කොරෝනා වසංගත තත්වය නිසාවෙන් මෙම වසර තුළ පැවැත්වීමට නොහැකිව කල් දැමූ වයස අවුරුදු 20න් පහළ ලෝක ශූරතා මලල ක්‍රීඩා තරගාවලිය සහ World Athletics Race Walking Team තරගාවලිය සඳහා ඉදිරිපත් කළ නව දිනයන් සඳහා ලෝක මලල ක්‍රීඩා සංගමයේ අනුමැතිය හිමි වී ඇත.
වසරේ අවසන් මැරතන් තරගය පිළිබඳ තවත් ඉඟියක්
ඒ අනුව වයස අවුරුදු 20න් පහළ ලෝක ශූරතාවලිය ලබන වසරේ (2021) අගෝස්තු 17 වැනිදා සිට 21 වැනිදා දක්වා කෙන්යාවේ දී පැවැත්වීමට නියමිතව ඇති අතර මෙම තරගාවලිය සඳහා ලබන වසරේ දෙසැම්බර් 31 වැනිදාට වයස අවුරුදු 16 සිට 19 දක්වා වූ ක්‍රීඩක ක්‍රීඩිකාවන් හට සහභාගි විය හැක.
වයිරස තත්වය නිසාවෙන් කල් දැමූ World Athletics Race Walking Team තරගාවලිය 2022 වසරේ අප්‍රේල් මස 23 සහ 24 දිනයන්හී Belarus හීදී පැවැත්වීමට අවසර හිමිව ඇති අතර එම වසරේම පැවැත්වීමට නියමිතව තිබෙන ලෝක ශූරතා අර්ධ මැරතන් තරගාවලිය ද සතියකින් පසු පසට දමමින් 2022 වසරේ මාර්තු මස 27 වැනිදා පැවැත්වීමට තීරණය කර ඇත.
මෙම නව දිනයන් පිළිබඳව අනුමැතිය ලබා දෙමින් ලෝක මලල ක්‍රීඩා සංගමයේ ප්‍රධානී සෙබස්තියන් කෝ මහතා ප්‍රකාශ කර සිටියේ මෙම පවතින වයිරස තත්වය මත ඉදිරි වසර දෙක තුළ දී ක්‍රීඩා තරග සඳහා දිනයන් ලබා දීම ඉතා අපහසු කටයුත්තක් බවයි.
ඔලිම්පික් සුදුසුකම් ලබා ගැනීමේ කාලයේ වෙනසක්
“මෙම වසංගත තත්වය නිසාවෙන් අපට ඉදිරි වසර දෙකක කාලය සඳහා ක්‍රීඩා තරගාවලි සඳහා දින ලබා දීම/ සැලසුම් කිරීම ඉතා අපහසු දෙයක්, නමුත් ක්‍රීඩක ක්‍රීඩිකාවන්, ක්‍රීඩා සංගම්, සංවිධායකයින් ඇතුළු සියලුම දෙනාට නිශ්චිතභාවයක් ලබා දීමට අප හට අවශ්‍යයි.
ඒ අනුව අප විසින් තෝරා ගත හැකි ළඟම සහ හොඳම දිනයන් තෝරා ගැනීමට අපගේ උපරිමය සිදු කොට ඇති අතර අපගේ ක්‍රීඩක ක්‍රීඩිකාවන්ට ජාත්‍යන්තර පිටියේ දස්කම් දැක්වීමට හොඳම අවස්ථාව අප ලබා දීමට කටයුතු කරනවා” යැයි ඔහු වැඩි දුරටත් ප්‍රකාශ කර සිටියා.
ලොවටම මහත් හිසරදයක් වෙමින් පැතිර යන කොරෝනා වයිරස තත්වය නිසාවෙන් මෙම වසර තුළ පැවැත්වීමට තිබූ ක්‍රීඩා තරගාවලි රැසක් කල් දැමීමට හෝ අවලංගු කිරීමට ඒවායේ සංවිධායකයින් තීරණය කළ අතර ලොව විශාලතම ක්‍රීඩා සැණකෙළිය ලෙස සැලකෙන ගිම්හාන ඔලිම්පික් උළෙල ද ලබන වසර දක්වා කල් දැමීමට තීරණය කරන ලදි.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
