මේසපන්දු ඉතිහාසය වර්ණවත් කළ ක්‍රීඩිකාවන් අතර ‘නුවනි නවෝද්‍යා ගෝනාපීනුවල විතානගේ’ හෙවත් නුවනි නවෝද්‍යාට හිමි වෙන්නේ සුවිශේෂී ස්ථානයක්. SAG පදක්කම්ලාභී නුවනි, මේ වන විට මොරටුව විශ්වවිද්‍යාලයේ තොරතුරු තාක්ෂණ විශේෂ උපාධිය හදාරන්නීය.
නුවනි පාසල් යන්නේ අම්බලන්ගොඩ ධර්මාශෝක විද්‍යාලයට. අක්කත් ඉගෙන ගත්තේ ඒ පාසලේම ඊට වඩා අවුරුදු හයකට ඉහළ පංතියක. අක්කා උද්‍යාමා විතානගේ. නුවනි පාසල් යන්න ගනිද්දී, උද්‍යාමා පාසලේ දක්ෂ මේසපන්දු ක්‍රීඩිකාවක්. ඇය විවිධ තරගවලට කොළඹ, පේරාදෙණිය වගේ තැන්වලට යනවා. අම්මත්, තාත්තත් ඇතැම් තරගවලට යද්දී පුංචි නුවනිත් එක්ක යනවා. මේක පුංචි නුවනිගේ හිතටත් අල්ලලා ගියා. එයාටත් ඕන වුනා මේසපන්දු ගහන්න.
“එතකොට මම පාසල් ගිය මුල්ම අවුරුද්ද. තාත්ත ගිහින් මාව TT ගහන්න බාර දෙනවා. අක්කත් හිටපු නිසා මට ලොකු වාසියක් වෙනවා. මම අක්ක සෙල්ලම් කරන දවසෙත් යනවා. මම සෙල්ලම් කරන දවසෙත් යනවා. පුහුණුවීම් ආව පළමු අවුරුද්දේම මම වයස අවුරුදු 7න් පහළ Tournament එකකට සෙල්ලම් කරනවා. ඒකෙ අනුශූරතාව දිනා ගන්නේ මම. එතැනින් ආ ගමන තමයි මේ” නුවනි ThePapare.com සමග සාකච්ඡාව ආරම්භ කළේ ඒ මතකයන් එළියට ගනිමින්.
නුවනිගේ තාත්තා ඩෙන්ස් විතානගේ. ඒ දවස්වල ව්‍යාපාරික කටයුතුවල නිරත වෙලා හිටියේ. දැන් නම් සංචාරක කටයුතුවලට අදාළව සේවය කරන බවකුයි කිව්වේ. අම්මා අයෝමා මාදුවගේ. ඇය ගෘහණියක්. නුවනිට අක්කට අමතරව අයියා කෙනෙකුත් ඉන්නවා. එයා පසිඳු විතානගේ. පාසල් කාලයේ බැඩ්මින්ටන් ක්‍රීඩාව කළත්, අධ්‍යාපන කටයුතු හේතුවෙන් ක්‍රීඩාව නතර කරනවා.
මේ අයත් එක්ක නුවනි හැඳුනෙ වැඩුනෙ බොහොම කෙළිදෙළෙන් ගත කරන ජීවිතයක්. පවුලේ බඩපිස්සි නිසා අනෙක් දෙන්නට වඩා වැඩි සැලකිල්ලක් මේ ‘පොඩ්ඩිට’ ලැබුණා. නමුත් මුල් කාලයේ ක්‍රීඩාවෙන් දක්ෂතා දැක්වූයේ අක්කා උද්‍යාමා. නුවනි යන්තම් තරගාවලියක අවසන් සිව්දෙනා අතරට එනකොට අක්කා ජාතික ක්‍රීඩා උළෙලේ මේසපන්දු දක්ෂතම ක්‍රීඩිකාව බවටත් පත් වෙනවා. ඒත් අක්කා හිටි ගමන් මේසපන්දු පිටියෙන් ඉවත් වෙනවා.
“අක්කා සාමාන්‍ය පෙළ විභාගය වෙද්දී TTවලින් ඉවත් වුනා. ගොඩාක් දෙනෙක් කිව්වා ඒ දේ කරන්න එපා කියලා. අක්ක සහභාගී වූ හැම Tournament එකකම පළමු දෙතුන් දෙනා අතර හිටියා. ඒ වගේ Talent එකක් තිබෙද්දී තමයි අක්ක TT නතර කළේ. අක්කට අවශ්‍ය වුනේ අධ්‍යාපනය පැත්තට වැඩි දායකත්වය දක්වමින් ඉදිරියට යන්න. ඒ අවස්ථාවල අක්කා කිව්වේ නංගි මගේ දේවල් එක්ක කරයි කියලා. ඇත්තටම අක්කගෙ ආශීර්වාදයත්, අක්කගෙ කැපකිරීමත් නිසා තමයි මට TTවල මේ තරම් ගමනක් එන්න ලැබෙන්නේ.”
