ඇමරිකාවේ දී ධනුෂ්කගෙන් ලොකු පිම්මක්

ඇමරිකා එක්සත් ජනපදයේ වෙසෙන ශ්‍රී ලංකා දුර පැනීමේ ක්‍රීඩක ධනුෂ්ක සඳරුවන් ඊයේ (11) පැවති Max Velocity Athletics High Performance Meet තරගාවලියේ දී මීටර් 8.03ක (තත්පරයට මීටර් 1.8) පිම්මකින් විශිෂ්ට දස්කම් දැක්වීමට සමත්ව තිබෙනවා.

මෙම පිම්ම සඳරුවන්ගේ පුද්ගලික හොඳම පිම්ම ද වනවා. ඔහු 2018 වසරේ දී මීටර් 7.99ක දක්ෂතාවයක් දක්වමින් ඔහුගේ හොඳම පිම්ම වාර්තා කර තිබුණා. කෙසේ වෙතත්, ඔහු මීට පෙර තත්පරයට මීටර් +3.4ක සුළං වේගයක් සමඟ මීටර් 8.10ක දක්ෂතාවයක් දක්වා ඇති නමුත් සුළඟේ වේගය නිසා එය නීත්‍යානුකූල වන්නේ නැහැ.

සඳරුවන් මෙම තරග වාරයේ දී හොඳ ශාරීරික යෝග්‍යතාවයකින් පසුවන අතර, ඔහු මේ දක්වා විශිෂ්ට දස්කම් දැක්වීමට සමත්ව සිටිනවා. මෙම දස්කම් සමඟින් ඔහු Road to Oregon ශ්‍රේණිගත කිරීම් හි හොඳම ක්‍රීඩකයන් 50 දෙනා අතරට පැමිණීමට ද සමත්ව සිටීම විශේෂත්වයක්.

• ඉන්දියාවට ගිය අමාෂා සහ අරුණ අවසන් මහා තරගයට
• විශිෂ්ටතම කනිෂ්ඨයෝ තරුෂි සහ හිරුෂ!
• සාරංගි සිල්වා පෝලන්තයේ දී හයවැනි තැනට
• ලෝක මලල ක්‍රීඩා ශූරතාවය අභියස ශ්‍රී ලාංකිකයින් පස් දෙනෙක්
• සාරංගි විදෙස් සංචාරයක

පසුගිය දා දැක්වූ දක්ෂතාවය සමඟින් සඳරුවන් ඔහුගේ සාමාන්‍ය කාර්ය සාධන ලකුණු 1,151 දක්වා ඉහළ නංවා ගෙන ඇති අතර ලබන සතියේ දී ශ්‍රේණිගත කිරීම යාවත්කාලීන කිරීමෙන් පසු ඔහු ශ්‍රේණිගත කිරීම්වල 40 වැනි ස්ථානයට පත්වීමට නියමිත‍යි.

සඳරුවන් තරගය ජය ගැනීමට සමත් වූ නමුත් මෙම තරගාවලිය ‘F’ ශ්‍රේණියේ තරගාවලියක් වූ බැවින් ඔහුට පළමු ස්ථානය සඳහා ලැබෙන්නේ ලකුණු 15ක් පමණයි.

‘Road to Oregon’ ශ්‍රේණිගත කිරීම් යනු ජූලි 15 සිට 24 දක්වා ඇමරිකා එක්සත් ජනපදයේ පැවැත්වීමට නියමිත 2022 ලෝක මලල ක්‍රීඩා ශූරතාවලිය සඳහා සුදුස්සන් තොරාගැනීම සඳහා ලෝක මලල ක්‍රීඩා සංගමය විසින් පවත්වා ගෙන යනු ලබන ලැයිස්තුවකි.

>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<