ඉන්දීය එංගලන්ත තුන්වැනි ටෙස්ට් තරගය එළඹෙන 24 වැනිදා අහමදාබාද්හිදී ආරම්භ වීමට නියමිතයි. තරගය සඳහා නිකුත් කළ ටිකට්පත් සියල්ල අලෙවි වී අවසන් බව ඉන්දීය ක්‍රිකට් ආයතනයේ සභාපති Saurav Ganguly ඊයේ (16) පවසා සිටියා.
මෙම තරගය සඳහා ප්‍රේක්ෂකයන්ට සහභාගී වීමට අවසර හිමිවන බව ඉන්දීය ක්‍රිකට් ආයතනය පසුගිය දා නිවේදනය කළා. ඒ අනුව ක්‍රීඩාංගණයේ ධාරිතාවයෙන් 50%ක ප්‍රමාණයක් සඳහා ටිකට්පත් අලෙවි කිරීමට පසුගිය දා කටයුතු කළා. මෙම තරගය දිවා රාත්‍රී ටෙස්ට් තරගයක් ලෙස පැවැත්වීමට නියමිතයි.
ඉන්දීය ක්‍රිකට් ආයතනය ටෙස්ට් තරගාවලිය ප්‍රේක්ෂකයන්ට් විවෘත කිරීමත් සමඟින් මෙවර ඉන්දීය ප්‍රිමියර් ලීග් තරගාවලිය සඳහාද ප්‍රේක්ෂකයන් සහභාගී වීමට අවසර ලැබෙනු ඇති බවට බොහෝ දෙනා මත පල කළා. ඒ පිළිබඳව අදහස් දක්වමින් ඉන්දීය ක්‍රිකට් ප්‍රධානියා පවසා සිටියේ ඒ පිළිබඳව අවසන් තීරණය එළඹෙන දින කීපය තුල දී ගැනීමට නියමිත බවයි.
“අහමදාබාද් ටිකට්පත් සියල්ල අලෙවි වුනා. අපිට ගොඩක් සතුටුයි සාමාන්‍ය පරිදි ක්‍රිකට් ක්‍රීඩාව පවත්වන්න පුළුවන් වීම ගැන” Ganguly මාධ්‍ය හමුවේ පවසා සිටියා.
“මම Jay Shah එක්ක මේ ගැන කතා කළා. ඔහු ඉතාමත් උනන්දුවෙන් ඉන්නවා තරගාවලිය ගැන. අපි වසර ගණනාවකට පස්සේ තමයි අහමදාබාද්හිදී තරගයක් පවත්වන්නේ.”
ඉන්දියාව මීට පෙර දිවා රාත්‍රී ටෙස්ට් තරගයක් සඳහා සත්කාරකත්වය සපයා ඇත්තේ 2019 වසරේ දීයි. ඒ කොල්කටා ක්‍රීඩාංගණයේ පැවති බංග්ලාදේශ ටෙස්ට් තරගාවලිය සඳහායි.
“මම Jay Shahට කිව්වා අපි කලින් දිවා රාත්‍රී ටෙස්ට් තරගයක් පවත්වලා තියනවා ඒ නිසා මේ තරගයත් පවත්වමු කියලා. අපිට ඕනේ ක්‍රීඩාගාරයේ හැම ආසනයක්ම පිරිලා තියෙනවා බලන්න. ඒකට ඉඟියක් තමයි මේ ටිකට්පත් අලෙවියෙන් ලබා දුන්නේ. විස්සයි විස්ස තරගාවලියත් අපි ප්‍රේක්ෂකයන්ට විවෘත කරන්න බලාපොරොත්තු වෙනවා” Ganguly තවදුරටත් පවසා සිටියා.
තවත් ක්‍රිකට් පුවත්:
- Kings XI Punjab නාමය වෙනස් වෙයි
- තවත් ක්‍රීඩකයින් තිදෙනෙක් Fitness කඩුල්ල පැනගනී
- 96 ලෝක ශූරයින් කිහිප දෙනෙකුගෙන් විශේෂ තීරණයක්!
