“මේ ඉනිම මගේ තාත්තාට”

“මේ ඉනිම මගේ තාත්තාට” – හැඟීම් බර වූ Krunal Pandya මාධ්‍ය හමුවේ වචන නොමැතිව ගොළු වුනා. ඉන්දීය තුන් ඉරියව් ක්‍රීඩක Krunal Pandya සිය මංගල එක්දින තරග වුන එංගලන්තය සමඟ පැවති පළමු එක්දින තරගයේ දී පන්දු 31කින් ලකුණු 58ක් රැස් කරන්නට සමත් වුනා. ඒ ඉන්දියාව ජය මාවතට රැගෙන එමිනුයි. 

ඔහුගේ සුපිරි ඉනිමට හතරේ පහර හතක් හා හයේ පහර දෙකක් ඇතුළත් වුනා. ප්‍රවීණ පිතිකරුවෙක් ලෙස එංගලන්ත පිතිකරුවන්ට දිගට හරහට Krunal Pandya පහර දුන්නේ වසර ගණනක අත්දැකීම්, මහන්සිය හා දුක් වේදනාවන් සිතේ දරා ගෙනයි.

ඒ සුපිරි ඉනිම මීට මාස දෙකකට පමණ දිවි ගමන නිමා කළ සිය පියාට උපහාරයක්ම වුනා. Krunal Pandya හා ඔහුගේ සහෝදර Hardik Pandya අද සිටින තත්වයට ගෙන එන්නට ඔවුන්ගේ පියා නොකළ කැපවීමක් නැහැ. 

Krunalගේ ක්‍රිකට් දිවියේ ආරම්භය

හිටපු ඉන්දීය කඩුලු රකින පිතිකරු Kiran Moreගේ සෙවණැල්ලේ යට Pandya සහෝදරයින් සිය දස්කම් දියුණු කරනවා. Surat හි ක්‍රීඩා කරමින් සිටි Krunal දුටු Kiran More, Pandya සහෝදරයින්ගේ දෙමව්පියන්ට පවසා තිබුණේ ඔවුන් දෙදෙනාව Baroda හි තමන්ගේ ඇකඩමියට ඇතුළත් කරන ලෙසයි. 

Great to see @krunalpandya24 make his ODI debut, saw him as a seven year old coming to my academy and since then he has made rapid strides in his career, all the best Young man #cricket #IndvEng

— Kiran More (@JockMore) March 23, 2021

Pandya සහෝදරයින්ගේ ක්‍රිකට් ක්‍රීඩාව දියුණු කිරීම උදෙසාම ඔවුන්ගේ දෙමව්පියන් ඉමහත් පරිශ්‍රමයක් දරා Baroda වෙත සංක්‍රමණය වුනා. 

එලෙස Krunal Pandya සත් හැවිරිදි වියේ දී ක්‍රිකට් පිත්ත අතට ගන්නවා.  

ක්‍රිකට් ඇකඩමිය තිබුණේ Krunalගේ නිවසට කිලෝමීටර 25ක් පමණ දුරිනුයි. කුඩා Krunalට වයස අවුරුදු 10-12 කාලයේ පටන් ඔහුවත් සිය බයිසිකලයේ තබාගෙන ඔහුගේ පියා හැමදාම මේ කිලෝමීටර 25 යන්නේ සිය කුඩා පුතුගේ ක්‍රිකට් ක්‍රීඩාව දියුණු කිරීමේ අරමුණිනුයි. 

ඇතැම් අවස්ථාවල සෙසු ළමුන් ඇකඩමියේ හෝ Krunalගේ නිවස අවට සෙල්ලම් කරන්නට එන වේලාවන් වල Krunalගේ පියා ඔවුන්ට පන්දු පිරවූ බකට්ටුවක් ලබා දෙනවා. ඒ පැය ගණනාවක් එක දිගට ක්‍රීඩා කළත් මහන්සි බිංදුවක්වත් නැති Krunalට පන්දු යවන්නටයි. 

Pandya සහෝදරයින් අධ්‍යාපනයට එතරම් දස්කම් දැක්වූයේ නැහැ. ගුරුවරුන් නිතරම ඔවුන්ගේ දෙමව්පියන්ට ඒ පිළිබඳව පැමිණිලි කළා. කෙසේ වෙතත් ඇයගේ පුතුන් දෙදෙනාව විශ්වාස කළ ඔවුන්ගේ මව ගුරුවරුන්ට පවසා සිටියේ ක්‍රිකට් ක්‍රීඩාවෙන් සිය පුතුන් ඉහළටම යන බවට ඇයට ඉර හඳ සේ විශ්වාස බවයි.