අක්කගෙ සමුගැනීමත් සමඟ නුවනි මේසපන්දු පිටියේ කාර්ය බහුල ක්‍රීඩිකාවක් බවට පත් වෙනවා. පාසලේ පුහුණුවීම්වලට අමතරව අක්කගෙන් ඉගෙන ගත් දේවල් ද බොහොමයි, නුවනි පවසනවා. පාසල් මට්ටමේ තරග රාශියක ජයග්‍රහණ ලබා ගන්නා නුවනි, මුලින්ම මේසපන්දු සංචාරයකට එක් වෙන්නේ චීනයේ පැවති තරගාවලියකට. ඒ 2005 අවුරුද්දේ. ඊට පස්සේ නැවත 2008 අවුරුද්දේ ශ්‍රී ලංකා කනිෂ්ඨ මේසපන්දු කණ්ඩායම නියෝජනය කරමින් සිංගප්පූරුවේ පැවති දකුණු ආසියානු කනිෂ්ඨ මේසපන්දු තරගාවලියට සහභාගී වෙනවා. ඒ තරගාවලියේ රිදී පදක්කමක් දිනා ගන්න නුවනි සමත් වෙනවා. ඒ තමයි නුවනිගේ ප්‍රථම ජාත්‍යන්තර පදක්කම.
ඊට පස්සේ එළඹි 2009 වසරේ දී තමයි නුවනි, මුලින්ම ශ්‍රි ලංකා ජ්‍යෙෂ්ඨ මේසපන්දු කණ්ඩායමේ සාමාජිකත්වය ලබා ගන්නේ. 2010 SAG ක්‍රීඩා උළෙලේ රිදි පදක්කම, එම අවුරුද්දේම ඉන්දියාවේ දී පැවති පොදු රාජ්‍ය මණ්ඩලීය ක්‍රීඩා උළෙල සහ සිංගප්පූරුවේ පැවති යොවුන් ඔලිම්පික් උළෙල ද නියෝජනය කිරීමට නුවනි සමත් වෙනවා. ඒ අවුරුද්දේ මයිලෝ වර්ණ ප්‍රදානෝත්සවයේ නැගී එන ක්‍රීඩිකාවට හිමි සම්මානය හිමි වෙන්නේ ද නුවනිට. අනතුරුව 2013 වසරේ පැවැති ලුසෆෝනියා ක්‍රීඩා උළෙලේ දී රිදි පදක්කමක් හිමි කර ගැනීමට ද නුවනි සමත් වෙනවා.
“මේ සංචාර නිසා මම බොහොම කාර්ය බහුල වුනා. මේ නිසා මම 8 වසරේ සිට පාසලේ විභාගවලට සහභාගී වුනේ නැහැ. හැබැයි පාසලෙන් ලොකු Support එකක් දුන්නා. මඟ හැරුණ පාඩම් ගුරුවරු පවා නිවෙසට එව්වා. සමහර පාඩම් වැඩ කටයුතු අක්කත් සමඟ එකතු වෙලා කළා. ලොකුම දේ තමයි ගෙදරින් ලැබුණ නිදහස. ඉගෙන ගැනීම් කටයුතු අඩාල වෙනවා කියලා කවදාවත් පුහුණුවීම් නතර කරන්න කියල ගෙදරින් කිව්වේ නැහැ. හරියට ඔවුන් මාව TTවලට ම අතහැරල දාපු විදිහට හිටියේ. ශ්‍රී ලංකා සංචිතවල සිටියත් මම වැඩි හරියක් පුහුණුවීම් කළේ පාසලේ. කොළඹත් අවා-ගියා. නමුත් වැඩි කැමැත්ත තිබුණෙ පාසලේ පුහුණුවීම්වලට. අපි මිශ්‍ර පාසලක් නිසා මම වැඩි හරියක් පුහුණුවීම් කළේ පිරිමි ළමුන් සමඟ. ඒකත් මගේ දක්ෂතා ඉහළ යන්න හේතුවක් වෙන්න ඇති.”
