ක්‍රිකට්වලින් ඔබ්බට ගොස් සියලු දෙනා වෙනුවෙන් හඬක් නැගූ “වසරේ මිනිසා”

664
Dr. Ajith C. S. Perera

දක්ෂ ක්‍රිකට් ක්‍රීඩකයෙක්, ක්‍රිකට් විනිසුරුවරයෙක්, ක්‍රිකට් ලකුණු සටහන්කරුවෙක්, ක්‍රිකට් විස්තර විචාරකයෙක්, දැනුවත් දේශකයෙක් සහ විභාග පරීක්ෂකවරයෙක් ලෙසින් මෙන්ම විද්වත් පරිපාලකයෙක්, ලේඛකයෙක්, ග්‍රන්ථ කතුවරයෙක්, මානව පෞරුෂ ප්‍රවර්ධකයෙක් සහ වෘත්තීය සටන් සඟයෙක් ලෙසින් ද මෙරට ප්‍රචලිත වූ ආචාර්ය අජිත් සී .එස්. පෙරේරා තම ජීවන ඉනිම පසුගිය දා අවසන් කළේය. මේ ඔහු ගැන ThePapare.com සංවේගයෙන් තබන සටහනකි.

ඒ මීට හරියටම වසර 28කට ප්‍රථම ඉල් මාසයයි. අපගේ කතා නායකයා ටෙස්ට් ක්‍රිකට් විනිසුරුවෙක් ලෙසින් ලත් මංගල තරග පැවරුම රැගෙන ශ්‍රී ලංකා ක්‍රිකට් පාලක මණ්ඩලයෙන් පිටතට පැමිණියේ ඉක්මනින් තම නිවැසියන් සමඟ එක්වෙමින් එහි සතුට සමරන්නට ය. නමුත් පරිසරයේ පැවතියේ අඳුරු මූසල බවකි. සුළඟත් සමඟ ඇද වැටෙන වර්ෂාව පරිසරය කලබලය තවත් වැඩි කළේය. 

එහෙත් ඒ වගක් අජිත් පෙරේරා මහතාට නොවුණි. ඔහුගේ සිතේ පැළපදියම්ව තිබෙන්නට ඇත්තේ තවත් දින 10කින් ආරම්භ වන ශ්‍රී ලංකා – නවසීලන්ත ටෙස්ට් ක්‍රිකට් තරගයේ ටෙස්ට් ක්‍රිකට් විනිසුරුවෙක් ලෙසින් තමන් පිටියේ සිට ගන්නා අයුරු විය යුතු ය. නමුත් ඒ සියල්ල බෞද්ධාලෝක මාවතේ වූ විශාල මාර ගසක අත්තක් ඔවුන් ගමන්ගත් රථය මතට වැටීමෙන් සුනුවිසුනු කළේය. එම අනතුරින් ඔහුගේ රියදුරු මියගිය අතර අජිත් පෙරේරා මහතාගේ කොඳු නාරටියට හානි වී දෙපා අප්‍රාණික බවට පත් විය. 

“අජිත් පාසල් කාලයේ දී වගේම ඒ වෙද්දිත් බොහොම නිවුන, නිහතමානි පුද්ගලයෙක්. ටෙස්ට් ක්‍රිකට් විනිසුරුවරයෙක් වෙන එක ගැන අජිත්ට තිබුණේ ලොකු බලාපොරොත්තුවක්. එයාට අවශ්‍ය වුනේ සාම්ප්‍රදායික ක්‍රිකට් විනිසුරුවෙක් වෙන්න නෙමේ. ඒ අංශයෙන් වඩාත් දැනුවත් වෙමින් ඉතා ඉහළට යන්න. ඒ වෙනුවෙන් විශාල ලෙස මහන්සි වුනා. ක්‍රිකට් දැනුම සොයා ගෙන ගියා. නමුත් එදා වුන අනතුර ඒ සියල්ල වෙනස් කළා” ආචාර්ය අජිත් පෙරේරා මහතාගේ පංති සඟයෙක් වු කනිල් වෙත්තසිංහ මහතා ThePapare.com සමඟ එක් වෙමින් පැවසුවා. 