Baroda කණ්ඩායමේ අසුනක් Krunalට 

Baroda වයස අවුරුදු 15න් පහළ, 17න් පහළ හා 19න් පහළ කණ්ඩායම්වල අසුනක් Krunalට වෙන් වුනේ ඔහු දැක්වූ දස්කම් නිසයි. වයස අවුරුදු 23න් පහළ ක්‍රීඩා කරන සමය Krunalට එතරම් හොඳ කාලයක් වුනේ නැහැ. මේ යොවුන් වමත් පිතිකරුවාට දිගු කලක් ලකුණු මෙන්ම කඩුලු ද නැතිව වේලෙන්නට සිදු වුනා. 

කණ්ඩායමට අවශ්‍යම මොහොතක අනවශ්‍ය පහරක් එල්ල කළ දැවී ගිය Krunalට කිසිදා නොවූ අත්දැකීමකට මුහුණ දෙන්නට සිදු වුනා. ලකුණු නැතිව සිටි Krunalව කබලෙන් ලිපට ඇද දමමින් ඔහුව Baroda කණ්ඩායමෙන් ඉවත් කෙරුණා.

කණ්ඩායමෙන් ප්‍රතික්ෂේප වුණු Krunal තමන් ගැනම ස්වයං විවේචනයක් කළා. “මම මගේ ජීවිතයේ මොනවද ලබා ගෙන තියෙන්නේ? මගේ දෙමව්පියෝ මං වෙනුවෙන් කොච්චර කැපකිරීම් කළා ද? ඔවුන් මං වෙනුවෙන් තමන්ගේ ගේදොර පවා අතහැරියා. මට වයස අවුරුදු 22ක් 23ක් වෙනවා, මට තවමත් ඔවුන්ට දෙන්නට දෙයක් නැහැ.” 

තවත් ක්‍රිකට් පුවත්:

• මාස 13කට පසුව ලෝක ටෙස්ට් ශූරතාවලියේ දී ශ්‍රී ලංකාවට ලකුණු වැටෙයි
• Umpires Call නීතිය වෙනස් නොකරන්න තීරණයක්
• පැතුම්ගේ ශතකයට මහේලගෙන් සුබ පැතුම්

ඒ මොහොතේ දී මානසිකව ඇද වැටුනත් Krunal සිය ඉලක්කය අතහරින්නේ නැහැ. තමන් ඒ මොහොතේ සිට හොඳ මනුෂ්‍යයෙක් හා හොඳ ක්‍රීඩකයෙක් වෙන බව සිතා ගත් බව Krunal පවසා සිටිනවා. 

මේ කාලයේ දී ම ඔහුට ඉන්දීය තැපැල් සේවයේ රැකියාවක් ද ලැබෙනවා. “මගේ තාත්තා කිව්වා එක හොඳ අවස්ථාවක්, ඔයාට රුපියල් 15000ක විතර වැටුපකුත් ලැබෙයි, ඔයා ඒකට යන්න කියලා. නමුත් ඒ මොහොතේම මට Syed Mushtaq Ali කුසලානය සඳහා තේරීම් තරග ක්‍රීඩා කරන්න තිබුණා. මම හිතුවා මම අවසන් වසර කිහිපය හොඳින් පුහුණු වුනා. මම දැන් වෙනස් ක්‍රීඩකයෙක් ඒ නිසා මම තේරීම් තරග ක්‍රීඩා කරනවා කියලා.”

රැකියාව වෙනුවෙන් ඔහුට ලැබුණු ලිපිය ද ඉරා දැමූ Krunal තේරීම් තරග ක්‍රීඩා කරනවා. Hardik සමඟම තේරීම් තරග සාර්ථකව ක්‍රීඩා කරන Krunal, Baroda කණ්ඩායමේ සිය අසුන යළිත් වෙන් කර ගන්නවා. Pandya සහෝදරයින්ට වාසනාව ගෙනෙමින් Syed Mushtaq Ali කුසලානය පැවැත්වෙන්නේ ඉන්දියාවේ මුම්බායි හිදියි.    

Krunal, IPL යයි

Syed Mushtaq Ali කුසලානයේ තරග නැරඹීමට තවත් සුවිශේෂී පුද්ගලයෙක් පැමිණ සිටියා. ඒ එවකට මුම්බායි ඉන්දියන්ස් පුහුණුකරු වූ John Wright. Pandya සහෝදරයින්ගේ දක්ෂතා දුටු ඔහු හා මුම්බායි ඉන්දියන්ස් කණ්ඩායමේ කළමනාකාරීත්වය 2015 දී Hardik හා 2016 දී Krunalව මුම්බායි ඉන්දියන්ස් කණ්ඩායමට කැඳවා ගන්නවා.  

