පාපන්දු ඉතිහාසයේ වැඩිම රතු කාඩ්පත් ලාභියෝ

477
Players with the Most Red Cards in Football

ලොව ජනප්‍රියතම ක්‍රීඩාව ලෙස සැලකෙන පාපන්දු ක්‍රීඩාවේ මේ වන විට වැඩිම රතු කාඩ්පත් ප්‍රමාණයක් ලබා ඇති ක්‍රීඩකයින් 10 දෙනා පිළිබඳව ගවේෂණයක් කිරීමට ThePapare.com අපි තීරණය කළෙමු. 

පාපන්දු ක්‍රීඩාවේ ඇති දහස් සංඛ්‍යාත වාර්තා අතරින් ක්‍රීඩකයින් තම නාමය ඉදිරියේ සටහන් කරගැනීමට කිසිසේත්ම බලාපොරොත්තු නොවන සහ අකැමැතිම වාර්තාවක් ලෙස වැඩිම රතු කාඩ්පත් ලාභී ක්‍රීඩකයින්ගේ වාර්තා ලැයිස්තුව හඳුනාගත හැක. 

තරගයක් තුළ ක්‍රීඩකයින් වෙත රතු කාඩ්පත් නිකුත් වීම කහ කාඩ්පත් නිකුත් තරම් ම සුලබව දැකගත හැකි දෙයක් නොවුනත්, විශේෂයෙන් center-back ක්‍රීඩකයින්ගේ සමස්ත ක්‍රීඩා දිවිය තුළම ඔවුන්ගේ නාමය ඉදිරියේ රතු කාඩ්පත් කිහිපයක් සටහන්ව තිබීම බොහෝ දුරට පාපන්දු ක්‍රීඩාව තුළ සාමාන්‍යයෙන් දැකගත හැකි සංසිද්ධියකි.  

පාපන්දු ක්‍රීඩාවේ දී ක්‍රීඩකයින් සිදු කරනු ලබන බරපතළ නීති රීති කඩකිරීම් වෙනුවෙන් ඔවුන් හට රතු කාඩ්පත් නිකුත් වීම සිදු වනු ලබන අතර ඒ ආකාරයට රතු කාඩ්පතක් ලැබූ ක්‍රීඩකයෙකු හට වහාම පිටියෙන් ඉවත්ව යාමට සිදු වේ. එම ක්‍රීඩකයා නියෝජනය කරන කණ්ඩායමට ඔහු වෙනුවට එහි දී වෙනත් ක්‍රීඩකයෙකු ආදේශ කිරීමට අවස්ථාවක් නොලැබෙන අතර ඒ අනුව එම තරගයේ ඉතිරි කාලය ක්‍රීඩකයින් 10 දෙනෙකුගෙන් පමණක් ක්‍රීඩා කිරීමට සිදු වේ. තවදුරටත් එම ක්‍රීඩකයා හට සිය කණ්ඩායමේ මීළඟ තරගය සඳහා ද තහනමක් පනවනු ලැබේ.

ක්‍රීඩකයෙකු හට එක් තරගයක් තුළ කහ කාඩ්පත් ද්විත්වයක් නිකුත් වීමෙන් එය රතු කාඩ්පතක් බවට පරිවර්තනය වීම, ගෝල රාමුව දෙසට යොමු කළ පන්දුවක් අතින් නවතාලීම, නීති විරෝධී ලෙස ප්‍රතිවාදී ක්‍රීඩකයෙකු හමුවේ දරුණු tackle කිරීමක් සිදු කිරීම සහ ක්‍රීඩාංගණ තුළ ඇතිවන ප්‍රබල ගණයේ ගැටුම් වැනි අවස්ථාවන් හා සිදුවීම්වලට පාපන්දු ක්‍රීඩාව තුළ රතු කාඩ්පත් නිකුත් විය හැකි අවස්ථා අතර ප්‍රමුඛ ස්ථානය හිමිවේ. 