ආචාර්ය අජිත් පෙරේරා මහතා කොළඹ රාජකීය විද්‍යාලයේ ආදි ශිෂ්‍යයෙක් වන අතර කොළඹ විශ්වවිද්‍යාලයෙන් සහ එංගලන්තයේ බර්මින්ග්හැම් විශ්වවිද්‍යාලයෙන් වැඩි දුර අධ්‍යාපනය හැදෑරුවේය.

අජිත් පෙරේරා මහතා විනිසුරුවරයෙක් ලෙසින් 1986 දී සහභාගී වූ රාජකීය විද්‍යාලයීය සහ ආදි ශිෂ්‍ය කණ්ඩායම් අතර තරගයක දී – ඡායාරූප අයිතිය මුල් හිමිකරු සතුයි

රාජකීය විද්‍යාලයේ දී කිසිදු ක්‍රීඩාවකට සම්බන්ධ නොවුණ නිවුන පුද්ගලයෙක් වූව ද තරුණ උපාධිධාරී අජිත්, කොළඹ විශ්වවිද්‍යාලයීය ක්‍රිකට් කණ්ඩායම නියෝජනය කරමින් 1972 සිට 1978 වසර දක්වා කටයුතු කළේය. 

ක්‍රිකට් ක්‍රීඩකයෙක්ව සිටිය දී ම ක්‍රිකට් විනිසුරු විභාගයට ද සහභාගී වෙන අජිත් 1975 වසරේ දී සුදුසුකම්ලත් ක්‍රිකට් විනිසුරුවරයෙක් ද වන්නේ ය. ශ්‍රී ලංකා – නවසීලන්ත තරගය විනිශ්චය කිරීමට ලැබුණේ නම්, ආචාර්ය අජිත් පෙරේරා මහතා කොළඹ රාජකීය විද්‍යාලයෙන් සහ කොළඹ විශ්වවිද්‍යාලයෙන් බිහි වූ පළමු ටෙස්ට් ක්‍රිකට් විනිසුරු වීමේ අභිමානයෙන් ද හෙබිය. 

“අජිත් ක්‍රිකට් ගැන බොහෝ දේවල් සෙව්වා, ඉගෙන ගත්තා. ලෝකයේ ක්‍රිකට් දැනුම තියෙන අය ඇසුරු කළා. ඔවුන් හා තර්ක කළා. අනතුරෙන් පස්සෙත් ඒ දේවල්වල වෙනසක් වුනේ නැහැ. හැබැයි ඉතිං, පළමු ටෙස්ට් තරගය අහිමි වීම ගැන ගොඩක් දුක් වුනා. අජිත්ගේ ජීවිතයේ දෙපා අහිමි වූනාට වඩා දුකක් ටෙස්ට් ක්‍රිකට් තරගය අහිමි වීමෙන් ලැබුවා. අපි වරක් ගාමිණී ලොකුගේ මහත්තයා ක්‍රීඩා ඇමති වෙලා සිටිද්දී අජිත් තෙවැනි විනිසුරු ලෙසින් එක් තරගයක හෝ කටයුතු කරන්න සලසා දිය හැකි ද යන්න සොයා බලන ලෙස ඉල්ලීම් කළා. නමුත් එවැන් හෝ අවස්ථාවක් ඔහුට ඊට පස්සේ ලැබුණෙ නැහැ. 

ඒ වගේම අජිත්ගේ ලොකු බලාපොරොත්තුවක් තිබුණා ක්‍රිකට් පරිපාලනයට හෝ උපදේශකයෙක් ලෙසින් එක්වෙමින් කටයුතු කරන්න. මොකද අජිත්ට ඒ වෙනුවෙන් ඕනවටත් වඩා දැනුමක් තිබුණා. නමුත් එච්චර දැනුවත් අජිත්ට ක්‍රිකට්වලින් සතුටු වෙන කිසිම දෙයක් ලැබුණෙ නැහැ. එයාම විසින් හදාගත්ත දේවල් හැරෙන්න“ නැවත පංති සඟයා කනිල් වෙත්තසිංහ මහතා පැවසුවා. 

ආචාර්ය අජිත් පෙරේරා මහතා, එංගලන්තයේ ක්‍රිකට් විනිසුරුවන්ගේ සහ ලකුණු සටහන්කරුවන්ගේ සංගමයේ සුදුසුකම්ලත් මෙරට පළමු ක්‍රිකට් විනිසුරුවරයා මෙන්ම ක්‍රිකට් ලකුණු සටහන්කරුවා වන්නේ ය. 