2014 අවුරුද්දේ පාසලේ දක්ෂතම පාසල් ක්‍රීඩිකාව වුනේ නුවනි. ඒ වගේම ඊට පසු අවුරුද්දේ මේසපන්දු ජාතික ශූරිය ලෙසින් අභිෂේක ලැබීමටත් ඇය සමත් වෙනවා. කෙසේ වෙතත් අධ්‍යාපනයට වඩා ක්‍රීඩාවට මුල් තැන දි දී හිටපු නුවනි එක පාරටම උසස් පෙළ නිසා ක්‍රීඩාවෙන් කෙටි කාලයකට ඉවත් වෙනවා. නුවනිට අවශ්‍ය වෙන්නේ විශ්වවිද්‍යාල ප්‍රවේශය ලබා ගන්න. ඒ තුළ සිටිමින් අධ්‍යාපනයත් ක්‍රීඩාවත් දෙකම එක සේ ගෙන යන්නයි නුවනිගේ ඉලක්කය වී තිබුණේ. ගෙදරින් ඊටත් කිසිම බලපෑමක් එල්ල වුනේ නැහැ. නමුත් සමාජයෙන් නම් එහෙම වුනේ නැහැ.
“අක්කටත් වඩා මට විශාල බලපෑම් එල්ල වුනා ක්‍රීඩාව නතර කරන්න එපා, කරන ගමන් ඉගෙන ගනිමු කියලා. නමුත් මට එහෙම හිතුණෙම නැහැ. අක්කත්, අයියත් අධ්‍යාපනය වෙනුවෙන් විශාල ලෙස මහන්සි වෙනවා. ඒවලින් ජයග්‍රහණ ලබා ගන්නවා. ඉතිං ඒ නිසා මටත් ඒ පැත්තට යන්න හිතෙන්න ඇති.”
නුවනිගේ ඉලක්කය සාර්ථක වෙනවා. ඇය මේ වන විට ද මොරටුව විශ්වවිද්‍යාලයේ තොරතුරු තාක්ෂණ විශේෂ උපාධිය හදාරණවා. ඇයගේ අරමුණ වුනේ වැඩි දුර ඉගෙන ගන්න ගමන් ක්‍රීඩාවේ යෙදීම. ඒ අනුව යමින් ඇය මේ වන විට මොරටුව විශ්වවිද්‍යාලයේ වර්ණලාභී ක්‍රීඩිකාවක්.
විශ්වවිද්‍යාලය නියෝජනය කරමින් 2017 සහ 2019 වසරවල ලෝක විශ්වවිද්‍යාල තරගාවලිය නියෝජනය කිරීමට නුවනි සමත් වෙනවා. ඒ වගේම ලෝක ශූරතා මේසපන්දු තරගාවලියත්, ආසියානු ශූරතා මේසපන්දු තරගාවලියත් නියෝජනය කිරීමට ද නුවනි සමත් වෙනවා.
“ආසියානු මට්ටමේ දී ඉන්දියාව අපිට වඩා ගොඩක් ඉහළින් ඉන්නවා. ඒ වගේම ලෝක මට්ටමෙන් ගත්තත් අපේ කලාපයේ අය තමයි ඉදිරියෙන්ම ඉන්නේ. ඒ නිසා අපිට ඉහළට එන්න විශාල උත්සාහයක් දරන්න වෙනවා. අනෙක් අතට අපට ඉන්දියාව වගේ තැනකට එන්න නම් ජාත්‍යන්තර තරග වැඩි වැඩියෙන් ලැබෙන්න ඕන. නමුත් අපිට එහෙම තරග ලැබෙන්නේ නැහැ. කලාතුරකින් ලැබෙන ජාත්‍යන්තර තරගයක් දෙකකට ගියා කියලා අපේ TT දක්ෂතා ඉහළ යන්නේ නැහැ.
හොඳ පාසල් ක්‍රීඩක ක්‍රීඩිකාවක් 10-12ක් තෝරගෙන ඔවුන්ට ජාත්‍යන්තර මට්ටමේ පහසුකම් සහ වැඩි වැඩියෙන් ජාත්‍යන්තර තරග ලබා දීලා පුහුණුවීම් කරනවා නම් අපිට ආසියාව ජයගන්න අපහසු වෙන එකක් නැහැ. ඒ තරමට දක්ෂ ක්‍රීඩකයන් අප අතර ඉන්නවා. මම ආසියානු තරගාවලියකට ගියේ අන්තිමට 2017 අවුරුද්දේ. ඊට පස්සේ මම ඒවට සහභාගී වුනේ නැත්තේ විශ්වවිද්‍යාලයේ අවසන් වසර දෙක නිසා. ඒක මට වැදගත්. නමුත්, යම්කිසි ඉලක්කයක් දීල කණ්ඩායමක් පුහුණු කරවනවා නම් මම විශ්වාස කරනවා ඔවුන් සියලු දේ අතහැරලා මේ වෙනුවෙන් කැපවෙයි කියලා” නුවනි පවසනවා.