Papa, with every ball you were always on my mind and in my heart. Tears rolled down my face as I felt your presence with me. Thank you for being my strength, for being the biggest support I’ve had. I hope I made you proud. This is for you Papa, everything we do is for you Papa ❤️ pic.twitter.com/djQWaytETG

— Krunal Pandya (@krunalpandya24) March 23, 2021

2016 IPL තරගාවලියේ Delhi Daredevils කණ්ඩායමට එරෙහිව පැවති තරගයක දී Krunal තමා කෙරෙහි මුම්බායි ඉන්දියන්ස් කණ්ඩායම දැක්වූ දක්ෂතාවයට කළගුණ සලකනවා. ඔහු පන්දු 37ක දී ලකුණු 86ක් රැස් කරන්නේ මුම්බායි කණ්ඩායමට දැවැන්ත ලකුණු 206ක් හිමිකර දෙමිනුයි. එම තරගය මුම්බායි ලකුණු 80කින් ජය ගන්නවා. 

2017 IPL අවසන් මහා තරගයේ දී Krunal පන්දු 38කින් ලකුණු 47ක් රැස් කරන්නේ Rising Pune Supergiants කණ්ඩායම එක ලකුණකින් පරාජය කරන්නට සිය දායකත්වය දක්වමිනුයි. 2018 වසරේ දී මුම්බායි කණ්ඩායම Krunalව ඉන්දීය කෝටි 8.8කට යළි මිල දී ගන්නවා. ඒ එවකට ඉන්දියාව වෙනුවෙන් ක්‍රීඩා නොකළ ක්‍රීඩකයෙකුට වැය කළ වැඩිම මුදල වැය කරමින්. ඔහු පසුව තවත් IPL කුසලාන දෙකක් මුම්බායි කණ්ඩායමට දිනා ගන්නට සිය දායකත්වය ලබා දෙනවා. 

ජාතික කණ්ඩායමට දොර ඇරෙයි

2018 නොවැම්බර් මාසයේ දී බටහිර ඉන්දීය කොදෙව් කණ්ඩායමට එරෙහිව විස්සයි විස්ස ජාත්‍යන්තර තරගයක දී Krunalට ඉන්දීය වර්ණ දරා ක්‍රීඩා කිරීමට අවස්ථාව හිමි වෙනවා. කෙසේ වුනත් ඔහු සිය දක්ෂතාවය හරියටම පෙන්වන්නේ සිය මංගල එක්දින තරගයේ දීයි.  

වසර ගණනක දුක් මහන්සිය පිත්තෙන් නිවා දැමූ Krunal එංගලන්ත පන්දු යවන්නන්ට සිතූ සිතූ සේ පහර දෙනවා. ඒ මංගල එක්දින තරගය ක්‍රීඩා කළ ඉන්දීය ක්‍රීඩකයෙක් ලබාගත් වේගවත්ම අර්ධ ශතකය වාර්තා කරමින්. 

“මේ ඉනිම මගේ පියාට”

Krunalට මේ ඉනිම, හොඳ ඉනිමක්ම විතරක් නොවෙයි. වසර ගණනක මහන්සියේ ප්‍රතිඵලයක්. ඒ ඉනිම ඔහු සිය පියාට පුද කරනවා.

පන්දු 26කින් සිය අර්ධ ශතකය සම්පූර්ණ කරගන්නා Krunal සිය පිත්ත අහස දෙසට ඔසවනවා, ඒ සත් හැවිරිදි වියේ සිට Krunalගේ ක්‍රිකට් ක්‍රීඩාව වෙනුවෙන් හැකි සෑම දෙයක්ම කැප කළ සිය පියාට පෙනෙන්නටයි. හැඟීම්බර වූ Hardik Pandya ද ඔහු දෙස බලා සිටියේ සිය සහෝදරයා ගැන ආඩම්බර වෙමිනුයි.  

ඉනිමෙන් පසුව Krunal කියන්නට යමක් ඉතිරිව තිබුණේ නැහැ. දෑසේ කඳුළු පුරවා ගත් Krunal ක්‍රීඩා පිටියෙන් ඉවතට ඇවිද ආවා. හතරේ සීමාව අසල ඔහුට සුබ පතන්නට ඔහුගේ සහෝදරයා රැඳී සිටියා.

Mumbai Indians ඇසුරින්.

>> තවත් ක්‍රිකට් පුවත් සඳහා පිවිසෙන්න <<