මාලිංග 2020 IPL හැරයයි

6285
Mumbai Indians

ශ්‍රී ලංකා විස්සයි විස්ස නායක සහ මුම්බායි ඉන්දියන්ස් කණ්ඩායමේ ප්‍රධානම වේගපන්දු යවන්න වන ලසිත් මාලිංග 2020 ඉන්දීය ප්‍රිමියර් ලීග් තරගාවලිය සඳහා සහභාගී නොවන බව මුම්බායි ඉන්දියන්ස් කණ්ඩායම විසින් අද (02) තහවුරු කරන ලදි.

එම කණ්ඩායම විසින් නිකුත් කළ නිවේදනයකට අනුව ලසිත් මාලිංග සිය පෞද්ගලික හේතුවක් මත මෙවර ඉන්දීය ප්‍රිමියර් ලීග් තරගාවලිය සඳහා සහභාගී නොවන බව නිල වශයෙන් ප්‍රකාශ කර තිබෙන බව දන්වා ඇත. ඒ අනුව මාලිංගගෙන් හිස්වන වේගපන්දු බලඇණියේ ස්ථානය සඳහා ඕස්ට්‍රේලියා වේගපන්දු යවන ක්‍රීඩක ජේම්ස් පැටින්සන් නම් කර තිබේ.

ලසිත් මාලිංග මෙවර ඉන්දීය ප්‍රිමියර් ලීග් තරගාවලියේ මුල් තරග සඳහා සහභාගී නොවන බව මීට සති දෙකකට පෙර මාධ්‍ය විසින් වාර්තා කර තිබුණි.

මුම්බායි ඉන්දියන්ස් කණ්ඩායම මේ වන විට එක්සත් අරාබි එමීර් රාජ්‍යයට පැමිණ සිටින අතර ජේම්ස් පැටින්සන් එම කණ්ඩායම හා එක්වීමට නියමිතය. ජේම්ස් පැටින්සන් මීට පෙර ඉන්දීය ප්‍රිමියර් ලීග් තරගාවලියේ කොල්කටා නයිට් රයිඩර්ස් කණ්ඩායම නියෝජනය කළේය.

2020 ඉන්දීය ප්‍රිමියර් ලීග් තරගාවලිය එළඹෙන සැප්තැම්බර් මස 19 වැනිදා සිට නොවැම්බර් මස 10 වැනිදා දක්වා එක්සත් අරාබි එමීර් රාජ්‍යයේ දී පැවැත්වීමට නියමිතව ඇත.

තවත් ක්‍රිකට් පුවත්

2009 වසරේ සිට මුම්බායි ඉන්දියන්ස් කණ්ඩායම නියෝජනය කළ ලසිත් මාලිංග ඉන්දීය ප්‍රිමියර් ලීග් තරගාවලිය තුල බිහිවූ විශිෂ්ටතම පන්දු යවන්නා ලෙස සැලකේ. ඉන්දීය ප්‍රිමියර් ලීග් තරගාවලිය තුල තරග 122කට ක්‍රීඩා කර ඇති ලසිත් මාලිංග එහි දී ලබාගෙන ඇති කඩුලු සංඛ්‍යාව 170කි.

13 වසරක ඉන්දීය ප්‍රිමියර් ලීග් ඉතිහාසය තුල වඩාත් සාර්ථකම කණ්ඩායමක් වන මුම්බායි ඉන්දියන්ස් කණ්ඩායම සිව් වතාවක් ශූරතාව දිනා ගැනීමට සමත් විය. එම අවස්ථාවල දී ලසිත් මාලිංග ඉටු කළ කාර්‍යභාරය අසමසමය.

>> තවත් ක්‍රිකට් පුවත් සඳහා පිවිසෙන්න <<