ඒ අනුව ඉහත සිදුවීම් ද ඇතුළුව වෙනත් නීති රීති කඩකිරීම් හේතුවෙන් පාපන්දු ඉතිහාසය තුළ මේ දක්වා වැඩිම රතු කාඩ්පත් ප්‍රමාණයක් ලබාගෙන ඇති ක්‍රීඩකයින් 10 දෙනා පිළිබඳව කෙරෙන සොයාබැලීමකි මේ. 

  1. Vinnie Jones

    Vinnie Jones
    Vinnie Jones විනිසුරුවරයෙකු සමඟ වාද කරමින් (ඡායාරූපය: bleacherreport.com)

Vinnie Jones යන නම ඇසූ පමණින් ඕනෑම අයෙකුගේ සිහියට එන්නේ ක්‍රියාදාම චිත්‍රපටවලට රංගනයෙන් දායකත්වය ලබා දෙන දක්‍ෂ රංගන ශිල්පියා බවට කිසිදු සැකයක් නැහැ. කෙසේ නමුත් ඔහු සිය රංගන දිවිය ආරම්භ කිරීමට පෙර වෘත්තීය පාපන්දු ක්‍රීඩකයෙකු ලෙස ද කටයුතු කළ බව බොහෝ දෙනෙකු නොදන්නා කරුණකි. 

1984 සිට 1999 දක්වා වසර 15ක් පුරාවට එංගලන්තයේ Wimbledon Leeds United සහ Chelsea ඇතුළු තවත් පාපන්දු සමාජ කිහිපයක්ම මෙන්ම තරග 9ක් සඳහා වේල්සයේ ජාතික පාපන්දු කණ්ඩායම ද මැදපෙළ ක්‍රීඩකයෙකු ලෙස නියෝජනය කරනු ලැබූ Jones සිය ක්‍රීඩා දිවිය තුළ නමක් දිනා ගත්තේ ක්‍රීඩා පිටිය තුළ ඉතා දරුණු ක්‍රීඩකයෙකු ලෙසයි.

ඔහුගේ දරුණු ක්‍රීඩා විලාශය වෙනුවෙන් තරග 446ක් පුරාවට දිවුණු ඔහුගේ වෘත්තීය පාපන්දු දිවිය තුළ ඔහුට සමස්ත රතු කාඩ්පත් 12ක ප්‍රමාණයක් නිකුත්ව තිබීමත් සමඟ පාපන්දු ක්‍රීඩාව තුළ වැඩිම රතු කාඩ්පත් ලාභීන්ගේ ලැයිස්තුවේ 10 වැනි ස්ථානය ඔහුට හිමිව ඇත. 

  1. Mauricio Pochettino

    Mauricio Pochettino
    Mauricio Pochettino (ඡායාරූපය: espn.in)

Mauricio Pochettino විසින් පුහුණුකරුවෙකු ලෙස එංගලන්තයේ Tottenham Hotspur පාපන්දු සමාජය සාමාන්‍ය කණ්ඩායමක සිට ඉතා ප්‍රබල කණ්ඩායමක් දක්වා ඔසවා තැබීමට සමත් වීමත් සමඟ ඔහු මේ වන විට ඉතා දක්‍ෂ පුහුණුකරුවෙකු ලෙස ප්‍රසිද්ධියට පත්ව සිටියත් ඊට පෙර ඔහු දක්‍ෂ centre-back ක්‍රීඩකයෙකු ලෙස පාපන්දු ක්‍රීඩාවේ නිරතව ඇත. 

ඒ අනුව ඔහු ස්පාඤ්ඤයේ Espanyol සහ ප්‍රංශයේ Paris Saint-Germain ඇතුළු තවත් පාපන්දු සමාජ කිහිපයක් සහ ඒ අතරතුර ආජන්ටිනා ජාතික පාපන්දු කණ්ඩායම ද සිය වෘත්තීය පාපන්දු දිවිය තුළ නියෝජනය කර ඇත. 

