්තයට එරෙහිව නොදැවී ලකුණු 201ක්, රොමේෂ් කළුවිතාරණ 1992 දී ඕස්ට්‍රේලියාවට එරෙහිව නොදැවී ලකුණු 132ක් සහ තිලාන් සමරවීර 2001 වසරේ දී ඉන්දියාවට එරෙහිව නොදැවී ලකුණු 103ක් තම මංගල තරගවලට සහභාගී වෙමින් ලබා සිටිය හ. මේ ශතක තුනම වාර්තා වන්නේ කොළඹ 7, එස්. එස්. සී. පිටියේ දී
ඒ අනුව පැතුම්ගේ ශතකය මෙරට ක්‍රීඩකයෙක් වෙනත් රටක දී සහභාගී වූ මංගල තරගයක දී වාර්තා කරන ලද පළමු ශතකය විය. තවමත් 22 වැනි වියේ පසුවෙන පැතුම් මෙම තරගයේ දී අර්ධ ශතකය වාර්තා කරන්නේ තමන් මුහුණ දුන් 126 වැනි පන්දුවේ දී ය. ඒ වෙද්දී හතරේ පහර 5ක් එල්ල කර තිබූ පැතුම් තමන්ගේ ඊළඟ ලකුණු 50ට එක්කර ගන්නේ තවත් එක් හතරේ පහරක් පමණි. ඔහුගේ ශතකය වෙනුවෙන් වැය කළ පන්දු සංඛ්‍යාව 240කි. පැතුම්ගේ ඉනිම නිමා වන විට ඔහු පන්දු 252කට මුහුණ දෙමින් හතරේ පහර 6ක් සමඟින් ලකුණු 103ක් ලබා සිටියේය.
පැතුම්ගේ මෙම ඉනිමේ අනෙක් අන්තයේ සහායකයා වූයේ නිරෝෂන් දික්වැල්ල ය. ඔහු සමඟ 6 වැනි කඩුල්ලට එක් වෙමින් ඔවුන් තම කණ්ඩායම වෙනුවෙන් රැස් කරන ලද ලකුණු සංඛ්‍යාව 179කි. එය මෙරට ඉතිහාසයේ එම කඩුල්ලේ 5 වැනි තැන ගන්නා හොඳම සබඳතාවය ය.
දිනක් පැවැති කඩුලු සබඳතා වාර්තාව
පැතුම් සහ දික්වැල්ලගේ සබඳතාවට පෙර ආරම්භක පිතිකරු ලහිරු තිරිමාන්න සහ අංක තුන ස්ථානයෙන් පිටියට පිවිසි ඕෂඳ ප්‍රනාන්දු අතර දෙවැනි කඩුල්ලට ලකුණු 162ක සබඳතාවක් ගොඩ නැගුණි. එය ශ්‍රී ලංකාවේ ගෞරවය ඉහළට දැමුණු ලකුණු සබඳතාවක් ලෙසින් ක්‍රීඩා විචාරකයන්ගේ නොමඳ පැසසුමට ලක් විය. එමෙන්ම එම ලකුණු සබඳතාව කොදෙව්වන්ට එරෙහිව කොදෙව් දේශයේ දී ශ්‍රී ලංකා ක්‍රීඩකයන් රැස් කරන ලද ඕනෑම කඩුල්ලක් සඳහා වූ හොඳම ලකුණු සබඳතාවය ලෙසින් ද වාර්තා විය.
නමුත් එහි ආයු කාලය දිනක් පමණක් තබමින් පැතුම් සහ දික්වැල්ල විසින් එකී වාර්තාව තමන් සතු කර ගත්තේ කොදෙව්වන්ට එරෙහිව කොදෙව් දේශයේ දී හයවැනි කඩුල්ලේ සහ ඕනෑම කඩුල්ලක් වෙනුවෙන් වන වාර්තාව තමන් සන්තක කර ගනිමිනි. එබැවින් තිරිමාන්නට සහ ඕෂඳට දෙවැනි කඩුල්ලේ හොඳම ලකුණු සබඳතාවයෙන් පමණක් සෑහීමකට පත් වීමට සිදු වූහ.
