ஜப்பானின் நிஷினில் நடைபெற்ற 2026 ஆசிய விளையாட்டுப் போட்டிகள் ஆடவர் கிரிக்கெட் தொடரின் இரண்டாவது அரையிறுதிப் போட்டியில், இலங்கை அணியை 124 ஓட்டங்கள் வித்தியாசத்தில் அபாரமாக வீழ்த்தி இந்திய அணி இறுதிப்போட்டிக்கு தகுதி பெற்றுள்ளது.
>>ILT20 2026 தொடர் வீரர்கள் ஏலத்தில் இலங்கையின் முன்னணி வீரர்கள்<<
மழையினால் தொடரின் காலிறுதிப் போட்டிகள் இரண்டும் கைவிடப்பட இலங்கை, இந்திய அணிகள் அரையிறுதிக்கு முன்னேறிய இந்தப் போட்டியில் நாணய சுழற்சியில் வெற்றி பெற்ற இலங்கை அணி முதலில் களத்தடுப்பை தெரிவு செய்தது. அதன்படி துடுப்பெடுத்தாடிய இந்திய அணி, தொடக்கத்தில் விக்கெட்டுகளை இழந்த போதிலும் இஷான் கிஷனின் அபார ஆட்டத்தால் மீண்டெழுந்தது.
இஷான் கிஷன் 46 பந்துகளில் ஆட்டமிழக்காமல் 80 ஓட்டங்களை விளாச, இந்திய அணி நிர்ணயிக்கப்பட்ட 20 ஓவர்களில் 7 விக்கெட்டுகளை இழந்து 169 ஓட்டங்களைப் பெற்றது.
இந்திய அணியின் துடுப்பாட்டத்தில் இஷான் கிஷன் தவிர வைபவ் சூரியவன்ஷி 21 பந்துகளில் 38 ஓட்டங்களைப் பெற்றிருந்தார். இலங்கை பந்துவீச்சில் தரிந்து ரத்நாயக்க மற்றும் சஹான் ஆராச்சிகே ஆகிய இருவரும் தலா 2 விக்கெட்டுக்களை சுருட்டினர்.
இதையடுத்து 170 ஓட்டங்கள் என்ற இலக்கை நோக்கிப் பதிலுக்கு துடுப்பாடிய இலங்கை அணி, இந்திய அணியின் பந்துவீச்சு மற்றும் சிறப்பான களத்தடுப்புக்கு முன்னால் நிலைகுலைந்தது. ஆரம்பத்திலேயே ஜஸ்ப்ரீட் பும்ரா சினெத் ஜெயவர்தன மற்றும் சோஹன் டி லிவேரா ஆகிய இருவரையும் ஓட்டங்களின்றி ஆட்டமிழக்கச் செய்து பெரும் அதிர்ச்சி கொடுத்தார்.
தொடர்ந்து வந்த துடுப்பாட்ட வீரர்களும் அடுத்தடுத்து ஆட்டமிழக்க, நுவனிது பெர்னாண்டோ பெற்ற 15 ஓட்டங்களே இலங்கை அணியின் அதிகபட்ச தனிநபர் ஓட்டமாக அமைந்தது. இந்திய பந்துவீச்சாளர்களின் துல்லியமான பந்துவீச்சை எதிர்கொள்ள முடியாமல் திணறிய இலங்கை அணி, வெறும் 9.5 ஓவர்களில் 45 ஓட்டங்களுக்கு அனைத்து விக்கெட்டுகளையும் இழந்து போட்டியில் படுதோல்வி அடைந்தது.
இந்திய அணி சார்பில் பந்துவீச்சில் ஜஸ்ப்ரீட் பும்ரா, அக்ஷார் படேல் மற்றும் அபிஷேக் சர்மா ஆகியோர் தலா 2 விக்கெட்டுக்கள் வீதம் எடுத்தனர்.
இந்த அபார வெற்றியின் மூலம் இந்திய அணி தங்கப்பதக்கத்திற்கான இறுதிப்போட்டிக்குள் நுழைந்துள்ளதுடன், இலங்கை அணி வெண்கலப் பதக்கத்திற்கான போட்டியில் பங்களாதேஷ் அணியுடன் சனிக்கிழமை (03) விளையாடவுள்ளது. அதேவேளை தொடரின் இறுதிப் போட்டி அதே தினம் இந்தியா – பாகிஸ்தான் அணிகள் இடையில் நடைபெறவிருக்கின்றது.
>>மேலும் கிரிக்கெட் செய்திகளைப் படிக்க<<
