තහනම් උත්තේජක පරීක්ෂාවන් මගහැරීම සහ නිවැරදි තොරතුරු ලබා නොදීම නිසාවෙන් දුර පැනීමේ ඉසව්වේ ලෝක ශූර Luvo Manyonga හට තාවකාලික තරග තහනමක් පැනවීමට මලල ක්‍රීඩා දූෂණ විරෝධී ඒකකය කටයුතු කර ඇත.
පසුගිය මාස 12ක කාලවකවානුව අතරතුර දී අහඹු තහනම් උත්තේජක පරීක්ෂාවන් තුනක් මගහැරීම නිසාවෙන් ඔහුට මෙම තහනම පැනවීමට එම බලධාරීන් කටයුතු කර තිබුණි.
එය සම්බන්ධයෙන් සිදු කරන ඉදිරි පරීක්ෂණවල දී යම් හෙයකින් Luvo Manyonga වැරදිකරු බව තහවුරු වුවහොත් ඔහුට බොහෝ විට වසර දෙකක තරග තහනමකට යටත් වීමට සිදුවන නිසාවෙන් මෙම වසරේ ගිම්හාන ඔලිම්පික් උළෙල සඳහා සහභාගි වීමේ අවස්ථාව ද අහිමි වීමට වැඩි ඉඩක් පවතී.
තමන්ට හිමි වූ තහනම පිළිබඳව අදහස් පළකරමින් Luvo Manyonga ප්‍රකාශ කර තිබුණේ තමන් කිසිදු වංචාවක් සිදු කර නොමැති බවත්, එම තහනම පිළිබඳව තමන්ට දැනුම් දීමට කරුණු රැසක් පවතින බවයි.
දකුණු අප්‍රිකාව නියෝජනය කරමින් ක්‍රීඩා පිටියට පිවිසි Luvo Manyonga වයස අවුරුදු 19 දී යොවුන් ලෝක ශූරයා වීමට සමත් වූ අතර එයින් වසරකට පසුව ලොව හොඳම දුර පැනීමේ ක්‍රීඩකයන් පස්දෙනා අතරට පැමිණීමට ද ඔහුට හැකි විය.
තවත් මලල ක්‍රීඩා පුවත්:
- ඩිල්ෂි, නිමාලි සහ ගයන්තිකා ආසියාවේ පෙරමුණට
- සාරංගි වාර්තාවක් බිඳ දමද්දී 200M කිරුළ කාලිංගට
- නදීෂා සහ කාලිංගගේ දස්කම් සමඟින් ජාතික සැණකෙළිය නිමයි
නමුත් 2012 වසරේ දී ඔහු crystal meth නම් මත්ද්‍රව්‍ය භාවිතා කර ඇති බවට හෙළි වීම නිසාවෙන් මාස 18ක තරග තහනමක් හිමි වූ අතර ඉන් පසුව ද දැඩි ලෙස එම මත්ද්‍රව්‍ය භාවිතා කිරීමට ඇබ්බැහි වූ ඔහු වසර කිහිපයක් ක්‍රීඩා පිටියෙන් ඉවත්ව සිටියා.
පසුව 2016 වසරේ දී නැවතත් මලල ක්‍රීඩා පිටියට පැමිණි ඔහු 2016 රියෝ ඔලිම්පික් උළෙලේ දී දුර පැනීම ඉසව්වෙහි රිදී පදක්කම දිනා ගැනීමට සමත් වූ අතර ඔහු 2017 සහ 2018 වසරේ දී දුර පැනීම ඉසව්වේ ලෝක ශූරතාව දිනා ගැනීමට ද සමත් විය.
මෙම වසරේ ඔලිම්පික් උළෙලේ දී දුර පැනීමේ රන් පදක්කම Luvo Manyonga විසින් දිනා ගැනීමට වැඩි ඉඩකඩක් පැවතිය නමුත් මෙම තහනමත් සමඟින් ඔහු හට බොහෝ විට ඔලිම්පික් සහභාගීත්වය අහිමි වනු ඇත.
මෙලෙස අහඹු තහනම් උත්තේජක පරීක්ෂාවන් මගහැරීම නිසාවෙන් පසුගිය වසර කිහිපයේ දී ක්‍රීඩක ක්‍රීඩිකාවන් රැසකට තරග තහනම් පැනවීමට බලධාරීන් කටයුතු කළ අතර මීටර් 100 ලෝක ශූර Christian Coleman හට ද වසර දෙකක තහනමක් හිමි විය.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