ඔහු එරට දී ජාත්‍යන්තර ක්‍රිකට් විනිසුරුවරයෙක් ලෙසින් 1985 දී සුදුසුකම් ලබන අතර ක්‍රිකට් ලකුණු සටහන්කරුවෙක් ලෙසින් 1987 දී සුදුසුකම් ලබා ගන්නේ ය. 1990 දී එංගලන්ත ප්‍රාන්ත ක්‍රිකට් තරගාවලියේ ලැංකෂයර් සහ සමර්සෙට් අතර සිව්දින තරගය විනිශ්චය කටයුතු කරන තරුණ අජිත් පෙරේරා ඉන් අනතුරුව එරට ප්‍රධාන තරගාවලි කිහිපයක දී ම ක්‍රිකට් විනිසුරුවරයෙක් ලෙසින් කටයුතු කරන්නේ ය. 

එය එකල වෙනත් ජාතිකයෙක්ට කලාතුරකින් ලැබෙන අවස්ථාවකි.  අනතුරුව 1990 දී ක්‍රිකට් විනිසුරුවන් සහ ලකුණු සටහන්කරුවන් පුහුණු කිරීමේ A පංතියේ නීති පුහුණු උපදේශකයෙක් ලෙස ද ඔහු සමත් වන්නේ ය.

එංගලන්ත ප්‍රාන්ත තරගයක දී – ඡායාරූප අයිතිය මුල් හිමිකරු සතුයි

අනතුරෙන් මාස කිහිපයකට පසුව බ්‍රිතාන්‍ය රාජකීය රසායන විද්‍යා සංගමය මගින් අජිත් පෙරේරා මහතා වැඩිදුර ප්‍රතිකාර සඳහා එරටට කැඳවා ගන්නේ ය. නමුත් ඔවුන්ට ද අජිත් පෙරේරා මහතාගේ සිහින ගොඩදාගත හැකි ලෙසින් සුවපත් කිරීමට හැකි වන්නේ නැත. එහෙත් ආබාධිත බවෙන් මිදී මානසික ශක්තිය වර්ධනය කර ගත් පුද්ගලයෙක් ලෙසින් ඔහු සමාජයට යොමු කරවන්නට ඔවුන් සමත් වන්නේ ය. 

ක්‍රිකට් සිහින හදවත කොනක රඳවා ගනිමින් සමාජයට පිවිසිය ද ආචාර්ය අජිත් පෙරේරාගේ මනසේ තිබුණේම ක්‍රිකට් ය. එහි ප්‍රතිඵලයක් ලෙසින් 1998 දී ක්‍රිකට් විනිසුරුවන් සහ ලකුණු සටහන්කරුවන් පුහුණු කිරීමේ නීති පුහුණු උපදේශකයන් අතරින් කාර්ය සාධක පරීක්ෂකවරයෙක් ලෙසින් ඔහු උසස් වීම් ලබන්නේ ය. 

ඒ අතර කාලයේ දී ග්‍රන්ථකරණයට ද පිවිසෙන ඔහු 1999 දී The Golden Era of Sri Lanka Cricket නමින් ද සහ Thinking Cricket නමින් ද වූ පොත් දෙක ලියා පළ කරන්නේ ය. ක්‍රීඩාවට කරන ලද අනුපමේය සේවය හේතුවෙන් ආචාර්ය අජිත් පෙරේරා මහතා 1999 දී The Star of Asia award for Excellence in Sports සම්මානයෙන් ද පිදුම් ලැබුවේ ය.

ඒ අතර ශ්‍රී ලංකාව ප්‍රථම වරට සත්කාරකත්වයෙන් සහභාගී වෙන 2000 යොවුන් ලෝක කුසලාන ක්‍රිකට් තරගාවලියේ ක්‍රිකට් ලකුණු සටහන්කරුවන් පුහුණු කිරීමේ වගකීම බාර වෙන්නේ ද ආචාර්ය අජිත් පෙරේරා මහතා ය. ඒ අනුව 1999 දී කොළඹ ටාජ් සමුද්‍රා හෝටලයේ දී සිව්දින පුහුණු පාඨමාලාවක් පවත්වමින් එම අභියෝගය ද ඔහු ජය ගන්නේ ය. එය ශ්‍රී ලංකා ක්‍රිකට් ලකුණු සටහන්කරුවන් සංගමයක් ලෙසින් ස්ථාපිත කිරීමේ අරමුණු බල ගැන්වුණ හමුවක් ද වූ අතර ඔවුන්ගේ සංගමය ආරම්භ කර ගත වූ 15 වැනි සංවත්සරයේ දී ‘Sri Lanka Cricket Scorers Awards Night 2016’ සම්මාන උළෙලේ දී විශේෂ සම්මානයෙන් ද පිදුම් ලැබුවේ ය. 