Centre-back ක්‍රීඩකයෙකු ලෙස ක්‍රීඩා කිරීම හේතුවෙන් රතු කාඩ්පත් ලබා ගැනීමට සිදුවීම සාමාන්‍ය දෙයක් වුවත් Pochettino හට ඔහුගේ දරුණු ක්‍රීඩා විලාශය සහ ඔහුගේ ප්‍රබල tackle කිරීම් හේතුවෙන් ඔහු ක්‍රීඩා කරනු ලැබූ සමස්ත තරග 529 තුළ රතු කාඩ්පත් 13ක ප්‍රමාණයක් ලැබී ඇති අතර ඒ අනුව ඔහු වැඩිම රතු කාඩ්පත් ලාභීන්ගේ ලැයිස්තුවේ 9 වැනි ස්ථානය හිමිකරගෙන සිටී. 

  1. Felipe Melo

    Felipe Melo
    Felipe Melo (ඡායාරූපය: imdb.com)

මෙම ලැයිස්තුවේ 8 වැනි ස්ථානය හිමිකරගෙන සිටින defensive midfielder ක්‍රීඩක Felipe Melo තවමත් වෘත්තීය පාපන්දු ක්‍රීඩාවේ නියැලෙමින් සිටින ක්‍රීඩකයෙකු වන අතර ඔහු මේ දක්වා ඉතාලියේ Fiorentina, Juventus, Inter Milan සහ තුර්කියේ Galatasaray ඇතුළු පාපන්දු සමාජ රැසක් මෙන්ම බ්‍රසීල ජාතික කණ්ඩායම ද නියෝජනය කර ඇති අතර ඔහු මේ වන විට බ්‍රසීලයේ Palmeiras පාපන්දු සමාජය වෙනුවෙන් ක්‍රීඩා කරමින් සිටී. 

ප්‍රබල tackle කිරීම් ද ඇතුළුව ක්‍රීඩා පිටිය තුළ ඔහු දියත් කරනු ලබන ආක්‍රමණශීලී සහ දරුණු ක්‍රීඩා විලාශය හේතුවෙන් Pitbull සහ Gladiator වැනි අන්වර්ථ නාමවලින් හඳුන්වනු ලබන ඔහු සිය පාපන්දු දිවිය තුළ මේ දක්වා ක්‍රීඩා කර ඇති සමස්ත තරග 526 තුළ හිමිකරගෙන ඇති රතු කාඩ්පත් සංඛ්‍යාව 14කි. 

  1. Yannick Cahuzac

    Yannick Cahuzac
    Yannick Cahuzac හට විනිසුරුවරයා රතු කාඩ්පතක් නිකුත් කරමින් (ඡායාරූපය: fr.besoccer.com)

ප්‍රංශයේ Bastia සහ Toulouse පාපන්දු සමාජ නියෝජනය කර මේ වන විට Lens කණ්ඩායම සහ එරටම Corsica දූපතේ නිල නොවන ජාතික පාපන්දු කණ්ඩායම නියෝජනය කරමින් සිටින Yannick Cahuzac ද ක්‍රීඩා කරනු ලබන්නේ defensive midfielder ක්‍රීඩකයෙකු ලෙසයි. 

තවත් ශක්තිමත් සහ දරුණු ක්‍රීඩකයෙකු ලෙස නම් දරා සිටින ඔහු මේ දක්වා ක්‍රීඩා කර ඇති සමස්ත තරග 376 තුළ රතු කාඩ්පත් 17ක් තම නම ඉදිරියේ සටහන් කරගනිමින් මෙම පාපන්දු ක්‍රීඩා ඉතිහාසය තුළ වැඩිම රතු කාඩ්පත් ලාභීන්ගේ ලැයිස්තුවේ 7 වැනි ස්ථානයට පත්ව සිටී. 

