හතුරුසිංහ ආයෙත් බංග්ලාදේශයට?

1351
 

හිටපු ශ්‍රී ලංකා ජාතික ක්‍රිකට් පුහුණුකරු වන චන්දික හතුරුසිංහ මහතා තමන් බංග්ලාදේශ ක්‍රිකට් කණ්ඩායමේ ප්‍රධාන පුහුණුකරු ලෙස නැවතත් එක්වීමට සූදානම් බව පවසා තිබේ. 

ශ්‍රී ලංකා ක්‍රිකට් කණ්ඩායමේ පුහුණුකරු ලෙස මෙරටට පැමිණීමට පෙර හතුරුසිංහ මහතා 2014 සිට 2017 දක්වා බංග්ලාදේශ කණ්ඩායමේ ප්‍රධාන පුහුණුකරු කටයුතු කළේය. ඉන් අනතුරුව 2017 දෙසැම්බර් මාසයේ සිට 2019 ජූලි මාසය දක්වා ඒ මහතා ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු ලෙස කටයුතු කළේය.

බංග්ලාදේශයේ ඩේලි ස්ටාර් සමඟින් සම්මුඛ සාකච්ඡාවකට නිව් සවුත් වේල්ස් සිට එක්වෙමින් ඔහු පවසා සිටියේ බංග්ලාදේශ ක්‍රිකට් මණ්ඩලය විසින් ඉල්ලා සිටියහොත් නැවත කණ්ඩායමේ ප්‍රධාන පුහුණුකරු ලෙස වැඩ භාර ගැනීමට සූදානම් බවයි. 

“බංග්ලාදේශ කණ්ඩායමට මගේ හිතේ වැදගත් ස්ථානයක් තියනවා. මේ නිසා බංග්ලාදේශ කණ්ඩායමේ දියුණුව වගේම ඔවුන්ගේ දක්ෂතා ගැන මම නිතරම සොයා බලනවා.” 

“බංග්ලාදේශ කණ්ඩායමේ පුහුණුකරු විදිහට මම වසර තුනක් කටයුතු කළා. මගේ ඉල්ලා අස්වීම ගැන ක්‍රීඩකයන් හෝ බංග්ලාදේශ ක්‍රිකට් මණ්ඩලයේ නිලධාරීන් වගකියන්න ඕන නැහැ. ඒක මගේ පෞද්ගලික තීරණයක්.” 

“විශේෂයෙන් බංග්ලාදේශ රසිකයන්ට මම ගොඩක් කැමතියි. මට බංග්ලාදේශයේ ක්‍රිකට් ක්‍රීඩාවට කිසිදු සම්බන්ධයක් නැහැ කියන්න බැහැ. බංග්ලාදේශ කණ්ඩායමේ දියුණුව ගැන මම නිතරම නිරීක්ෂණය කරනවා.” 

චන්දික හතුරුසිංහ 2014 වසරේ දී බංග්ලාදේශ කණ්ඩායම සමඟින් එක්වීමෙන් අනතුරුව බංග්ලාදේශ කණ්ඩායම ලෝක ක්‍රිකට් ක්‍රීඩාවේ නොමැකෙන නාමයක් සටහන් කරමින් පෙරමුණට පැමිණීමට සමත් විය. 2014 – 2017 කාලය තුල ලොව ප්‍රබල කණ්ඩායම් කීපයකටම අභියෝග කිරීමට බංග්ලාදේශය සමත් විය. 

2017 වසරේ දී සිය ධුරයෙන් ඉල්ලා අස්වීමෙන් පසුව ඒ පිළිබඳව කටකතා කීපයක් පැතිර ගිය අතර ඉන් කියැවුණේ බංග්ලාදේශ කණ්ඩායමේ ක්‍රීඩකයන් සමඟින් ඇතිවූ යම් මතභේදාත්මක තත්ත්වයක් නිසා ඔහු මෙලෙස ඉවත් වූ බවයි. 

“මට කිසිවෙකු සමඟ පෞද්ගලික න්‍යාය පත්‍රයක් තිබුණේ නැහැ. මට වැදගත් වුනේ බංග්ලාදේශ ජාතික කණ්ඩායම. කවුරුහරි එම කණ්ඩායම වඩා හොඳ දෙයක් කරන්න උත්සාහ කළා නම් මම ඒකට සහය දුන්නා.”

