சகலதுறையிலும் பிரகாசித்த இலங்கை மகளிருக்கு ஐந்தாவது வெற்றி 

ICC Women’s Emerging Nations Trophy 2026

1
ICC Women’s Emerging Nations Trophy 2026

ஐசிசி மகளிர் வளர்ந்து வரும் நாடுகளுக்கான கிண்ணத் தொடரின் சுப்பர் சிக்ஸ் சுற்றின் இரண்டாவது போட்டியில் ஜிம்பாப்வே அணியை 9 விக்கெட்டுகளால் வீழ்த்திய இலங்கை மகளிர் அணி, இத்தொடரில் தனது தோல்வியடையாத பயணத்தைத் தொடர்ந்துள்ளது.

ஐக்கிய அரபு இராச்சியத்தின் அஜ்மானில் உள்ள செவன் டிஸ்ட்ரிக்ட்ஸ் விளையாட்டுக் கழக மைதானத்தில் இன்று (20) நடைபெற்ற இப்போட்டியில், நாணயச் சுழற்சியில் வெற்றி பெற்ற ஜிம்பாப்வே அணி முதலில் துடுப்பெடுத்தாடத் தீர்மானித்தது.

இதன்படி முதலில் களமிறங்கிய ஜிம்பாப்வே அணி இலங்கை அணியின் கட்டுக்கோப்பான பந்துவீச்சை எதிர்கொள்ள முடியாமல் தடுமாறியதுடன், 19.1 ஓவர்களில் அனைத்து விக்கெட்டுகளையும் இழந்து வெறும் 68 ஓட்டங்களை மாத்திரமே பெற்றுக்கொண்டது.

இலங்கை அணியின் பந்துவீச்சில் அபாரமாகச் செயற்பட்ட கவிஷா தில்ஹாரி வெறும் 8 ஓட்டங்களை மாத்திரம் விட்டுக்கொடுத்து 3 விக்கெட்டுகளைக் கைப்பற்றினார். அவருக்குத் துணையாக நிமேஷா மீபகே மற்றும் சத்யா சந்தீபனி ஆகியோர் தலா 2 விக்கெட்டுகளை வீழ்த்தி ஜிம்பாப்வே அணியைக் குறைந்த ஓட்டங்களுக்குள் கட்டுப்படுத்தினர்.

ஜிம்பாப்வே அணி தரப்பில் கெலிஸ் என்ட்லோவு 19 ஓட்டங்களையும், மொடெஸ்டர் முபச்சிக்வா 15 ஓட்டங்களையும் அதிகபட்சமாக எடுத்தனர்.

இதனையடுத்து 69 ஓட்டங்கள் என்ற இலகுவான வெற்றி இலக்கை நோக்கிப் பதிலுக்குத் துடுப்பெடுத்தாடிய இலங்கை அணி, 11.3 ஓவர்களில் ஒரு விக்கெட்டை மாத்திரம் இழந்து வெற்றி இலக்கை எட்டியது.

ஆரம்பத் துடுப்பாட்ட வீராங்கனை விஷ்மி குணரட்;ன 35 பந்துகளில் 6 பவுண்டரிகள் அடங்கலாக ஆட்டமிழக்காமல் 39 ஓட்டங்களைப் பெற்று இலங்கை அணியின் இலகுவான வெற்றியை உறுதி செய்தார்.

போட்டியின் நாயகி கவிஷா தில்ஹாரி தெரிவானார்.

சுப்பர் 6 சுற்றில் இலங்கை அணி பங்கேற்கும் அடுத்த போட்டி இம்மாதம் 22ஆம் திகதி நெதர்லாந்து மகளிர் அணிக்கு எதிராக அஜ்மானில் உள்ள கர்வான் விளையாட்டுக் கழக கிரிக்கெட் மைதானத்தில் நடைபெறவுள்ளது.

போட்டியின் சுருக்கம் 

 

ஜிம்பாப்வே மகளிர் அணி – 68 (19.1 ஓவர்கள்) கெலிஸ் என்ட்லோவு 19, கவிஷா தில்ஹாரி 3/8, நிமேஷா மீபகே 2/9, சத்யா சந்தீபனி 2/14

 

இலங்கை மகளிர் அணி – 69/1 (11.3 ஓவர்கள்) விஷ்மி குணரட்ன 39*, ஹசினி பெரேரா 22

 

முடிவு: இலங்கை மகளிர் அணி 9 விக்கெட்டுகளால் வெற்றி பெற்றது.

>>மேலும் கிரிக்கெட் செய்திகளைப் படிக்க<<