- ක්‍රිකට් වෙනුවෙන් මුරලි ඇතුළු 12ක් අභියාචනාධිකරණයට
- සුපිරි තරු එක්වන ක්‍රිකට් සටනට ශ්‍රී ලංකාවෙන් තවත් තරු තුනක්
චෙන්නායි හි පැවැත්වුණු දෙවන ටෙස්ට් තරගය ද ප්‍රේක්ෂකයන්ට විවෘත කර තිබුණා. කොරෝනා වයිරසයෙන් අනතුරුව ඉන්දියාව තුල පැවති තරග අතරින් පළමුවෙන් ප්‍රේක්ෂකයන්ට විවෘත වූ තරගය එයයි.
මෙවර ඉන්දීය ප්‍රිමියර් ලීග් තරගාවලිය එළඹෙන අප්‍රේල් පළමු සතිය තුල ආරම්භ කිරීමට ඉන්දීය ක්‍රිකට් ආයතනය මේ වන විට සැලසුම් කර තිබෙනවා. එම තරගාවලිය සඳහා ප්‍රේක්ෂකයන්ට සහභාගී වීමට අවසර ලබා දෙන්නේ දැයි මෙතෙක් අවසන් තීරණයක් ගෙන නැහැ.
“මේ අවුරුද්ද සුවිශේෂී අවුරුද්දක් වේවි. අපි දැනට පරීක්ෂා කරමින් ඉන්නවා ඉන්දීය ප්‍රිමියර් ලීග් තරගාවලියට ප්‍රේක්ෂකයන් සහභාගී කරගන්න පුළුවන් ද කියලා. ඒ ගැන අවසන් තීරණය ඉක්මනින් ගන්න බලාපොරොත්තු වෙනවා.”
මෙවර ඉන්දීය ප්‍රිමියර් ලීග් තරගාවලියේ ක්‍රීඩක වෙන්දේසිය එළඹෙන සතියේ දී පැවැත්වීමට නියමිතව තිබෙනවා.
“මෙවර ක්‍රීඩක වෙන්දේසිය එතරම් ලොකු එකක් නෙමෙයි. ඒත් සමහර කණ්ඩායම්වලට ක්‍රීඩකයන් රැසක් මිල දී ගන්න වෙනවා. විශේෂයෙන් Chennai Super Kings කණ්ඩායම සහ Kolkata Kinght Riders කණ්ඩායමට.”
තවදුරටත් අදහස් දක්වමින් Saurav Ganguly පවසා සිටියේ ඉන්දියාව තුල පැවැත්වෙන සෑම ටෙස්ට් තරගාවලියක් සඳහාම දිවා රාත්‍රී ටෙස්ට් තරගයක් ඇතුළත් කිරීමට බලාපොරොත්තු වන බවයි.
“අපි බලාපොරොත්තු වෙනවා දිවා රාත්‍රී ටෙස්ට් තරගවලට තියන ආකර්ෂණය වැඩිකරන්න. සෑම තරගාවලියකටම තරගයක් ඇතුළත් කරන්න අපි සැලසුම් කරලා තියනවා. මම හිතනවා මේ දිවා රාත්‍රී ටෙස්ට් තරග ටෙස්ට් ක්‍රීඩාවේ අනාගතය කියලා. ටෙස්ට් තරගවල ආකර්ෂණීය බව වැඩි කරන්න මේ තරග ගොඩක් වැදගත් වේවි.”
ඉන්දීය ක්‍රිකට් ප්‍රධානියා වන Saurav Ganguly පසුගිය ජනවාරි මාසයේ දී හෘද සැත්කම් දෙකකට මුහුණ දුන් අතර මේ වන විට යහපත් සෞඛ්‍ය තත්ත්වයෙන් පසුවෙනවා.
“මම දැන් සනීපෙන් ඉන්නවා. මම දරුණු අවස්ථාවකට මුහුණ දුන්නේ. මම හිතනවා මම වාසනාවන්තයි කියලා ආයෙත් සුවය ලබන්න. මම දැන් සම්පූර්ණයෙන්ම සුවය ලබලා ඉන්නේ” ඔහු පවසා තිබෙනවා.
තරග 4කින් සමන්විත ඉන්දීය එංගලන්ත ටෙස්ට් තරගාවලියේ තරග දෙකක් මේ වන විට පවත්වා තිබෙනවා. ඉන් එක් තරගයක් එංගලන්ත කණ්ඩායම ජයග්‍රහණය කල අතර අනෙක් තරගය ඉන්දීය කණ්ඩායම ජයග්‍රහණය කළා.
>> තවත් ක්‍රිකට් පුවත් සඳහා පිවිසෙන්න <<
 පවසා සිටියා.){kind=link}