මෙවර IPL තරගාවලිය ක්‍රීඩාංගණ 5ක දී

205

2021 ඉන්දීය ප්‍රිමියර් ලීග් තරගාවලිය එළඹෙන අප්‍රේල් මාසයේ දී ආරම්භ වීමට නියමිතව තිබෙනවා.

පසුගිය වසරේ දී ඇතිවූ කොරෝනා වසංගත තත්ත්වය නිසා ඉන්දීය ප්‍රිමියර් ලීග් තරගාවලිය ඉන්දියාව තුල නොපැවැත්වීමට ඉන්දීය ක්‍රිකට් ආයතනය තීරණය කළා. ඒ අනුව තරගාවලිය දැඩි සෞඛ්‍යාරක්ෂිත විධිවිධාන යටතේ එක්සත් අරාබි එමීර් රාජ්‍යයේ දී පැවැත්වුනා. 

කෙසේ වෙතත් ජාත්‍යන්තර ක්‍රිකට් තරග සාමාන්‍ය පරිදි පැවැත්වීමට ආරම්භ වන අවස්ථාවක ඉන්දීය ප්‍රිමියර් ලීග් තරගාවලිය ඉන්දියාව තුල පැවැත්වීමට එරට ක්‍රිකට් ආයතනය සැලසුම් කර තිබෙනවා. ඒ සඳහා තෝරාගනු ලබන ක්‍රීඩාංගණ පිළිබඳව ක්‍රිකට් ආයතනය සහ තරගාවලි සංවිධායකයන් මේ වන විට දීර්ඝ ලෙස සාකච්ඡා කරමින් සිටිනවා.

පසුගිය 26 වැනිදා ඉන්දීය ක්‍රිකට් ආයතනය, තරගාවලි සංවිධායකයන් සහ කණ්ඩායම්වල කළමනාකරුවන් සමඟින් සිදු කළ සාකච්ඡාවකින් අනතුරුව තරගාවලිය පැවැත්වීමට සුදුසු ක්‍රීඩාංගණ 5ක් පිළිබඳව අවධානය යොමු කර තිබෙනවා. ඒ චෙන්නායි, කොල්කටා, අහමදාබාද්, බැංගලෝර් සහ දිල්ලි ක්‍රීඩාංගණයි. ඉන්දීය ප්‍රිමියර් ලීග් තරගාවලියේ ප්‍රධාන ක්‍රීඩාංගණයක් ලෙස සැලකෙන මුම්බායි ක්‍රීඩාංගණය පිළිබඳව මෙතෙක් අවසන් තීරණයක් ගෙන නොමැති බවත් වාර්තා වනවා.

මුම්බායි ක්‍රීඩාංගණය යොදාගැනීම පිළිබඳව ඉන්දීය ක්‍රිකට් ආයතනය සහ මහාරාශ්ට ප්‍රාන්ත ආණ්ඩුව සාකච්ඡා කරමින් සිටිනවා. මෙම ක්‍රීඩාංගණ තෝරාගැනීම සඳහා එක් එක් ප්‍රාන්තවල පවතින කොරෝනා වයිරස් තත්ත්වය පිළිබඳව පූර්ණ අධීක්ෂණයක් සිදු කරන අතර අදාළ ප්‍රාන්තවල සෞඛ්‍ය අංශ සහ ආණ්ඩුවල අවසරය ද හිමි විය යුතු වනවා. 

මේ වන විට ඉන්දියාව තුල කොරෝනා වයිරසයේ දෙවන රැල්ලක් ඇතිව තිබෙන අතර මේ නිසා ප්‍රාන්ත ආණ්ඩු කීපයක් තරගාවලිය සඳහා සත්කාරකත්වය සැපයීම ප්‍රතික්ෂේප කර ඇති බවත් වාර්තා වනවා.

“මුම්බායි ක්‍රීඩාංගණය ගැන අපි තවමත් අවසන් තීරණයක් ගෙන නැහැ. මහාරාශ්ට ප්‍රාන්තයේ ප්‍රධානියා වන Uddhav Thackeray එක්ක අපි මේ ගැන සාකච්ඡා කරමින් ඉන්නවා. ඔවුන් තවමත් අපිට නිල අවසරය ලබා දුන්නේ නැහැ” ඉන්දීය ප්‍රිමියර් ලීග් තරගාවලියේ අභ්‍යන්තර ආරංචි මාර්ග පවසා සිටි බව Cricbuzz වෙබ් අඩවිය වාර්තා කළා.