තවත් විශේෂාංග ලිපි:

ක්‍රිකට් පිටියේ අස්සක් මුල්ලක් නෑර ඇවිද ගිය ආචාර්ය අජිත් පෙරේරා මහතා එකි පුරුද්ද රෝද පුටුවේ සිටිය දී ද සිදු කළේ එසේ ය. ඒ වෙනුවෙන් ඔහු සිය කැමැත්තෙන්ම දායක වූයේ තම ප්‍රමුඛ කැමැත්ත ද ක්‍රිකට් නිසා වෙන්ම විය යුතුය.

එංගලන්තයේ දී ක්‍රිකට් විනිසුරුවරයෙක් ලෙසින් අභිෂේක ලබමින් – ඡායාරූප අයිතිය මුල් හිමිකරු සතුයි

ක්‍රිකට් ක්‍රීඩාවට අමතරව ක්ෂේත්‍ර ගණනාවක නිපුණයෙක් වූ ඒ මහතා  වෘත්තීකවේදියෙක් සහ වරලත් රසායන විද්‍යාඥයකු ලෙස ද මෙරට කර්මාන්ත ක්ෂේත්‍රයේ ඉහළ තනතුරු දැරූවෙකි. සිදු වූ අනතුර හේතුවෙන් පාද චලනයේ ක්‍රියාශීලිත්වය අඩු වූව ද රෝද පුටුව උපයෝගී කරගත් ඔහු එකි ක්ෂේත්‍රයන් හී පෙරටත් වඩා සක්‍රීයව කටයුතු කළේ ය. සක්‍රීය මිනිසෙක්ටත් වඩා ඔහු එවැන් තැන්වල දී සක්‍රීය විය. මේ ගුණාංගය ආචාර්ය අජිත් පෙරේරා මහතා තමන්ගේ ජීවිතයේ අවසන් කාලය දක්වාම පවත්වා ගෙන යෑම අගේ කළ යුතුය. 

තමන් විසින්ම පිහිටුවා ගන්නා ලද ‘ඉදිරිය’ නම් මානුෂීය සේවා සංවිධානයේ ප්‍රධාන විධායකවරයා මෙන්ම මහ ලේකම් ද ලෙසින් ද කටයුතු කරමින් ඔහු තමන් සේ ම සමාජයේ නොසැලකිල්ලට පාත්‍ර වූවන් වෙනුවෙන් හඬක් නැගුවේ ය. 

ඒ අනුව ඔහු 2009 වසරේ දී අධිකරණයට යන්නේ ආබාධිත සහිත වුවන්ගේ අයිතිවාසිකම් පිළිබඳ එක්සත් ජාතීන්ගේ සම්මුතිය ශ්‍රී ලංකාවේ ද ක්‍රියාත්මක කළ යුතුය යන්න අභියෝග කරමිනි. ඒ අනුව මහජන අවශ්‍යතා සඳහා ඉදි කරනු ලබන සියලු නව ගොඩනැගිලිවල ආබාධිත අයිතීන් පිළිබඳ නීති හා රෙගුලාසිවලට අනුකූලව විය යුතු බවට වන පෙත්සමක් ඔහු ඉදිරිපත් කරන්නේ ය. ඊට වානිජ්‍ය, ක්‍රීඩා, අධ්‍යාපනික, රාජ්‍ය පරිපාලනමය ආදි සියලු ගොඩනැගිලි ඇතුළත් කර තිබූ අතර ඔවුන්ගේ ප්‍රමුඛ ඉල්ලීම වී තිබුණේ ආබාධිත වූවන්ට යම් කාර්යයක් වෙනුවෙන් එම පොදු ස්ථානයකට පිවිසීමේ දී ඊට බාධාවකින් තොරව ප්‍රවිෂ්ට වීමේ පඩි රහිත මාර්ග පහසුකම් සැලසීම සහ එකී ආයතනවල පිවිසෙන එවැන්නන්ට අවහිරයකින් තොරව වැසිකිළි පහසුකම් සලසා දීමයි.  

