මෙරට මලල ක්‍රීඩා පිටියේ මීටර් 800 ඉසව්ව වසර 8කට ආසන්න කාලයක් සිය නාමය යටතේ තබා ගනිමින් ජාත්‍යන්තර පිටියේ ද දස්කම් දක්වා දකුණු ආසියානු ශූරයා ලෙස ද වසර ගණනාවක් සිය කිරුළ රැකගැනීමට සමත් වූ ඔහු නමින් ඉඳුනිල් මදුෂාන් හේරත් ය.
1993 වසරේ මැයි මස ඌව පළාතේ මහියංගණය දිස්ත්‍රික්කයේ උපත ලද ඉඳුනිල් හේරත් මෙරට මලල ක්‍රීඩාවට ක්‍රීඩකයන් රැසක් දායාද කළ වලල ඒ රත්නායක විදුහලෙන් සිය හැකියාව දියුණු කරගනිමින් ඉතා ඉක්මනින්ම දේශීය මලල ක්‍රීඩා පිටිය සිය ආධිපත්‍යට නතු කරගැනීමට සමත් වූ ඉතාමත් දක්ෂ ක්‍රීඩකයෙකි.
මෙවර Photo Story ලිපිය වෙන්වන්නේ කනිෂ්ඨ මලල ක්‍රීඩා පිටියෙහි සිට දකුණු ආසියානු ශූරයා දක්වා ඉඳුනිල් ආ ගමනේ දී කැමරා කාචයේ සටහන් වූ සේයා රූ කිහිපයක් වෙනුවෙනි.
1. කනිෂ්ඨ මලල ක්‍රීඩා පිටියේ දස්කම්
පාසල් වියේ සිටම මීටර් 800 ඉසව්වේ ඉහළ දස්කම් දැක්වීමට සමත් වූ ඉඳුනිල් 2009 ආසියානු කනිෂ්ඨ මලල ක්‍රීඩා උළෙලේ දී මීටර් 800 ලෝකඩ පදක්කම දිනා ගැනීමට සමත් වූ අතර 2010 යෞවන ඔලිම්පික් උළෙල සඳහා ද සහභාගී වීමට ඔහුට අවස්ථාව හිමි විය.
2. ජාතික මලල ක්‍රීඩා පිටියේ ඉහළ දස්කම්
කනිෂ්ඨ ජාතික ශූරයා වීමෙන් ඉතාමත් කෙටි කලකට පසු සිය දස්කම් තවත් ඉහළ නංවා ගැනීමට සමත් වූ ඉඳුනිල් 2012 වසරේ සිට නොකඩවා වසර කිහිපයක් මීටර් 800 ඉසව්වේ ජාතික ශූරයා බවට පත්වීමට සමත් විය.
3. යුද හමුදා ක්‍රීඩා පිටියේ දස්කම්
දේශීය ක්‍රීඩා පිටියේ දැක්වූ දස්කම් නිසාවෙන් මෙරට මලල ක්‍රීඩාවේ විශාලතම මලල ක්‍රීඩා සංචිතයක් වන ශ්‍රී ලංකා යුද හමුදා මලල ක්‍රීඩා සංචිතය සමඟින් එක් වූ ඉඳුනිල් යුද හමුදා මලල ක්‍රීඩා පිටියේ ද මීටර් 800 ඉසව්වේ ආධිපත්‍ය පතුරවන්නට සමත් විය.
4. දකුණු ආසියානු ශූරයා ලෙස අභිෂේක ලැබීම
මීටර් 800 ඉසව්වේ දැක්වූ ඉහළ දස්කම් නිසාවෙන් 2016 දකුණු ආසියානු ක්‍රීඩා උළෙල සඳහා සහභාගි වීමට වරම් ලැබූ ඉඳුනිල් එහි දී මීටර් 800 ඉසව්ව මිනිත්තු 1:51.46ක කාලයකින් අවසන් කරමින් දකුණු ආසියානු ශූරයා බවට පත්වීමට සමත් විය.
