ශ්‍රී ලංකාවෙන් T10 තරගාවලියක්

ලංකා T10 තරගාවලිය 2022

182

ශ්‍රී ලංකා ක්‍රිකට් ආයතනය විසින් සංවිධානය කරන නවතම ක්‍රිකට් ලීග් තරගාවලිය වන ලංකා T10 තරගාවලියේ පළමු අදියර ලබන වසරේ ජුනි මාසයේ පැවැත්වෙන බව ශ්‍රී ලංකා ක්‍රිකට් ආයතනය ඊයේ (21) නිවේදනය කළා.

තරගාවලිය පිළිබඳව දැනුවත් කිරීමේ උත්සවයක් ඊයේ (21) ශ්‍රී ලංකා ක්‍රිකට් ආයතනයේ ප්‍රධානත්වයෙන් පැවති අතර ඒ සඳහා තරගාවලියේ අධීක්ෂණය සිදු කරන ඩුබායි හී පිහිටි TTen Global Sports ආයතනයේ නිලධාරීන් ද එක්ව තිබුණා.

මෙම තරගාවලිය පිරිමි සහ කාන්තා යන කාණ්ඩ දෙකක් යටතේ පැවැත්වීමට සැලසුම් කර ඇති අතර සඳහා පිරිමි කණ්ඩායම් හයක් සහ කාන්තා කණ්ඩායම් හතරක් සහභාගී වීමට නියමිතයි.

Abu Dhabi T10 තරගාවලිය සංවිධානය කරන TTen Global Sports ආයතනය මෙම තරගාවලියේ සංවිධාන කටයුතු සිදු කරන අතර තරගාවලිය දින 12 මුළුල්ලේ පැවැත්වීමට මේ වන විට සැලසුම් කර තිබෙනවා.

කෙසේ නමුත් තරගාවලිය පැවැත්වෙන දින සහ ස්ථාන තවමත් නිල වශයෙන් ප්‍රකාශයට පත් කර නොමැති නමුත් බොහෝ විට තරග මහනුවර සහ හම්බන්තොට කේන්ද්‍ර කර ගනිමින් පැවැත්වෙනු ඇත.

මෙම තරගාවලියට සහභාගී වන කණ්ඩායම් සඳහා ක්‍රීඩකයින් 16 දෙනෙකු ඇතුළත් කර ගැනීමට අවස්ථාව හිමි වන අතර එයට විදෙස් ක්‍රීඩකයින් උපරිම හය දෙනෙකු ඇතුළත් කිරීමට හැකි.

මෙම තරගාවලියේ පළමු අදියර ජුනි මාසයේ පැවැත්වූවත්, ලංකා ප්‍රිමියර් ලීග් විස්සයි විස්ස තරගාවලිය ලබන වසරේ සිට අගෝස්තු මාසයේ පැවැත්වීම නිසා මෙම තරගාවලිය ලබන වසරෙන් පසුව දෙසැම්බර් මාසයේ දී පැවැත්වීමට නියමිතයි.

“ලබන අවුරුද්දේත් අපි දෙසැම්බර් මාසයේ දී ලංකා ප්‍රිමියර් ලීග් තරගාවලිය පැවැත්වූවත් එය පසුව අගෝස්තු මාසයට ගෙන ඒමට අපි සැලසුම් කරලා තියෙන්නේ. ඒ නිසා ලබන වසරේ T10 තරගාවලිය ජුනි සහ ලංකා ප්‍රිමියර් ලීග් තරගාවලිය දෙසැම්බර් පැවැත්වූවත් 2024 සිට එය වෙනස් වෙනවා,” ශ්‍රී ලංකා ක්‍රිකට් ආයතනයේ නිලධාරි ඈශ්ලි ද සිල්වා ප්‍රකාශ කළා.

ශ්‍රී ලංකාව T10 තරග පිටියේ දීර්ඝ කාලයක සිට නිරතව සිටින අතර Abu Dhabi T10 තරගාවලියට සිය ක්‍රීඩකයින්ට සහභාගී වීමට අවසර ලබා දුන් පළමු පූර්ණ සාමාජික රට ශ්‍රී ලංකාව වීම ද විශේෂත්වයක්.

>> තවත් ක්‍රිකට් පුවත් සඳහා පිවිසෙන්න <<