இந்திய மகளிர் கிரிக்கெட் அணியின் நீண்டகால தலைவியாகச் செயல்பட்டு வந்த ஹர்மன்பிரீத் கவுர், அனைத்து வடிவக் போட்டிகளுக்குமான தலைவர் பதவியில் இருந்து விலகுவதாக உத்தியோகபூர்வமாக அறிவித்துள்ளார்.
குவஹாத்தியில் பிசிசிஐ செயலாளர் தேவஜித் சைக்கியா, தலைமைப் பயிற்சியாளர் அமோல் முஜும்தார் மற்றும் உதவி தலைவர் ஸ்மிருதி மந்தனா ஆகியோர் பங்கேற்ற ஆய்வுக் கூட்டத்திற்குப் பிறகு இந்த முடிவு வெளியானது.
இது குறித்து ஹர்மன்பிரீத் கவுர் தனது இன்ஸ்டாகிராம் பக்கத்தில் வெளியிட்டுள்ள பதிவில், ‘இன்று நான் அனைத்து விதமான கிரிக்கெட் போட்டிகளில் இருந்தும் எனது தலைவர் பதவியில் இருந்து விலகுகிறேன். இது எளிதான முடிவு அல்ல. இதில் பல வருட நினைவுகள், உணர்வுகள், தியாகங்கள் மற்றும் வாழ்நாள் முழுவதிற்கும் ஆன தருணங்கள் உள்ளது.
இந்திய மகளிர் கிரிக்கெட்டிற்கு அனைத்தையும் அர்ப்பணித்துள்ளேன். என் ரத்தம், வியர்வை, மற்றும் பல நேரங்களில் சொந்த பகுதியையும் அணிக்கு தான் முன்னுரிமை அளிக்க வேண்டும் என நம்பினேன். எனது தனிப்பட்ட செயல்பாடு, வளர்ச்சி, மற்றும் விருப்பஙக்ள் ஆகியவற்றை ஒதுக்கி வைக்க வேண்டிய தேவை இருந்தது‘ என கூறியுள்ளார்.
இதயம் முழுவதும் எண்ணற்ற உணர்ச்சியுடன் அமைதியோடு தலைவர் பொறுப்பில் இருந்து விலகுகிறேன். நமது அணி சிறந்த இடத்தில் உள்ளது என்று நம்புகிறேன். எனது தலைவர் பொறுப்பு தான் இதன் மூலம் முடிவுக்கு வருகிறது. கிரிக்கெட் மீது நான் கொண்டுள்ள பிரியத்தின் பயணம் தொடரும்‘ என்று சமூக வலைதளத்தில் அவர் பதிவிட்டுள்ளார்.
இந்திய மகளிர் அணிக்காக சர்வதேச கிரிக்கெட்டில் கடந்த 2009-ல் அவர் அறிமுகமானார். 2016 முதல் டி20 கிரிக்கெட்டில் இந்திய அணியை வழிநடத்தி வந்தார். மித்தாலி ராஜ் ஓய்வுக்கு பிறகு, ஒருநாள், டி20 மற்றும் டெஸ்ட் மூன்று மூன்று விதமான கிரிக்கெட்டிலும் இந்திய மகளிர் அணியின் தலைவராக ஹர்மன்பிரீத் செயல்பட்டார்.
- இலங்கையை 45 ஓட்டங்களுக்குள் சுருட்டி இறுதிப்போட்டியில் இந்தியா
- இலங்கை ஒருநாள் குழாத்தில் மீண்டும் அவிஷ்க
- பாகிஸ்தானின் ஒருநாள், T20 குழாம்கள் வெளியீடு
இந்திய மகளிர் கிரிக்கெட் அணிக்கு உலகக் கிண்ணத்தை வென்று தந்து வரலாற்றுச் சாதனை படைத்த 37 வயதான ஹர்மன்பிரீத் கவுர், இந்திய அணிக்காக 8 டெஸ்ட், 164 ஒருநாள் மற்றும் 205 டி20 போட்டிகளில் விளையாடி உள்ளார். மொத்தம் 9,191 ஓட்டங்கள் எடுத்துள்ளார். கடந்த சில மாதங்களாக அணியில் இந்திய மகளிர் கிரிக்கெட் அணியில் மாற்றம் குறித்த பேச்சு எழுந்த நிலையில், பிசிசிஐ ஆய்வு கூட்டம் நேற்று நடைபெற்றது.
இந்நிலையில், தலைவர் பொறுப்பில் இருந்து விலகுவதாக தற்போது அவர் அறிவித்துள்ளார்.கடந்த 2016 முதல் தலைவர் பொறுப்பில் இருந்து வரும் ஹர்மன்பிரீத் கவுர், 150 டி20 போட்டிகளில் தலைவராக இருந்த முதல் கிரிக்கெட் வீராங்கனை என்ற சாதனையை படைத்துள்ளார். இவரது தலைமையில் இந்தியா 92 டி20 போட்டிகளை வென்றுள்ளது.
ஹர்மன்பிரீத் கவுரின் தலைமையில் இந்திய மகளிர் கிரிக்கெட் அணி சர்வதேச அளவில் பல்வேறு மைல்கற்களை எட்டியுள்ளது. இந்திய மகளிர் கிரிக்கெட் வரலாற்றிலேயே அணிக்கு உலகக் கிண்ணத்தை வென்று தந்த ஒரே தலைவர் என்ற பெருமையை ஹர்மன்பிரீத் கவுர் பெற்றுள்ளார். அதேபோல, அண்மையில் நிறைவடைந்த 2026 ஆசிய விளையாட்டுப் விழா தங்கப் பதக்கம், மகளிர் ஆசியக் கிண்ணம் ஆகியவற்றை வென்று கொடுத்தவராகவும் அவர் வரலாற்றில் இடம்பிடித்துள்ளார். மேலும், 200 சர்வதேச டி20 போட்டிகளில் விளையாடிய முதல் வீராங்கனை என்ற பெருமையையும், சர்வதேச கிரிக்கெட்டில் அதிக போட்டிகளில் விளையாடிய வீராங்கனை என்ற சாதனையையும் அவர் படைத்துள்ளார்.
ஹர்மன்பிரீத் கவுரின் இந்தத் திடீர் விலகலைத் தொடர்ந்து, இந்திய மகளிர் கிரிக்கெட் அணியின் அடுத்த தலைவர் யார் என்ற எதிர்பார்ப்பு அதிகரித்துள்ளது. இதில் உதவி தலைவராகப் பணியாற்றி வரும் ஸ்மிருதி மந்தனா அடுத்த தலைவராகப் பொறுப்பேற்க அதிக வாய்ப்புள்ளதாக பிசிசிஐ வட்டாரங்கள் தெரிவிக்கின்றன. விரைவில் இதுகுறித்த உத்தியோகபூர்வ அறிவிப்பை இந்திய கிரிக்கெட் கட்டுப்பாடு வாரியம் வெளியிடும் என்று எதிர்பார்க்கப்படுகிறது.
>>மேலும் கிரிக்கெட் செய்திகளைப் படிக்க<<