තවත් Photo Stories:
- Photo Story – දකුණු ආසියාවේ කිරුළු පැලඳි පන්නල කුමරා
- Photo Story – දකුණු ආසියානු කෙටිදුර පිටිය හෙල්ලූ කළුතර වීරයා
- Photo Story – දකුණු ආසියාව රජ කළ වේගයේ කුමාරයා
- Photo Story – ලක්මව රනින් සැරසූ දකුණු ආසියානු තරගාවලිය
5. දේශීය පිටියේ පහසු ජයක්
දකුණු ආසියානු ශූරයා වීමෙන් අනතුරුව 2016 වසරේ පැවති 94 වැනි ජාතික මලල ක්‍රීඩා ශූරතාව සඳහා සහභාගි වූ ඉඳුනිල් හේරත් මීටර් 800 ඉසව්ව ඉතා පහසුවෙන් ජයගනිමින් සිය කිරුළ රැකගැනීමට සමත් විය.
6. ආසියානු පදක්කම් සිහිනය බොඳ වීම
2018 වසරේ පැවති ආසියානු ක්‍රීඩා උළෙල සඳහා සහභාගි වීමට සමත් වූ ඉඳුනිල් එහි මීටර් 800 ඉසව්වේ අවසන් තරගය මිනිත්තු 1:51.36ක කාලයකින් අවසන් කිරීමට සමත් වූවත් අටවැන්නා ලෙස තරගය අවසන් කිරීමට ඔහුට සිදු විය.
7. ජාතික කිරුළ රැකගනිමින් දකුණු ආසියානු පිටියට
13 වැනි දකුණු ආසියානු ක්‍රීඩා උළෙල සඳහා සුදුස්සන් තේරීම සඳහා පැවති 97 වැනි ජාතික මලල ක්‍රීඩා ශූරතාවයේ මීටර් 800 ඉසව්ව නියෝජනය කළ ඉඳුනිල් එම ඉසව්ව මිනිත්තු 1:49.86ක කාලයකින් අවසන් කරමින් සිය ජාතික කිරුළ රැකගනිමින් දකුණු ආසියානු ක්‍රීඩා උළෙලට තේරී පත්වීමට සමත් විය.
8. දකුණු ආසියානු කිරුළ රැකගැනීම
නේපාලයේ පැවති 13 වැනි දකුණු ආසියානු ක්‍රීඩා උළෙලේ මීටර් 800 ඉසව්ව සඳහා අසනීප තත්වයක් සමඟින් සහභාගි වූ ඉඳුනිල් එම ඉසව්ව මිනිත්තු 1:50.52ක කාලයකින් අවසන් කරමින් සිය දකුණු ආසියානු කිරුළ රැකගැනීමට සමත් විය.
අපමණ බාධක හමුවේ මෙරට මලල ක්‍රීඩාවට දශකයකට අධික කාලයක් මුළුල්ලේ සිය උපරිම සේවාව ලබා දෙන ඉඳුනිල් හේරත් මෙරට ක්‍රීඩාවට තවත් විශාල ජයග්‍රහණ ගෙන ඒමට හැකි ඉතාමත් ධෛර්යවන්ත ක්‍රීඩකයෙකි.
ඉඳුනිල් හේරත්ගේ ක්‍රීඩා දිවියේ ඉදිරි කටයුතු සියල්ල සාර්ථක වී මෙරට මලල ක්‍රීඩාවට තවත් ජාත්‍යන්තර මට්ටමේ ජයග්‍රහණ රැගෙන ඒමට ඔහු හට අවශ්‍ය ශක්තිය ධෛර්යය ලැබේවායි ThePapare.com සුබපතන්නෙමු.
තවත් Photo Story ලිපියක් සමඟින් හමුවෙමු. රැඳී සිටින්න ThePapare.com සමඟින්.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