දික්වැල්ලගේ අවාසනාව සහ වාසනාව
අවාසනාවක මහත නිරෝෂන් දික්වැල්ලට තම මංගල ශතකය අහිමි වෙන්නේ ලකුණු 4ක් අඩු වීමෙනි. ටෙස්ට් තරග 42ක ඉනිම් 76ක් ක්‍රීඩා කර ඇති දික්වැල්ල මෙතෙක් ලබා ඇති ටෙස්ට් ලකුණු සංඛ්‍යාව 2291ක්. ශතක අහිමි එම ලකුණු සංඛ්‍යාවේ මෙම තරගයේ දී වාර්තා කරන අර්ධ ශතකයත් සමඟින් අර්ධ ශතක 17ක් ඊට ඇතුළත් ය.
කෙසේ වෙතත් දික්වැල්ල මෙම තරගයේ දී තම ටෙස්ට් තරග දිවියේ කඩුල්ල පිටුපස සිටිමින් ශතක උඩ පන්දුව ලබා ගැනීමට සමත් වෙන්නේ ය. ඒ බටහිර ඉන්දීය කොදෙව්වන්ගේ දෙවැනි ඉනිමේ දී ආරම්භක පිතිකරු Jhon Campbellගේ උඩ පන්දුව ලබා ගනිමිනි. කඩුල්ල හිමි වූයේ විශ්ව ප්‍රනාන්දුට ය.
ධනංජය 2000 සමාජයට
තරගයේ ශ්‍රී ලංකා දෙවැනි ඉනිමේ දී පන්දු 79කට මුහුණ දෙමින් හතරේ පහර 6ක් සමඟින් ලකුණු 50ක් ලබා ගත් ධනංජය ද සිල්වා ටෙස්ට් ලකුණු 2000ක් ඉක්මවා යෑමට මෙම තරගයේ දී සමත් විය. ටෙස්ට් තරග 33ක ඉනිම් 60කට මුහුණ දී ඇති ධනංජය මේ දක්වා ලබා ඇති ටෙස්ට් ලකුණු ප්‍රමාණය 2005කි. ඊට මේ තරගයේ දී ලබා ගත් අර්ධ ශතකය ද සමඟින් අර්ධ ශතක 8ක් ඇතුළත් ය.
ශ්‍රී ලංකාව තවමත් 8 වැනි තැන
තරගය ජය පරාජයෙන් තොරව නිමා වීමත් සමඟින් ලෝක ටෙස්ට් ක්‍රිකට් තරගාවලියේ ප්‍රසාද ලකුණු 20 බැගින් දෙපිළට හිමි විය. කෙසේ වෙතත් එම ලැයිස්තුවේ ශ්‍රී ලංකාව තව දුරටත් රැඳී සිටින්නේ 8 වැනි ස්ථානයේ ය. ඔවුන් තරග 9කට සහභාගී වී තරගයක් පමණක් ජයග්‍රහණය කරමින්, තරග හයක් පරාජය වෙමින්, තරග දෙකක දී විසඳුමකින් තොරව නිමා කර ගනිමින් ලබා ඇති ප්‍රසාද ලකුණු ප්‍රමාණය 100කි. කොදෙව්වෝ මේ ලැයිස්තුවේ ප්‍රසාද ලකුණු 180ක් ලබා ගනිමින් 6 වැනි ස්ථානයේ රැඳී සිටී.
දෙරට අතර පැවැත්වෙන දෙවැනි ටෙස්ට් තරගය මේ මස 29 වැනිදා පැවැත්වීමට නියමිත ය.
>> තවත් විශේෂාංග ලිපි සඳහා පිවිසෙන්න <<
