ක්‍රිකට් ලොව වීරයා හැබැහින් දුටු Yuvrajගේ සැබෑ වුනු සිහිනය

516
Yuvraj Singh

ක්‍රිකට් වංශ කතා පොතෙහි ඉන්දීය නාමය ඉහළින් ඔසවා තැබූ ප්‍රතාපවත් චරිත වශයෙන් Sachin Tendulkar, Rahul Dravid සහ Sourav Gangulyගේ නාමයන් නිරන්තරයෙන් සිහිපත් වන්නේ ඔවුන් ක්‍රීඩා පිටියට පමණක් සීමා නොවී ඉන් පිටතදීත් සැබෑ මහත්වරුන් සේ මහත්වරුන්ගේ ක්‍රීඩාවෙහි නියැලුණු නිසාවෙනි. 

2000 වර්ෂයේ පැවති ICC පිළිමළුන් පිටුදැකීමේ තරගාවලිය තම පළමු ජාත්‍යන්තර තරග අත්දැකීම බවට පත් කරගත් Yuvraj Singh ක්‍රමයෙන් සීමිත පන්දුවාර පිටිය ආක්‍රමණය කළ ප්‍රබල ප්‍රවේගකාරී පිතිකරුවෙකු බවට පත්වූයේ ඉහත සඳහන් කළ පුරාවෘත්ත චරිතයන්ගේ නිවැරදි මඟ පෙන්වීම නිසාවෙන් බව අප අවිවාදයෙන්ම පිළිගත යුතු කාරණාවකි.

Mohammed Kaifගේ නායකත්වය යටතේ තරග වැඳුණු යොවුන් ඉන්දීය ක්‍රීඩකයින් වයස අවු.19න් පහළ ලෝක කුසලාන තරගාවලිය ජයග්‍රහණය කළේ එරට ක්‍රිකට් ක්‍රීඩාවේ ප්‍රබල හැරවුම් ලක්ෂයක මූලාරම්භය සනිටුහන් කරමිනි. 

එම කණ්ඩායම නියෝජනය කළ දක්ෂ යොවුන් ක්‍රීඩකයින් කිහිප දෙනෙකුම එවකට ජාතික කණ්ඩායමේ දොරටු විවර කරගත්තේ ඉන්දීය කණ්ඩායමේ ප්‍රබලත්වය තවදුරටත් දෙගුණ තෙගුණ කරමිනි.

තවත් ක්‍රිකට් පුවත්: 

නවකයෙකු ලෙස කණ්ඩායමට ඇතුළත් වූ Yuvraj Singh තමන් කුඩා කළ සිට ඉතාමත් ඕනෑකමින් නැරඹූ ක්‍රිකට් ලොව වීරයින් සමඟ එකම කණ්ඩායමක ක්‍රීඩා කිරීමට ලැබීම සම්බන්ධයෙන් පසුවූයේ වචනවලට පෙරළිය නොහැකි හැකි සතුටකින් බව අමුතුවෙන් කිව යුතු නැත. 

නමුත් දිනක් කණ්ඩායම ගමන් ගන්නා බස් රථයෙහි Sachin Tendulkarගේ ආසනයට යාබද ආසනයෙන් අසුන්ගැනීමට අවස්ථාවක් ලැබුණු විට දී Yuvraj තරමක් තැතිගෙන තිබුණේ එවැනි මොහොතක් උදා වනු ඇතැයි කිසිදිනෙක නොසිතූ නිසාවෙන් බව ඔහු පසුගිය දා පැවති වැඩසටහනකට සහභාගී වෙමින් සඳහන්කොට තිබුණි.

“පොඩි කාලේ ඉඳන් මගේ ක්‍රිකට් ලෝකයේ වීරයාත් එක්ක එකට සෙල්ලම් කරන්න ලැබෙනවා කියන එක ඇත්තටම හීනයක් හැබෑ වුනා වගේ. මම බස් එකට නැග්ගම එක සීට් එකයි ඉතිරි වෙලා තිබ්බේ. එකත් ඔහු ගාවින්මයි. ඊට පස්සේ මම කණ්ඩායමේ කළමණාකාරතුමාගෙන් ඇහුවා මට වෙන තැනක් හොයලා දෙන්න පුළුවන් ද කියලා ඉදගන්න.” 

“ඔහු කෙළින්ම දුන්න උත්තරය වුනේ ‘නැහැ, අද ඉදලා Tendulkar තමා ඔයාගේ කණ්ඩායම් සඟයා. ගිහින් ඔහුත් එක්ක කථා කරන්න.’ මම හිමින් සීරුවේ ගිහින් ඔහු ගාව වාඩි වුනා. ඊට පස්සේ උඩ ඉඳන් පල්ලෙහා වෙනකල් බලලා කල්පනා කළා ‘දෙයියනේ, මේ ඇත්තටම Tendulkar නේද!’ කියලා.”

එම අවස්ථාව තවත් රසබර එකක් බවට පත් කරමින් Tendulkarද සංවාදයක් ආරම්භ කර තිබුණේ මේ අයුරිනි. “ඔය කිට් බෑග් එකේ දාගෙන ඉන්න පිතිකරුවා කවුද? හරිම ලස්සනයි නේ.” එසේ Yuvrajගේ ක්‍රීඩා මල්ලේ සඟවා තිබූ තමාගේ ඡායාරූප දුටු Tendulkar ඔච්චමට මෙන් පවසා තිබුණේ ඔවුන් දෙදෙනා අතර මේ දක්වා පවතින එම සහෝදර බැඳීමට පළමු අඩිතාලම සකසා දෙමිනි.

>> තවත් ක්‍රිකට් පුවත් සඳහා පිවිසෙන්න <<