චන්දික හතුරුසිංහ මේ වන විට නිව් සවුත් වේල්ස් ක්‍රිකට් කණ්ඩායමේ පුහුණුකරු ලෙස කටයුතු කරයි. ඔහු මීට පෙර ද එම කණ්ඩායම සමඟ කටයුතු කළේය. 

තවත් ක්‍රිකට් පුවත්

කොරෝනා වයිරසය හමුවේ අවලංගු වුනු ශ්‍රී ලංකා – බංග්ලාදේශ තරගාවලිය නැවත ආරම්භ  බංග්ලාදේශ කණ්ඩායම මෙම මාසයේ දී මෙරටට පැමිණීමට නියමිතය. එහි දී ඔවුන් තරග තුනකින් යුත් ටෙස්ට් තරගාවලියක් සඳහා සහභාගී වනු ඇත. නවසීලන්තයේ හිටපු ක්‍රිකට් ක්‍රීඩක ක්‍රේග් මැක්මිලන් මෙම සංචාරය සඳහා සහභාගී වන බංග්ලාදේශ කණ්ඩායමේ ක්‍රිකට් උපදේශක ලෙස පත් කර තිබේ.

මේ වන විට බංග්ලාදේශයේ පවතින දරුණු කොරෝනා වයිරස් තත්ත්වය නිසාවෙන් එරට ක්‍රිකට් කණ්ඩායමේ ප්‍රධාන පුහුණුකරු වන දකුණු අප්‍රිකානු ජාතික රසල් ඩොමින්ගෝ මෙම ශ්‍රී ලංකා සංචාරය සඳහා සහභාගී වීම අවිනිශ්චිත මට්ටමක පවතී.

ඒ අනුව ශ්‍රී ලංකාවට එරෙහි ටෙස්ට් තරගාවලියේ දී බංග්ලාදේශ කණ්ඩායමේ පුහුණුකරු ලෙස හිටපු ශ්‍රී ලංකා ක්‍රිකට් ක්‍රීඩකයෙකු හා පසුගිය වසරේ වයස අවුරුදු 19න් පහළ ලෝක කුසලානය දිනා ගත් බංග්ලාදේශ කණ්ඩායමේ පුහුණුකරු වන නවීඩ් නවාස් කටයුතු කිරීමේ වැඩි ඉඩක් පවතින බව බංග්ලාදේශ මාධ්‍ය වාර්තා කර තිබුණි.

මේ වන විට බංග්ලාදේශයේ සිටින නවීඩ් නවාස් ශ්‍රී ලංකා සංචාරය සඳහා පමණක් අතුරු පුහුණුකරු ලෙස කටයුතු කරනු ඇත. 

ඕස්ට්‍රේලියාවේ පදිංචිව සිටින නවීඩ් නවාස් පසුගිය අගෝස්තු 29 වැනි දින බංග්ලාදේශයට පැමිණියේ බංග්ලාදේශ ක්‍රිකට් කණ්ඩායමේ පුහුණුකරු ලෙස කටයුතු ආරම්භ කිරීමටය.

චන්දික හතුරුසිංහගේ මෙම ප්‍රකාශය සම්බන්ධයෙන් බංග්ලාදේශ ක්‍රිකට් ආයතනය මෙතෙක් සිය ස්ථාවරය නිල වශයෙන් ප්‍රකාශ කර නොමැත. 

බංග්ලාදේශ කණ්ඩායමේ ශ්‍රී ලංකා සංචාරය එළඹෙන ඔක්තෝබර් මස 24 වැනිදා ආරම්භ වීමට සැලසුම් කර තිබේ. පවතින සෞඛ්‍ය නීති රීති හමුවේ එම තරගාවලිය සඳහා සහභාගී වන බංග්ලාදේශ කණ්ඩායම මෙම මස මෙරටට පැමිණීමට නියමිතය.

>> තවත් ක්‍රිකට් පුවත් සඳහා පිවිසෙන්න <<