ජාතික ක්‍රිකට් තේරීම් කමිටුවේ සභාපති තනතුරෙන් ඉල්ලා අස්වීමට අසන්ත ද මෙල් මහතා තීරණය කර ඇති බවට ThePapare.com වෙත තොරතුරු ලැබී තිබෙනවා. 2018 වසරේ නොවැම්බර් මාසයේ සිට ඔහු ශ්‍රී ලංකා ජාතික ක්‍රිකට් තේරීම් කමිටුවේ සභාපති ලෙස කටයුතු කළා.
මේ සතිය මුල දී ශ්‍රී ලංකා ක්‍රිකට් කණ්ඩායම සංචාරක එංගලන්ත කණ්ඩායම හමුවේ ගාලු ජාත්‍යන්තර ක්‍රීඩා පිටියේ දී 2-0ක් ලෙස ටෙස්ට් තරගාවලිය පරාජය වුනා. එම දරුණු පරාජයත් සමඟ ශ්‍රී ලංකාවේ ක්‍රිකට් ක්‍රීඩාවට වෙනසක් අවශ්‍ය බවට බොහෝ අදහස් පළ වුනා.
61 හැවිරිදි හිටපු ශ්‍රී ලංකා වේගපන්දු යවන්නෙක් වන අසන්ත ද මෙල් මහතා එංගලන්ත තරගාවලියෙන් පසුව ශ්‍රී ලංකා කණ්ඩායමේ කළමනාකරු ධුරයෙන් ද ඉවත් වුනා. ඔහුගෙන් හිස් වූ කළමනාකරු ධුරයට ජෙරොම් ජයරත්න මහතා තාවකාලිකව පත් කෙරුණා.
තවත් ක්‍රිකට් පුවත්:
- නව ක්‍රිකට් කළමනාකරු අසුන ජෙරම් ජයරත්නට
- එංගලන්තයෙන් ශ්‍රී ලංකාවට එක්දින සහ T20 තුනක්
- තරග පාවාදීමක් නිසා UAE ප්‍රබලයන් දෙදෙනෙකුට වැඩ වරදී
ගරු ක්‍රීඩා අමාත්‍ය නාමල් රාජපක්ෂ මහතා ද මෙල් මහතා ප්‍රමුඛ නව ජාතික ක්‍රිකට් තේරීම් කමිටුවට පසුගිය වසරේ නොවැම්බර් මාසයේ දී නැවතත් සිය අනුමැතිය ලබා දුන්නා. අසන්ත ද මෙල් හැරෙන්නට තේරීම් කමිටුවේ අනෙක් සාමාජිකයින් එම තනතුරුවලින් ඉල්ලා අස් වී ඇති බවට තවමත් වාර්තා වෙන්නේ නැහැ.
අසන්ත ද මෙල් මහතා ශ්‍රී ලංකාව වෙනුවෙන් ටෙස්ට් තරග 17ක් සහ එක්දින තරග 57ක් ක්‍රීඩා කර ඇති අතර ඔහු ආකෘති දෙකේම කඩුලු 59 බැගින් දවාගෙන සිටිනවා. එක් ඉනිමක දී කඩුලු පහක් දවා ගත් පළමු ශ්‍රී ලංකා වේගපන්දු යවන්නා ද ඔහුයි.
>> තවත් ක්‍රිකට් පුවත් සඳහා පිවිසෙන්න <<