තවත් ක්‍රිකට් පුවත්: 

ඉන්දියාව තුල මේ වන විට පැතිර යන කොරෝනා වයිරසයේ දෙවන රැල්ලෙන් දැඩි බලපෑමක් එල්ල වී ඇත්තේ මහාරාශ්ට ප්‍රාන්තයටයි. පසුගිය 25 වැනිදා එම ප්‍රාන්තයෙන් රෝගීන් 8700කට ආසන්න ප්‍රමාණයක් වාර්තා වුනා. 

මෙම තත්ත්වය ඇතිවීමට පෙර ඉන්දීය ප්‍රිමියර් ලීග් තරගාවලිය සම්පූර්ණයෙන්ම මුම්බායි හි පැවැත්වීමට ඉන්දීය ක්‍රිකට් ආයතනය සැලසුම් කර තිබුණා. 

Cricbuzz වෙබ් අඩවිය මේ පිළිබඳව සවිස්තරාත්මක වාර්තාවක් සපයා තිබූ අතර ඔවුන් පවසා සිටියේ මෙවර තරගාවලිය cluster-caravan ආකාරයට පැවැත්වීමට සැලසුම් කර ඇති බවයි. එහි දී තරගාවලිය සඳහා සහභාගී වන කණ්ඩායම් කොටස් දෙකකට බෙදා එක් එක් කොටසෙහි තරග වෙනම ක්‍රීඩාංගණ දෙකක පවත්වා අවසන් කිරීමට නියමිතයි. ඉන් අනතුරුව කණ්ඩායම් නැවතත් මිශ්‍ර කර සෙසු තරග වෙනම ක්‍රීඩාංගණ දෙකක දී පැවැත්වීමට නියමිතයි. 

මෙලෙස නම් කළ ක්‍රීඩාංගණ අතරට ලක්නම් ක්‍රීඩාංගණය ද එක්වීමේ වැඩි අවස්ථාවක් පවතින බව ඉන්දීය ක්‍රිකට් ආයතනයේ අභ්‍යන්තර ආරංචි මාර්ග පවසා සිටියා. ඉන්දීය ක්‍රිකට් ආයතනයේ උප සභාපති Rajeev Shukla ඒ සඳහා දැඩි ප්‍රයත්නයක් ගන්නා බව ද වාර්තා වනවා. මේ පිළිබඳව අවසන් තීරණය ඉදිරි දින කීපය තුල ගැනීමට නියමිතයි.

මේ අතර කොල්කටා ප්‍රාන්ත ආණ්ඩුව සිය නිල මැතිවරණය ඉදිරි මාස දෙක තුල පවත්වන බව නිවේදනය කර තිබුණා. ඒ අනුව බටහිර බෙංගාලයේ මැතිවරණය මාර්තු 27 වැනිදා සිට අප්‍රේල් 29 වැනිදා දක්වා කොටස් වශයෙන් පැවැත්වීමට නියමිතව තිබෙනවා. ඡන්ද ගණන් කිරීමේ කටයුතු මැයි මස 2 වැනිදා පැවැත්වීමට නියමිතයි.

මේ පිළිබඳව ද ඉන්දීය ක්‍රිකට් ආයතනයේ අවධානය යොමුවී තිබෙනවා. ඒ සම්බන්ධයෙන් අදහස් දක්වමින් ඉන්දීය ක්‍රිකට් ආයතනයේ ප්‍රකාශකයෙකු පවසා සිටියේ 2019 වසරේ දී ඉන්දීය මහමැතිවරණය අතරතුර ද ඉන්දීය ප්‍රිමියර් ලීග් තරගාවලිය පැවැත්වුණු නිසා මෙම මැතිවරණය එතරම් බලපෑමක් නොවන බවයි.

තවද මෙවර ඉන්දීය ප්‍රිමියර් ලීග් තරගාවලිය සඳහා ප්‍රේක්ෂකයන්ට සහභාගී වීමට අවස්ථාව ලබා දීම කෙරෙහි ඉන්දීය ක්‍රිකට් ආයතනයේ අවධානය යොමුවී තිබෙනවා. මේ දිනවල පැවැත්වෙන ඉන්දීය එංගලන්ත ටෙස්ට් තරගාවලිය සඳහා ද සීමිත ප්‍රේක්ෂකයන් සංඛ්‍යාවක් සඳහා සහභාගී වීමට අවසරය හිමිව තිබෙනවා. 

Cricbuzz ඇසුරිනි 

>> තවත් ක්‍රිකට් පුවත් සඳහා පිවිසෙන්න <<