இலங்கைக்கு எதிராக நடைபெறவிருக்கும் T20 தொடருக்கான பாகிஸ்தான் அணியின் புதிய தலைவராக சஹிப்சதா பர்ஹான் நியமிக்கப்பட்டுள்ளார்.
>>இலங்கை ஒருநாள் குழாத்தில் மீண்டும் அவிஷ்க<<
இதன்மூலம் பாகிஸ்தானின் T20 அணியில் புதிய தலைமை மாற்றம் ஏற்பட்டுள்ளது. T20 உலகக் கிண்ணத் தொடரில் பாகிஸ்தான் அணியை வழிநடத்திய சல்மான் அகாவிடமிருந்து பர்ஹான் இந்த பொறுப்பை ஏற்கின்றார்.
ஒக்டோபர் 9ஆம் திகதி இலங்கை – பாகிஸ்தான் இடையிலான மூன்று போட்டிகள் கொண்ட T20 தொடர் ஆரம்பமாகும் நிலையில், இந்தத் தொடருக்கான 15 பேர் கொண்ட பாகிஸ்தான் அணியில் சல்மான் அகா சேர்க்கப்படவில்லை.
இந்த ஆண்டின் தொடக்கத்தில் நடைபெற்ற T20 உலகக் கிண்ணத் தொடரில் 383 ஓட்டங்கள் குவித்து பாகிஸ்தான் சார்பாக அதிக ஓட்டங்கள் பெற்ற வீரரான 30 வயது நிரம்பிய பர்ஹான், கடந்த வாரம் நிறைவுக்கு வந்த ஆசிய விளையாட்டு தொடரில் பாகிஸ்தான் அணியினை வெள்ளிப் பதக்கம் வெல்ல வழிநடத்தினார். இவருடன் ஆசிய விளையாட்டுப் போட்டிகளுக்கான பாகிஸ்தான் T20 அணியில் இடம்பெற்ற அப்துல் ஸமட், சயீம் அய்யூப், ஹசன் நவாஸ், அராபத் மின்ஹாஸ், மாஸ் சதாகட், அப்றார் அஹமட், சுபியான் மொக்கீம் மற்றும் மொஹமட் சல்மான் மிர்ஷா ஆகியோரும் அறிவிக்கப்பட்டிருக்கும் பாகிஸ்தான் குழாத்தில் தக்கவைக்கப்பட்டுள்ளனர்.
பாகிஸ்தான் T20 குழாம்:
சஹிப்சதா பர்ஹான் (தலைவர்), அப்துல் சமட், அப்ரார் அகமது, அராபத் மின்ஹாஸ், பக்கர் சமான், ஹசன் நவாஸ், கவாஜா நபே (விக்கெட்காப்பாளர்), மாஸ் சதாகட், மொஹமட் சல்மான் மிர்ஷா, மொஹமட் இம்ரான், நசீம் ஷாஹ், ரசாவுல்லா, சயீம் அய்யூப், ஷதாப் கான், சுபியான் மொக்கீம்.
எனினும் T20 தொடரின் பின்னர் இலங்கை, இங்கிலாந்து மற்றும் பாகிஸ்தான் அணிகள் பங்கெடுக்கும் முத்தரப்பு ஒருநாள் தொடருக்கான பாகிஸ்தான் குழாத்தில், பர்ஹான் இடம்பெறவில்லை.
>>ஷாய் ஹோப்பின் அபார சதத்தினால் இந்தியாவை வீழ்த்தியது மே.தீவுகள்<<
முத்தரப்பு தொடரிற்கான ஒருநாள் அணியின் தலைவராக ஷஹீன் ஷாஹ் அப்ரிடி தலைவராக நியமிக்கப்பட்டுள்ளார். அதேவேளை கடந்த ஜனவரி பாகிஸ்தான் அவுஸ்திரேலியாவை 2-1 என்ற கணக்கில் வீழ்த்திய ஒருநாள் தொடரில் ஆடிய அப்துல் சமட், ரொஹைல் நசீர், ஷமீல் குசைன், மாஸ் சதாகட் மற்றும் அஹ்மட் டேனியல் ஆகியோரும் இந்த அணியில் இருந்து நீக்கப்பட்டுள்ளனர்.
பக்கார் சமான், பஹீம் அஷ்ரப், ரசாவுல்லா, சாட் பயிக், சயீம் அய்யூப் ஆகியோருடன், இந்தியாவுக்கு எதிரான ஆசிய விளையாட்டுப் போட்டியின் இறுதிப் போட்டியில் 96 ஓட்டங்கள் குவித்த ஹசன் நவாஸ் உம் இந்த ஒருநாள் அணியில் இணைக்கப்பட்டுள்ளார்.
இலங்கை, பாகிஸ்தான் மற்றும் இங்கிலாந்து அணிகள் பங்கெடுக்கும் முத்தரப்பு ஒருநாள் தொடர் ஒக்டோபர் 18இல் ஆரம்பமாகுகின்றது. முத்தரப்பு ஒருநாள் தொடரின் இறுதிப் போட்டி ஒக்டோபர் 31ஆம் திகதி லாகூரின் கடாபி மைதானத்தில் நடைபெறும்.
பாகிஸ்தான் ஒருநாள் குழாம்:
ஷஹீன் அப்ரிடி (தலைவர்), அப்றார் அஹமட், அராபத் மின்ஹாஸ், பாபர் அசாம், பாஹிம் அஷ்ரப், பக்கார் சமான், ஹரிஸ் ரவூப், ஹசன் நவாஸ், மொஹமட் காஸ்ஸிகோரி (விக்கெட்காப்பாளர்), நசீம் ஷாஹ், ரசாவுல்லா, சாத் பயிக், சயீம் அய்யூப், சல்மான் அகா, ஷதாப் கான், சுபியான் மொக்கீம்.
>>மேலும் கிரிக்கெட் செய்திகளைப் படிக்க<<
