சுற்றுலா இலங்கை – பாகிஸ்தான் அணிகள் இடையிலான இரண்டாவது டெஸ்ட் போட்டியில் பாகிஸ்தான் 2 விக்கெட்டுக்களால் இலகு வெற்றியினைப் பதிவு செய்திருக்கின்றது.
>>இன்னிங்ஸ் தோல்வியினைத் தவிர்த்த இலங்கை வீரர்கள்<<
மேலும் இந்த வெற்றியுடன் பாகிஸ்தான் இரு போட்டிகள் கொண்ட டெஸ்ட் தொடரினையும் 1-0 எனக் கைப்பற்றியிருக்கின்றது. ராவல்பிண்டியில் கடந்த மூன்று நாட்களாக நடைபெற்று வந்த இந்த டெஸ்ட் போட்டியில், மூன்றாம் நாள் ஆட்டம் நிறைவடையும் போது தமது இரண்டாம் இன்னிங்ஸில் ஆடி வந்த இலங்கை அணியினர் 309 ஓட்டங்களுக்கு 9 விக்கெட்டுக்களை இழந்து காணப்பட்டனர். களத்தில் ஆட்டமிழக்காதிருந்த மிலான் ரத்நாயக்க 60 ஓட்டங்களுடனும், அசித பெர்னாண்டோ ஓட்டமேதுமின்றியும் இருந்தனர்.
இன்று (04) போட்டியின் நான்காம் நாள் ஆட்டத்தில் தமது இரண்டாம் இன்னிங்ஸ் துடுப்பாட்டத்தினை தொடர்ந்த இலங்கை அணியினர் மேலதிகமாக 07 ஓட்டங்களை மட்டும் எடுத்து 95 ஓவர்களில் அனைத்து விக்கெட்டுக்களையும் பறிகொடுத்து 319 ஓட்டங்கள் பெற்றனர்.
இலங்கை அணியின் துடுப்பாட்டத்தில் அதிகபட்சமாக மிலான் ரத்நாயக்க ஆட்டமிழக்காது 66 ஓட்டங்கள் எடுத்தார். பாகிஸ்தான் பந்துவீச்சில் மொஹமட் அப்பாஸ் மற்றும் ஆமெர் ஜமால் ஆகியோர் தலா 3 விக்கெட்டுக்கள் வீதம் கைப்பற்றியிருந்தனர்.
இலங்கை அணியின் இரண்டாம் இன்னிங்ஸின் பின்னர் போட்டியின் வெற்றி இலக்காக 90 ஓட்டங்கள் மாத்திரம் பாகிஸ்தானுக்கு நிர்ணயம் செய்யப்பட்டது.
>>ICC ஆடவர் தொடர்களை நடத்தும் உரிமம் தொடர்பான செய்திகளுக்கு SLC விளக்கம்<<
இந்த வெற்றி இலக்கினை அடைய இரண்டாம் இன்னிங்ஸ் துடுப்பாட்டத்தினை ஆரம்பித்த பாகிஸ்தான் போட்டியின் வெற்றி இலக்கினை 13 ஓவர்களில் 2 விக்கெட்டுக்களை இழந்து 90 ஓட்டங்களுடன் அடைந்து கொண்டது.
பாகிஸ்தான் அணியின் வெற்றியை உறுதி செய்த வீரர்களில் ஆமெர் ஜமால் ஆட்டமிழக்காது 34 ஓட்டங்கள் பெற்றிருந்தார். இலங்கை பந்துவீச்சில் அசித பெர்னாண்டோ மற்றும் லஹிரு குமார ஆகியோர் தலா ஒரு விக்கெட் வீதம் சாய்த்தும் அது வீணாகியது. போட்டியின் ஆட்டநாயகன் மற்றும் தொடர் நாயகன் விருதுகளை மொஹமட் அப்பாஸ் வென்றார்.






