තවත් විශේෂාංග ලිපි:
- දසප්‍රයාමයේ “පුලතිසි වීරයා
- චෝදනාවලට දක්ෂතාවෙන් පිළිතුරු දුන් “කාලිංග”
- මෙරටට වොලිබෝල් වසන්තයක් ගෙනා “කාලික වසන්තප්‍රිය”
- දෛවයට අභියෝග කළ ක්‍රීඩා පිටියේ විශිෂ්ටයන්
- දුලබ ශූරතා 4ක් දිනූ එකම ශ්‍රී ලංකා ක්‍රීඩකයා – සඳුන් විමලසේන
- කෙටිදුරෙන් එතෙර දිනා යගුලියෙන් රට දිනූ “ජෝයි”
නුවනි මේ වන විට ද ශ්‍රී ලංකා මේසපන්දු සංගමයේ ශ්‍රේණිගත කිරීම් අනුව යුගල කාන්තා ඉසව්වේ ඉෂාරා මධුරංගි සමඟ අංක එකේ ස්ථානයේ අවුරුදු 3ක් එක දිගට ඉන්නවා. ඒ වගේම ඒකල කාන්තා ඉසව්වේ පළමු 10 දෙනා අතර රැඳී ඉන්නවා. 2017 වසරේ ශ්‍රී ලංකා විශ්වවිද්‍යාල දක්ෂතම ක්‍රීඩිකාව ලෙසත්, 2018 වසරේ දී ශ්‍රී ලංකා විශ්වවිද්‍යාල මේසපන්දු වර්ණත් දිනා ගැනීමට ඇය සමත් වෙනවා.
“ඒ දවස්වල ලොකු දුර්මතයක් තිබුණා, ක්‍රීඩා කළොත් ඉගෙන ගන්න බැහැ කියලා. එවැනි වටපිටාවක තමයි මම මේ අභියෝගයට මුහුණ දුන්නේ. දැන් ඒ තත්ත්වය නැහැ. අපි මේ Campus එකේම ක්‍රීඩා කරන විශාල පිරිසක් ඉන්නවා. අනිත් එක විශ්වවිද්‍යාල තරගවල පවා හොඳ තරගකාරීත්වයක් තියෙනවා. ඒ වගේම, ක්‍රීඩාව වෙනුවෙන් වෙන් වූ පාඨමාලා තියෙනවා. ඉගෙන ගන්න වගේම ක්‍රීඩා කරන්නත් හොඳ මානසික මට්ටමක් සහ නිදහසක් තියෙනවා. ඒ නිසා අලුත් පරම්පරාවට බයක් නැතිව මේ වගේ තැන්වලට එන්න පුළුවන්. ඔවුන්ගේ දක්ෂතා මුදා හරින්න විශ්වවිද්‍යාල හොඳ තෝතැන්නක්.”
නුවනි, විශ්වවිද්‍යාලයීය ක්‍රීඩිකාවක් වූවත් ඇය 2016 වසරේ සිට ශ්‍රී ලංකා යුද හමුදාවේ ස්වේච්ඡා බලකාය වෙනුවෙන් මේසපන්දු ක්‍රීඩාවේ ද නිරත වෙනවා.
“ශ්‍රී ලංකා යුද හමුදාව මගේ ක්‍රීඩා ජීවිතයේ සුවිශේෂී කඩඉමක්. ඔවුන් අපිට ගොඩක් උදව් කරනවා. තරග සංචාරවලට යද්දී මුදලින් පවා ඔවුන් උදව් කරනවා. අවශ්‍ය පහසුකම් ලබා දෙනවා. අපිව සම්පූර්ණයෙන්ම ක්‍රීඩාව වෙනුවෙන් නිදහස් කරල තියෙන්නේ. ඒක ක්‍රීඩකයෙක්ට ක්‍රීඩිකාවක්ට විශාල සහනයක්” ඇය පවසනවා.