  1. Pablo Alfaro

    Pablo Alfaro
    Pablo Alfaro (ඡායාරූපය: as.com)

ස්පාඤ්ඤයේ Zaragoza, Barcelona, Racing Santander, Merida සහ Sevilla ඇතුළු එරටම තවත් පාපන්දු සමාජ කිහිපයක් මෙන්ම එරට Aragon ජාතික පාපන්දු කණ්ඩායම ද නියෝජනය කර ඇති centre-back ක්‍රීඩකයෙකු වූ Pablo Alfaro මේ වන විට ස්පාඤ්ඤයේම UD Ibiza පාපන්දු සමාජයේ ප්‍රධාන පුහුණුකරු ලෙස කටයුතු කරමින් සිටී. 

සමස්ත තරග 596ක් පුරාවට දිවුණු තම වෘත්තීය පාපන්දු දිවිය තුළ දරුණු ක්‍රීඩකයෙකු ලෙස නමක් දිනා සිටි ඔහු එහි දී හිමිකරගත් මුළු රතු කාඩ්පත් සංඛ්‍යාව 18කි. 

  1. Paolo Montero

    Paolo Montero
    Paolo Montero (ඡායාරූපය: gianlucadimarzio.com)

උරුගුවේ ජාතික කණ්ඩායම මෙන්ම ඉතාලියේ Atalanta සහ Juventus ඇතුළු තවත් පාපන්දු සමාජ කිහිපයක්ම නියෝජනය කර ඇති නම්‍යශීලී ක්‍රීඩකයෙකු ලෙස සැලකෙන Paolo Montero සිය පාපන්දු දිවිය තුළ centre-back සහ left-back ස්ථාන ද්විත්වයේම ක්‍රීඩා කර ඇති නමුත් එහි දී ඔහු කැපී පෙනෙනම දස්කම් දක්වන්නට සමත් වූයේ centre-back ස්ථානයේ ක්‍රීඩා කරමිනි. 

ඒ අනුව ඔහු එම ස්ථානයේ ක්‍රීඩා කරමින් දැක්වූ ඉහළ දක්‍ෂතා වෙනුවෙන් ඔහු ක්‍රීඩා කළ කාල වකවානුව තුළ සිටි දක්‍ෂතම centre-back ක්‍රීඩකයෙකු මෙන්ම Juventus ඉතිහාසය තුළ ඔවුන් වෙනුවෙන් ක්‍රීඩා කළ විශිෂ්ටතම centre-back ක්‍රීඩකයෙකු ලෙස ද ඔහුව බොහෝ පාපන්දු විශේෂඥයින් විසින් හඳුන්වනු ලබයි. 

කෙසේ නමුත් ඔහුගේ දැඩි ආක්‍රමණශීලී සහ ප්‍රබල tackle කිරීමේ ක්‍රීඩා විලාශය හේතුවෙන් තරමක් විවේචනයට ලක්ව සිටි ඔහු සිය පාපන්දු දිවියේ සමස්ත තරග 454ක් තුළ රතු කාඩ්පත් 21කට හිමිකම් කියමින් මෙම ලැයිස්තුවේ 5 වැනි ස්ථානයට පත්ව ඇත්තේ ඒ අතරින් රතු කාඩ්පත් 16ක් ඉතාලියේ Serie A ලීග් තරගාවලිය තුළ වාර්තා වීමත් සමඟ එම තරගාවලි ඉතිහාසය තුළ වැඩිම රතු කාඩ්පත් ලාභී ක්‍රීඩකයාට හිමි වාර්තාවට ද හිමිකම් කියමිනි. 

