ஷாய் ஹோப்பின் அபார சதத்தின் உதவியுடன் இந்தியாவுக்கு எதிரான 3ஆவது ஒருநாள் கிரிக்கெட் போட்டியில், மேற்கிந்தியத் தீவுகள் அணி 5 விக்கெட் வித்தியாசத்தில் ஆறுதல் வெற்றியைப் பதிவு செய்துள்ளது.
இந்தியா – மேற்கிந்தியத் தீவுகள் அணிகளுக்கு இடையிலான மூன்றாவது மற்றும் கடைசி ஒருநாள் போட்டி நேற்று (03) நியூ சண்டிகரில் நடைபெற்றது.
இந்தப் போட்டியில் நாணய சுழற்சியில் வென்று முதலில் விளையாடிய இந்திய அணி நிர்ணயிக்கப்பட்ட 50 ஓவர்களின் முடிவில் 7 விக்கெட்களை இழந்து 351 ஓட்டங்களைக் குவித்தது.
இந்திய அணியில் தலைவர் சுப்மன் கில் ஒரு ஓட்டத்துடனும், விராட் கோலி ஓட்டமின்றியும் ஆட்டமிழந்து ஏமாற்றமளித்தனர். இதனையடுத்து, ரோஹித் சர்மா மற்றும் ருதுராஜ் கெய்க்வாட் ஜோடி சேர்ந்தனர். இந்த இணை சிறப்பாக விளையாடி அணியின் ஓட்ட எண்ணிக்கையை உயர்த்தியது. அதிரடியாக விளையாடிய ரோஹித் சர்மா 85 பந்துகளில் 92 ஓட்டங்கள் எடுத்து 8 ஓட்டங்களில் சதம் விளாசும் வாய்ப்பை தவறவிட்டார். அதில் 10 பவுண்டரிகள் மற்றும் 3 சிக்ஸர்கள் அடங்கும். ருதுராஜ் கெய்க்வாட் அரைச் சதம் விளாசி 69 பந்துகளில் 57 ஓட்டங்கள் எடுத்தார். அதில் ஒரு பவுண்டரி மற்றும் 4 சிக்ஸர்கள் அடங்கும்.
அதிரடியாக ஆடிய கே.எல்.ராகுல் நேர்த்தியான ஆட்டத்தை வெளிப்படுத்தி சதம் விளாசி அசத்தினார். அவர் 87 பந்துகளில் 129 ஓட்டங்கள் எடுத்து கடைசி வரை களத்தில் இருந்தார். அதில் 10 பவுண்டரிகள் மற்றும் 6 சிக்ஸர்கள் அடங்கும். நமன் திர் 30 ஓட்டங்களையும், அன்{ல் கம்போஜ் 17 ஓட்டங்களையும் எடுத்தனர்.
மேற்கிந்தியத் தீவுகள் தரப்பில் ஜேடன் சீல்ஸ் 3 விக்கெட்களையும், கீமோ போல் 2 விக்கெட்களையும், குடகேஷ் மோட்டி ஒரு விக்கெட்டினையும் கைப்பற்றினர்.
- கோலி, கில்லின் சதத்தினால் இந்தியாவிற்கு இலகு வெற்றி
- இலங்கையை 45 ஓட்டங்களுக்குள் சுருட்டி இறுதிப்போட்டியில் இந்தியா
- தரிந்து ரத்நாயக்கவின் அபார ஆட்டத்தோடு வெண்கலப் பதக்கம் வென்ற இலங்கை
பின்னர் 352 ஓட்டங்கள் எடுத்தால் வெற்றி என்ற கடினமான இலக்குடன் களமிறங்கிய மேற்கிந்தியத் தீவுகள் அணிக்கு, அதன் தலைவர் ஷாய் ஹோப் அதிரடியான ஆரம்பத்தை பெற்றுக்கொடுத்தார். மறுமுனையில் களமிறங்கிய ஜோன் காம்பெல் 10 ஓட்டங்களுடன் விக்கெட்டை இழக்க, அடுத்து வந்த அமீர் ஜாங்கூ 67 ஓட்டங்கள் எடுத்து ஆட்டமிழந்தார். தொடர்ந்து களமிறங்கிய ஷெர்ஃபேன் ரூதர்ஃபோர்ட் 24 ஓட்டங்களையும், கீமோ போல் 44 ஓட்டங்களையும், மெத்யூ ஃபோர்ட் 7 ஓட்டங்களையும் எடுத்து ஆட்டமிழந்தனர்.
ஒருபுறம் விக்கெட்டுகள் சரிந்தாலும், மறுமுனையில் நங்கூரம் போல் நிலைத்து நின்று ஆடிய ஷாய் ஹோப், சர்வதேச ஒருநாள் கிரிக்கெட்டில் தனது 21ஆவது சதத்தைப் பதிவு செய்தார். இறுதிவரை ஆட்டமிழக்காமல் களத்தில் இருந்த ஹோப், 17 பவுண்டரிகள், 3 சிக்ஸர்கள் உட்பட 162 ஓட்டங்களைக் குவித்து அணிக்கு வெற்றியைத் தேடித்தந்தார்.
இதன் மூலம் மேற்கிந்தியத் தீவுகள் அணி 48.2 ஓவர்களில் இலக்கை எட்டியதுடன், 5 விக்கெட் வித்தியாசத்தில் ஆறுதல் வெற்றியைப் பதிவு செய்தது. ஒருநாள் கிரிக்கெட்டில் மேற்கிந்தியத் தீவுகள் துரத்திய அதிகபட்ச இலக்கு இதுவாகும்.
எனினும், மூன்று போட்டிகள் கொண்ட ஒருநாள் தொடரை இந்தியா 2-1 என்ற கணக்கில் கைப்பற்றியது. ஆட்டநாயகன் விருதை ஷாய் ஹோப் தட்டிச் செல்ல, தொடர் நாயகன் விருதை சுப்மன் கில் பெற்றுக்கொண்டார்.
இரு அணிகளுக்கும் இடையிலான 5 போட்டிகள் கொண்ட டி20 தொடர் ஒக்டோபர் 6ஆம் திகதி லக்னோவில் ஆரம்பமாகவுள்ளமை குறிப்பிடத்தக்கது.
>>மேலும் கிரிக்கெட் செய்திகளைப் படிக்க<<