නුවනිගේ පුහුණුකරුවන් වන්නේ චතුර දුෂාන් සහ උපුල් සමන්ත යන මහත්වරුන්. ඔවුන් දෙදෙනාම අම්බලන්ගොඩ ධර්මාශෝක විද්‍යාලයේ පුහුණුකරුවන්. 2007 වසරේ සිටම ඔවුන් නුවනිගේත් පෞද්ගලික පුහුණුකරුවන් ලෙසින් කටයුතු කරනවා.
“මම මගේ ඉගෙනීම් කටයුතුවල පහසුව වෙනුවෙන් මේ වන විට නතර වී සිටින්නේ පිළියන්දල. ඒත් ඉතිං පුහුණුවීම් කටයුතු නම් කරන්නේ අම්බලන්ගොඩ. ඒ වෙනුවෙන් කාලය කළමනාකරණය කර ගන්නේ හරි අමාරුවෙන්. ඒත් ඉතිං ලැබෙන විවේකයේ දී අම්බලන්ගොඩ දුවනවා. මේ දවස්වල නම් Tournament නැති නිසා පුහුණුවිම් කටයුතු මඟ හැරුණා. ඉඳල හිටල Campus එකේ පුහුණුවිම් කළා. එන මාසෙ වගේ අපිට සෙල්ලම් කරන්න Tournament එකක් පවත්වයි කියල හිතෙනවා.”
එතන දී මහා ලොකු දෙයක් කරනවා කියල නුවනි කියන්නේ නැහැ. නමුත් වර්තමාන තත්ත්වය අනුව පාසල් ක්‍රීඩක ක්‍රීඩිකාවන් ඉතාමත් ඉදිරියෙන් ඉන්නවා කියල තමයි නුවනි කියන්නේ.
“TTවලදී Talent එක Experience එක විතරක් මදි. හොඳ පුහුණුවකුත් ඕන. දැන් ගොඩක් දෙනෙක්ගෙ ගෙවල්වල TT මේස තියෙනවා. ක්‍රීඩාව ඒ මට්ටමෙන් දියුණු වෙලා. ඒක පෞද්ගලිකව වූ දියුණුවක්. නමුත් අපිට කණ්ඩායමක් ලෙසින් සෙල්ලම් කරන්න, පුහුණුවෙන්න පුළුවන් අපේම කියල තැනක් නැහැ. ඒක ලොකු අඩුවක්. අපිට එහෙම තැනක් තියෙනවා නම් තව තවත් අපේ ක්‍රීඩක ක්‍රීඩිකාවන් අතර තරගකාරීත්වයක් ඇති වේවි.”
නුවනි විශ්වවිද්‍යාලයේ දී හදාරන්නේ තමන් කළ ක්‍රීඩාවට හාත් පසින්ම වෙනස් විෂයක්. තොරතුරු තාක්ෂණය සහ ක්‍රීඩාව යන මේ දෙක ගළපා ගැනීම තරමක් අසීරු කටයුත්තක්. නමුත් නුවනි කියන්නෙ හැම දෙයක්ම එකිනෙක සම්බන්ධ බැවින් මේ කිසිදු විෂයක් ක්‍රීඩාවෙන් වෙන්කර තබන්න අමාරුයි කියලයි.
“ක්‍රීඩාව හරියට කරපු නිසා තමයි මම අද විශ්වවිද්‍යාලයේ මගේ උපාධියේ කටයුතු වුනත් හරියට කරගෙන යන්නේ. අපිට උත්තේජනය දුන්නේ ක්‍රීඩාව. කවදාහරි දවසක මම ඉගෙන ගත්ත ක්‍රීඩාවෙන් තවත් කෙනෙක්ට උදව් කරන්න කැමතියි. තවත් වැඩි කාලයක් ක්‍රීඩාවේ, ක්‍රීඩිකාවක් ලෙසින් නිරත වෙන්න බලාපොරොත්තුවක් නැහැ. නැගී එන ක්‍රීඩිකාවන් බොහෝ දෙනෙක් ඉන්නවා. ඔවුන් අපිව පරද්දවමින් ඉදිරියට යාවි. ඒක ක්‍රීඩාවේ ස්වභාවය. ඔවුන්ට මඟ පෙන්වන්න පුළුවන් නම්, මම ඒක දෙපාරක් නොහිතා කරනවා” නුවනි පවසනවා.
ඇයගේ ඒ පරාර්ථකාමී සිතුවිල්ල හෙට දවසේ දී මේසපන්දු කෙතේ පමණක් නොවේ ක්‍රීඩා කෙතේ ද රෝපණය වේවායි ThePapare.com හි අප ද ප්‍රාර්ථනා කරමු.
>> තවත් විශේෂාංග ලිපි සඳහා පිවිසෙන්න <<