  1. Alexis Delgado

    Alexis Delgado ප්‍රතිවාදී ක්‍රීඩකයෙකු හමුවේ tackle කිරීමක් සිදුකරමින් (ඡායාරූපය: gettyimages.fi)

මේ වන විට ස්පාඤ්ඤයේ Racing Santander පාපන්දු සමාජය නියෝජනය කරමින් ක්‍රීඩා කරනු ලබන 35 හැවිරිදි centre-back ක්‍රීඩක Alexis Delgado ඊට පෙර එරටම Malaga, Valencia, Sevilla, Getafe ඇතුළු තවත් කණ්ඩායම් කිහිපයක්ම නියෝජනය කරමින් මේ වන විට සමස්ත තරග 423කට ක්‍රීඩා කර ඇත. 

සිය පාපන්දු දිවිය පුරාවට ඉක්මනින්ම කෝපයට පත්වන ක්‍රීඩකයෙකු ලෙස නම් දරා සිටින ඔහු සමස්ත රතු කාඩ්පත් 22ක් හිමිකරගෙන සිටින්නේ මෙම ලැයිස්තුවේ 4 වැනි ස්ථානයට පත්වෙමිනි. 

  1. Sergio Ramos

    Sergio Ramos
    Sergio Ramos හට විනිසුරුවරයා රතු කාඩ්පතක් නිකුත් කරමින් (ඡායාරූපය: indiatimes.com)

මෙම ලැයිස්තුවේ සිටින ප්‍රසිද්ධම ක්‍රීඩකයා ලෙස හඳුන්වා දිය හැකි ස්පාඤ්ඤ ජාතික කණ්ඩායමේ මෙන්ම එරටම ප්‍රබල Real Madrid පාපන්දු සමාජයේ වත්මන් නායක ලෝක ශූර Sergio Ramos මුළු පාපන්දු ක්‍රීඩා ඉතිහාසය තුළම බිහි වූ විශිෂ්ටතම centre-back ක්‍රීඩකයෙකු ලෙස මේ වන විට නම් දරා සිටී. 

සිය පාපන්දු දිවිය තුළ සමස්ත තරග 691කට මේ වන විට ක්‍රීඩා කර ඇති ඔහු එහි දී 2010 පාපන්දු ලෝක කුසලානය ද ඇතුළත්ව තවත් ශූරතාවන් රැසක් ජයග්‍රහණය කිරීමට සමත්ව ඇත. 

ක්‍රීඩා පිටිය තුළ දැඩි ආක්‍රමණශීලී, ඉතා ප්‍රබල tackle කිරීම් සිදු කරන සහ ඉක්මනින් කෝපයට පත්වන ක්‍රීඩකයෙකු ලෙස ප්‍රසිද්ධියට පත්ව සිටින ඔහු මේ දක්වා සමස්ත රතු කාඩ්පත් 26ක සංඛ්‍යාවකට හිමිකම් කියමින් මෙම ලැයිස්තුවේ 3 වැනි ස්ථානය හිමිකරගෙන සිටී. ඒ අතරින් රතු කාඩ්පත් 20ක් ම වාර්තා වී ඇත්තේ ස්පාඤ්ඤයේ La Liga ලීග් තරගාවලියේ දී වන අතර ඒ අනුව එම තරගාවලි ඉතිහාසයේ වැඩිම රතු කාඩ්පත් ලාභියාට හිමි වාර්තාවට හිමිකම් කියන්නේ ද Ramos වීම විශේෂත්වයකි. 

තවත් කියවන්න;

  1. Cyril Rool

    Cyril Rool
    Cyril Rool (ඡායාරූපය: gettyimages.com)

ප්‍රංශයේ Bastia, Lens සහ Marceille ඇතුළු තවත් පාපන්දු කණ්ඩායම් කිහිපයක්ම නියෝජනය කරනු ලැබූ Cyril Rool වසර 17ක් පුරා දිවුණු සිය පාපන්දු දිවිය තුළ ක්‍රීඩා කරනු ලැබූ සමස්ත තරග සංඛ්‍යාව 366කි. 