මේ නඩුව වසර 10ක් ම අධිකරණයේ ඇසෙන්නේ ය. අවසානයේ පසුගිය වසරේ අප්‍රේල් මාසයේ දී එහි නඩුවෙන් ආචාර්ය අජිත් පෙරේරා මහතා ඇතුළු ඉදිරිය කණ්ඩායම ජයග්‍රහණය කරන්නේ ය. 

“ආබාධිත වීම ගැන ලෝක අවබෝධය සහ සංවේදීතාව මෑත කාලයේ බෙහෙවින් පුළුල් වී තිබෙනවා. එසේම තාවකාලික හෝ සදාකාලික ආබාධ සහිතව ජීවත් වන අයටත් අන් සියලු දෙනාටත් හිමි සමාජ අවස්ථා ලැබීමට මූලික මානව අයිතියක් ඇති බව ශිෂ්ට ලෝකය පිළිගන්නවා” ආචාර්ය අජිත් පෙරේරා මහතා මාධ්‍යයට පවසා තිබුණි.

ශ්‍රී ලංකා ක්‍රිකට් ලකුණු සටහන්කරුවන්ගේ සංගමයේ ඇගයීම් ලබමින් 2016 – ඡායාරූප අයිතිය මුල් හිමිකරු සතුයි

කෙසේ වෙතත් ආබාධිත බව හේතුවෙන් සමාජයෙන් ලැබෙන අනුකම්පාව පිළිබඳව ආචාර්ය අජිත් පෙරේරා මහතාගේ එතරම් කැමැත්තක් තිබී නැති බවකි පැවසෙන්නේ. “අජිත් අවසන් කාලයේ ගත කළේ අසනීප අම්මත්, ඔහුගේ ඥාතිවරියක් ද සමඟින්. ඔවුන් ද හරි හැටි තමන්ගේ කටයුතු කරගන්න බැරි අය. ඒ වුනත් අජිත් ඔවුන්ටත් සලකගෙන ඉතා හොඳින් හිටියා. ගෙදර වැඩට කවුරුත් ගෙන්න ගන්නවත් අජිත් කැමති වුනේ නැහැ. කවදාවත් මට මේක කරන්න බැහැ කියන තැන අජිත් හිටියේ නැහැ. කවුරුත් තමන්ට අනුකම්පා කරනවාට අජිත් කැමති නැහැ. නිතරම උත්සාහ කළේ සාමාන්‍ය කෙනෙක් ලෙසින් ජීවත් වෙන්න. මැරෙන තුරුම අජිත් දෙපා හිමි ශක්තිවන්තයෙක් ලෙසින් හිටියා” ආචාර්ය අජිත් පෙරේරා මහතාගේ පංති සඟයා තවත් වරෙක අප සමඟ පැවසුවා. 

මේ දිරිය මිනිසා වරක් දෙරණ මාධ්‍ය ආයතනය මගින් ද ඇගයුවේ ය. ඒ 2016 වසරේ දී සංවිධානය කළ විශිෂ්ටතම ශ්‍රී ලාංකිකයන්ට ප්‍රණාම පුද කිරීමේ උළෙලේ දී  නිහඬව පොදු උන්නතිය වෙනුවෙන් විශාල මෙහෙවරක යෙදෙන දිරිය ලාංකියන් අතර ‘වසරේ මිනිසා’ සම්මානයෙන් පුද කිරීමෙනි. 

ක්‍රිකට් ක්‍රීඩාවේ විවිධ ඉසව්වල විද්වතෙක් ලෙසින් කටයුතු කරමින් සහ මානුෂීය සේවයන් වෙනුවෙන් විවිධ ආයතන මගින් ඇගයීම්වලට ලක් වෙමින් ජීවිතයෙන් සමුගත් ඒ ගෞරවනීය සමාජ ක්‍රියාදරයාට ThePapare.com අපගේ උපහාරය ද පුද කරමු.  

>> තවත් විශේෂාංග ලිපි සඳහා පිවිසෙන්න <<