டெல்லி அணியுடன் மீண்டும் கைகோர்க்கும் மஹேல ஜயவர்தன

3

அடுத்த ஆண்டு நடைபெறவுள்ள மகளிர் பிரீமியர் லீக் (WPL) பருவத்திற்கு முன்னதாக, டெல்லி கேபிடல்ஸ் மகளிர் அணியின் கிரிக்கெட் பணிப்பாளராக இலங்கை கிரிக்கெட் அணியின் முன்னாள் தலைவர் மஹேல ஜயவர்தன நியமிக்கப்பட்டுள்ளார்.

அணியின் வியூகம், திறமையாளர்களை அடையாளம் காணுதல் மற்றும் வீரர்கள் மற்றும் பயிற்சி குழாமின் மேம்பாடு உள்ளிட்ட அணியின் அனைத்து கிரிக்கெட் சார்ந்த விவகாரங்களையும் மஹேல ஜயவர்தன மேற்பார்வையிடுவார் என அந்த அணி நிர்வாகம் வெளியிட்டுள்ள உத்தியோகபூர்வ அறிக்கையில் உறுதிப்படுத்தப்பட்டுள்ளது.

டெல்லி கேபிடல்ஸ் அணியின் இணை உரிமையாளரான ஜி.எம்.ஆர் ஸ்போர்ட்ஸ் (GMR Sports) நிறுவனத்தின் கிரிக்கெட் பணிப்பாளர் என்ற பரந்த பொறுப்பின் கீழ் மஹேல ஜயவர்தனவின் இந்த நியமனம் அமைந்துள்ளது. இதற்கமைய, சர்வதேச லீக் டி20 (ILT20) தொடரில் துபாய் கேபிடல்ஸ் மற்றும் ‘தி ஹண்ட்ரட்’ தொடரில் சதர்ன் பிரேவ் ஆகிய அணிகளிலும் அவர் இதே பொறுப்பில் பணியாற்றவுள்ளார்.

அத்துடன், 2024ஆம் ஆண்டில் ஜி.எம்.ஆர் குழுமத்தினால் கையகப்படுத்தப்பட்ட இங்கிலாந்தின் ஹாம்ப்ஷயர் கவுண்டி கிரிக்கெட் அணியின் கிரிக்கெட் பணிப்பாளர் ஜைல்ஸ் வைட்டுடனும் மஹேல ஜயவர்தனவுடன் இணைந்து பணியாற்றவுள்ளமை மற்றுமொரு சிறப்பம்சமாகும்.

இந்த நியமனத்தின் ஊடாக 13 ஆண்டுகளுக்கும் மேலான இடைவெளிக்குப் பிறகு மஹேல ஜயவர்தன மீண்டும் டெல்லி கேபிடல்ஸ் அணிக் கட்டமைப்பிற்குள் இணைந்துள்ளார். முன்னதாக 2012 மற்றும் 2013 ஆகிய இரண்டு ஐபிஎல் பருவங்களில் ‘டெல்லி டேர்டெவில்ஸ்’ என அழைக்கப்பட்ட இந்த அணிக்காக விளையாடிய அவர், 2013ஆம் ஆண்டில் அணியின் தலைவராகவும் செயற்பட்டார்.

இதனிடையே, ஐபிஎல் தொடரில் இடம்பெற்றுள்ள மும்பை இந்தியன்ஸ் அணியின் தலைமைப் பயிற்சியாளர் பதவியிலிருந்து அவர் அண்மையில் விலகியிருந்தார். அவரது வழிகாட்டலின் கீழ் மும்பை இந்தியன்ஸ் அணி 2017, 2019 மற்றும் 2020 ஆகிய ஆண்டுகளில் மூன்று முறை சம்பியன் பட்டத்தை வென்றமை குறிப்பிடத்தக்கது.

தனது புதிய நியமனம் குறித்து கருத்து வெளியிட்ட மஹேல ஜயவர்தன, ‘டெல்லி கேபிடல்ஸ் அணி தனக்கென ஒரு வலுவான அடையாளத்தையும், மகளிர் கிரிக்கெட்டின் எதிர்காலம் குறித்த ஒரு உற்சாகமான தொலைநோக்குப் பார்வையையும் கொண்டுள்ளது. றுPடு அணியின் கிரிக்கெட் பணிப்பாளர் பொறுப்பை ஏற்பதில் நான் மிகுந்த மகிழ்ச்சியடைகிறேன்,’ எனத் தெரிவித்தார்.

இதேவேளை, எதிர்வரும் ஐபிஎல் சீசனுக்கான டெல்லி கேபிடல்ஸ் அணியின் தலைமைப் பயிற்சியாளராகச சௌரவ் கங்குலியும், துடுப்பாட்ட மற்றும் உதவிப் பயிற்சியாளராக யுவராஜ் சிங்கும் நியமிக்கப்பட்டுள்ளனர். இவர்களுடன் இலங்கை அணியின் முன்னாள் ஜாம்பவான் சமிந்த வாஸ், டெல்லி அணியின் பந்துவீச்சுப் பயிற்சியாளராக நியமிக்கப்பட்டிருப்பது குறிப்பிடத்தக்கது.

>>மேலும் கிரிக்கெட் செய்திகளைப் படிக்க<<