Sundarට IPL තරග දෙකක් අහිමි වෙයි

ඉන්දීය ප්‍රිමියර් ලීග් තරගාවලිය 2022

658
Washington Sundar

අතේ ඇතිවූ ආබාධයක් නිසාවෙන් Sunrisers Hyderabad කණ්ඩායමේ දඟපන්දු යවන තුන් ඉරියව් ක්‍රීඩක Washington Sundar හට මෙවර ඉන්දීය ප්‍රිමියර් ලීග් තරගාවලියේ ඉදිරි තරග දෙකක් පමණ අහිමි වන බව කණ්ඩායමේ පුහුණුකරු Tom Moody පවසා තිබුණා.

Sunrisers Hyderabad කණ්ඩායමේ ප්‍රධානතම දඟපන්දු යවන්නා වූ Sundar මෙවර තරග වාරයේ පළමු තරගයේ ප්‍රහාරයකට ලක්වූවත් ඉතිරි තරගවල දී හොඳින් පන්දු යැවීමට ඔහුට හැකි වුනා.

ඔහු ඊයේ (11) පැවති තරගයේ දී පළමු පන්දුවාර ත්‍රිත්වය ලකුණු 14ක් පමණක් ලබා දෙමින් අවසන් කළ නමුත් අතේ ඇතිවූ ආබාධයක් නිසා ඔහුට සිය පන්දුවාර 4 නිමා කිරීමට අවස්ථාව හිමි වුනේ නැහැ.

සිය කණ්ඩායමේ ප්‍රධානම දඟපන්දු යවන්නාගේ ආබාධය පිළිබඳව අදහස් දක්වමින් Moody ප්‍රකාශ කළේ,

“Sundarගේ දකුණු අතේ ආබාධයක් ඇතිව තිබෙනවා. අපි ඔහුව ඊළඟ දින දෙක තුන හොඳින් නිරීක්ෂණය කරනවා වගේම විශ්වාස කරනවා එය විශාල ආබාධයක් නොවෙයි කියලා. මට පේන විදියට ආබාධය සුව වෙන්න සතියක පමණ කාලයක් යයි.”

Sundar ආබාධ නිසාවෙන් පසුගිය කාලසීමාවේ දී දැඩි ලෙස පීඩාවට පත්වූ අතර ඔහුට ආබාධ නිසාවෙන් මේ වසරේ බටහිර ඉන්දීය කොදෙව්වන් සමඟ පැවති විස්සයි විස්ස තරගාවලිය ද අහිමි වුනා.

Sundarගේ ආබාධයත් සමඟින් Hyderabad කණ්ඩායමේ දඟපන්දු යැවීමේ බලඇණියේ අනෙක්‍ ක්‍රීඩකයන් වන Shreyas Gopal සහ J Suchith ප්‍රධාන දඟපන්දු යවන්නන් බවට පත්ව තිබෙනවා.

තරගාවලියේ අනෙකුත් කණ්ඩායම් සැලකීමේ දී Hyderabad කණ්ඩායමේ දඟපන්දු යැවීමේ බලඇණිය එතරම් ශක්තිමත් නොවන නමුත්, දකුණු අප්‍රිකානු ක්‍රීඩක Aiden Markram පන්දු යැවීමට හැකි වීම ඔවුන්ට අමතර වාසියකි.

“අපි අපේ හයවැනි පන්දු යවන්නා විදියට Aiden Markram භාවිතා කරනවා. ඔහුට හොඳින් පන්දු යැවිය හැකි. බොහෝ කණ්ඩායම්වල ඉදිරිපෙළ පිතිකරුවන් වමත් ක්‍රීඩකයින් වීම නිසා අපිට offspin පන්දු යවන්නන් දෙන්නෙක් සිටින එක විශාල වාසියක්.

අපි තවමත් තණතීරුවල විශාල දඟ කැවීමක් දක්නට ලැබුණේ නැහැ. ඒත් තරගාවලිය ඉදියට යද්දී තණතීරු දඟපන්දු යවන්නන්ට වාසිදායක වෙයි”, Moody වැඩි දුරටත් ප්‍රකාශ කළා.

තවද එම කණ්ඩායමේ ඉදිරිපෙළ පිතිකරු Rahul Tripathi ද ආබාධයක් නිසාවෙන් පිටියෙන් ඉවත් වනු පසුගිය තරගයේ දී දක්නට ලැබුණා.

Tripathiගේ එම ආබාධ තත්වය පිළිබඳව අදහස් දැක්වූ Moody ප්‍රකාශ කළේ ඔහුගේ ආබාධය සුළු ආබාධයක් බවත්, ඔහුට ඉදිරි තරග ක්‍රීඩා කළ හැකි බවයි.

Sunrisers Hyderabad සහභාගී වන මීළඟ තරගය සිකුරාදා (15) සහ ඉරිදා (17) දිනවල දී පැවැත්වීමට නියමිතයි.

>> තවත් ක්‍රිකට් පුවත් සඳහා පිවිසෙන්න <<