එක් තරගාවලියකට පමණක් සීමා වූ 2020 වසරෙන් පසුව 2021 නව වසර සඳහා පැවැත්වීමට සැලසුම් කර ඇති මලල ක්‍රීඩා තරගාවලිවල කාලසටහන ශ්‍රී ලංකා මලල ක්‍රීඩා සංගමය විසින් ප්‍රකාශයට පත් කර ඇත.
ඔලිම්පික් ක්‍රීඩා උළෙල මෙම වසරේ පැවැත්වීමට නියමිතව ඇති නිසාවෙන් මෙරට ක්‍රීඩක ක්‍රීඩිකාවන් හට දේශීය මෙන්ම ජාත්‍යන්තර තරගාවලි රැසකට ද මෙම වසර තුළ දී සහභාගි වීමට වැඩි ඉඩකඩක් ලැබේ.
වසරේ මුල්ම ජාතික තලයේ තරගය ලෙස ජාතික මලල ක්‍රීඩා උළෙලට සමගාමීව පවත්වන මැරතන් තරගය පෙබරවාරි 06 වැනිදා නියමිතව ඇති අතර ජාතික මලල ක්‍රීඩා ශූරතාවය අප්‍රේල් මස 08 වැනිදා සිට 10 වැනිදා දක්වා පැවැත්වීමට නියමිතව ඇත.
එම තරගාවලියට පෙර මෙම වසරෙ මලල ක්‍රීඩා තේරීම් තරග කිසිවක් පැවැත්වීමට තීරණය කර නොමැති අතර යුද හමුදා මලල ක්‍රීඩා තරගාවලිය මාර්තු මස 22 වැනිදා සිට 24 වැනිදා දක්වා පැවැත්වීමට ද සැලසුම් කර ඇත.
ශ්‍රී ලංකා ජාතික සංචිතයට අයත් ක්‍රීඩක ක්‍රීඩිකාවන් රැසක් යුද හමුදා කණ්ඩායම නියෝජනය කරන නිසාවෙන් ඔවුන් රැසක් එම තරගාවලියේ දී තරග වැදීමට සූදානම්ව ඇති බව ද වාර්තා වේ.
අප්‍රේල් මාසයේ පවත්වන 99 වැනි ජාතික මලල ක්‍රීඩා ශූරතාවය මෙම වසරේ පැවැත්වෙන බොහෝ තරගාවලිවල සුදුසුකම් ලබාගැනීමේ තරගාවලියක් ලෙස පැවැත්වෙනු ඇත.
එහි දී දස්කම් දක්වන ක්‍රීඩක ක්‍රීඩිකාවන් හට මෙම වසරේ මැයි මස 20 සිට 23 දක්වා චීනයේ පැවැත්වීමට නියමිතව ඇති ආසියානු මලල ක්‍රීඩා ශුරතාවයට සහභාගී වීමේ වරම් හිමිවන අතර එම මස 27 සිට 29 දක්වා පැවැත්වෙන Indoor and Martial Arts Games තරගාවලිය සඳහා සහභාගි වීමට ද මෙරට ක්‍රීඩක ක්‍රීඩිකාවන්ට අවස්ථාව හිමි වනු ඇත.
තවත් මලල ක්‍රීඩා පුවත්:
- ඩිල්ෂි, නිමාලි සහ ගයන්තිකා ආසියාවේ පෙරමුණට
- වසරේ වේගවත්ම ක්‍රීඩකයා හිමාෂ, ක්‍රීඩිකාව අමාෂා
- ජාතික සැණකෙළියේ දස්කම් දැක්වූ දෙදෙනෙකුට අවුරුදු තෑගි
- නදීෂා සහ කාලිංගගේ දස්කම් සමඟින් ජාතික සැණකෙළිය නිමයි
ජාතික තරගාවලිය ඇතුළු මෙම තරගාවලි ත්‍රිත්වයෙන් මෙරට ක්‍රීඩක ක්‍රීඩිකාවන් හට ජූලි මාසය ආරම්භ වීමට නියමිතව ඇති 32 වැනි ගිම්හාන ඔලිම්පික් උළෙල ඉලක්ක කරගනිමින් සිය දස්කම් වර්ධනය කරගනිමින් ලෝක වර්ගීකරණයේ ඉහළට පැමිණීමට විශාල අවස්ථාවක් හිමි වේ.
එමෙන්ම ලෝක සහය දිවීමේ ශූරතාවය මැයි 01 සිට 02 දක්වා පෝලන්තයේ දී පැවැත්වීමට නියමිතව ඇති අතර එහි දී මුල් ස්ථාන 8 ලබා ගන්නා කණ්ඩායම් සියල්ලමට ඔලිම්පික් නියෝජනය කිරීමේ වරම් හිමි වේ.
එම තරගාවලිවලට අමතරව ඔලිම්පික් උළෙලට ප්‍රථම තවත් ජාත්‍යන්තර තලයේ තරගාවලි රැසකට මෙරට ක්‍රීඩක ක්‍රීඩිකාවන්ට සහභාගි වීමට අවස්ථාව ලබා දීමට මලල ක්‍රීඩා සංගමය කටයුතු කරමින් ඇති බව ද වාර්තා වේ.
ඔලිම්පික් ක්‍රීඩා උළෙලෙන් පසු ලබන වසර සඳහා මලල ක්‍රීඩා සංචිතය තෝරාගැනීම වෙනුවෙන් පවත්වන ජාතික තේරීම් තරග ඔක්තෝබර් මස 16 සහ 17 පැවැත්වෙන අතර එම තරග 2022 පොදුරාජ්‍ය මණ්ඩලීය ක්‍රීඩා උළෙල සඳහා සුදුසුකම් ලබා ගැනීමේ තරග ලෙස ද පැවැත්වේ.
එමෙන්ම ජාතික කනිෂ්ඨ මලල ක්‍රීඩා ශූරතාවය මැයි මස මුල් සතියේ දී පැවැත්වීමට සැලසුම් කරමින් ඇති අතර එම තරගාවලිය අගෝස්තු මස 17 සිට 22 දක්වා පැවැත්වෙන ලෝක කනිෂ්ඨ මලල ක්‍රීඩා උළෙල සහ නොවැම්බර් මාසයේ පැවැත්වෙන ආසියානු යොවුන් ක්‍රීඩා උළෙල සඳහා සුදුසුකම් ලැබීමේ තරග ලෙස ද ක්‍රියාත්මක වේ.
මෙම තරගාවලිවලට අමතරව ජාතික මහා ක්‍රීඩා උළෙල, ජාතික යොවුන් ක්‍රීඩා උළෙල වැනි තරග රැසක් මෙම වසරේ දී පැවැත්වීමට නියමිතව ඇති නමුත් තවමත් ඒ සඳහා නිශ්චිත කාලවකවානු පිළිබඳව දැනුම් දී නොමැත.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