එහි දී ඉතා ප්‍රබල tackle කිරීම් සිදු කරනු ලබන දරුණු ක්‍රීඩකයෙකු ලෙස ප්‍රචලිත වූ ඔහු මෙම ලැයිස්තුවේ 2 වැනි ස්ථානයට පත්ව ඇත්තේ සමස්ත රතු කාඩ්පත් 27ක සංඛ්‍යාවකට හිමිකම් කියමිනි. මෙහි දී ඔහු මැදපෙළ ක්‍රීඩකයෙකු ලෙස ක්‍රීඩා කරමින් සාපේක්ෂව අඩු තරග සංඛ්‍යාවක දී මෙවන් ඉහළ රතු කාඩ්පත් ප්‍රමාණයක් හිමිකර ගැනීම කැපී පෙනෙන්නට විය. 

තවත් විශේෂාංග ලිපි;

  1. Gerardo Bedoya

    Gerardo Bedoya
    Gerardo Bedoya හට විනිසුරුවරයා තරගයක් අතරතුර රතු කාඩ්පතක් නිකුත් කරමින් (ඡායාරූපය: colgadosporelfutbol.com)

පාපන්දු ක්‍රීඩා ඉතිහාසය තුළ වැඩිම රතු කාඩ්පත් ලාභියාට හිමි වාර්තාවට හිමිකම් කියන්නේ කොලොම්බියානු ක්‍රීඩක Gerardo Bedoya යි. වසර 20කට අධික කාලයක් වෘත්තීය පාපන්දු ක්‍රීඩාවේ නියැලුණු ඔහු එහි දී කොලොම්බියාවේ Deportivo Cali, Millonarios සහ Santa Fe මෙන්ම ආජන්ටිනාවේ Racing Club ද ඇතුළුව තවත් පාපන්දු සමාජ රැසකට අමතරව එරට ජාතික කණ්ඩායම ද නියෝජනය කරනු ලැබීය. 

Centre-back ක්‍රීඩකයෙකු ලෙස ඔහු ක්‍රීඩා කිරීම ආරම්භ කරනු ලැබුවත් පසුව defensive midfielder ස්ථානයේ ක්‍රීඩා කිරීමට මාරු වූ ඔහු එහි දී ජාතික කණ්ඩායම සහ පාපන්දු සමාජ වෙනුවෙන් සමස්ත තරග 601ක සංඛ්‍යාවක් ක්‍රීඩා කර ඇති අතර ඔහුගේ පාපන්දු දිවිය පුරාවටම ඔහු ඉතා ආක්‍රමණශීලී සහ ආවේගශීලී ක්‍රීඩා විලාශයක් අනුගමනය කිරීමට මෙන්ම ඉතා දරුණු ගණයේ tackle කිරීම් සිදු කිරීමට ද පුරුදුව සිටියේ ය. 

ඔහු කෙතරම් දරුණු ක්‍රීඩකයෙකු ද යත් ඔහුට පසුව ‘The Beast’ යන අන්වර්ථ නාමය පටබැඳෙන්නට වූ අතර තවදුරටත් ඔහුව කණ්ඩායම තුළට ඇතුළත් කිරීම පිළිබඳව ද එකල ප්‍රශ්න නැගෙන්නට විය. ඒ අනුව තම පාපන්දු දිවිය තුළ සමස්ත රතු කාඩ්පත් 46ක විශාල සංඛ්‍යාවක් තම නම ඉදිරියේ සටහන් කරගනිමින් පාපන්දු ඉතිහාසය තුළ වැඩිම රතු කාඩ්පත් ලබාගෙන ඇති ක්‍රීඩකයාට හිමි වාර්තාව ඔහු තමා සතුකරගෙන සිටින අතර එය වෙනත් ක්‍රීඩකයෙකු විසින් බිඳ දැමීම කිසිදිනෙක සිදුනොවනු ඇති බව බොහෝ දෙනාගේ මතය යි.

  >> තවත් විශේෂාංග ලිපි සඳහා පිවිසෙන්න <<