තිහාරිය යූත් ක්‍රීඩකයින්ට ප්‍රහාරයක්

1064
Thihariya Youth players

බදුල්ල වින්සන්ට් ඩයස් ක්‍රීඩාංගණයේ දී පැවති තිහාරිය යූත් ක්‍රීඩා සමාජය සහ කොම්රේඩ්ස් ක්‍රීඩා සමාජය අතර තරගයක් අතරතුර දී, තිහාරිය යූත් ක්‍රීඩකයින්ට පිරිසක් විසින් ප්‍රහාරයක් එල්ල කර ඇත. 2017 ප්‍රිමියර් ලීග් පළමු කාණ්ඩයේ තරගාවලියේ තරගයක් අතරතුර මෙය සිදු වී ඇත.

වාර්තා වන අන්දමට තරගය අවසන් වන්නට මිනිත්තු කිහිපයක් ඉතිරිව තිබිය දී තිහාරිය යූත් කණ්ඩායමේ ක්‍රීඩකයෙක් හට රතු කාඩ්පතක්, විනිසුරුවරයා විසින් නිකුත් කර ඇති අතර, ඒත් සමඟම මෙම සිදුවීම සිදු වී ඇත. මෙහි දී විනිසුරුවරයාගේ තීරණය සම්බන්ධයෙන් තිහාරිය යූත් ක්‍රීඩකයින් විනිසුරුවරයාගෙන් ප්‍රශ්න කරන විට ප්‍රේක්ෂකයින් ක්‍රීඩා පිටියට පැමිණ තිහාරිය යූත් කණ්ඩායමේ ක්‍රීඩකයින් හට පහර දී ඇත. එමෙන්ම ප්‍රේක්ෂකයින් ක්‍රීඩා පිටිය ආක්‍රමණය කිරීමෙන් අනතුරුව තිහාරිය යූත් ක්‍රීඩකයින් විනිසුරුවරයා හට පහර දී ඇති බව ද වාර්තා වේ

“තරගය ආරම්භයේ දීත් අපි විනිසුරුවරයාගෙන් ඇහුවා ඇයි කොම්රේඩ්ස් ක්‍රීඩා සමාජයෙන් කිසිම ආරක්‍ෂක විධි විධානයක් සලසලා නැත්තේ කියලා. නමුත් ඔහු ඒක මඟහැරලා තරගය ආරම්භ කළා. තරගය අතරතුර දී අපේ ක්‍රීඩකයින්ට ගල්වලින් ප්‍රහාර එල්ල වුනා. පසුව ඔවුන් ගෝලයක් වාර්තා කළත් එහි දී ‘Offside’ නීතිය උල්ලංඝනය වූ බවට විනිසුරුවරයා සංඥා කළා. නමුත් ප්‍රේක්ෂකයින් එල්ල කළ පීඩනය නිසා ඒක ගෝලයක් ලෙස විනිසුරුවරයා විසින් නැවතත් සංඥා කළා.”

තිහාරිය යූත් ක්‍රීඩා සමාජයේ ලේකම් මොහොමඩ් අස්කර් මහතා ThePapare.com සමඟ අදහස් දක්වමින් පැවසීය.

ජාවා ලේන් හමුවේ පොලිසිය පරාජය වේ

2017 Dialog ශූරයින්ගේ කුසලාන පාපන්දු තරගාවලියේ දෙවන සතියේ තරගයක් ලෙස පොලිස් පාක්…

“ක්‍රීඩා පිටියේ කිසිම ආරක්‍ෂක විධි විධානයක් නැතිව විනිසුරුවරයා තරගයේ දෙවන අර්ධයත් ක්‍රීඩා කරන්න තීරණය කළා. ඔහු හොඳටම දැනගෙන සිටියේ ක්‍රීඩා පිටියේ තරගය පවත්වාගෙන යන්න සුදුසු තත්වයක් තිබුණේ නැහැ කියලා. තරගය ආරම්භ කිරීම පවා නොකර ඉන්න තිබුණේ. ඒ නිසා අපි මෙම සිදුවීම සම්බන්ධයෙන් ශ්‍රී ලංකා පාපන්දු සම්මේලනය වෙත නිල වශයෙන් පැමිණිල්ලක් ඉදිරිපත් කරනවා.”

මොහොමඩ් අස්කර් මහතා තවදුරටත් ප්‍රකාශ කළේය.

ශ්‍රී ලංකා පාපන්දු සම්මේලනයේ (FFSL) නීති රීතිවලට අනුව තරගය පවත්වන ක්‍රීඩා සමාජය තරගය වෙනුවෙන් අවශ්‍ය ආරක්‍ෂක විධි විධාන සැලසීමට කටයුතු කළ යුතු අතර පවතින ආරක්‍ෂක හෝ තරගයේ පවතින තත්වය මත තරගය ආරම්භ කිරීමේ හෝ නැවැත්වීමේ තනි අධිකාරිය විනිසුරුවරයා සතුව පවතී.

මෙම සිදුවීම සම්බන්ධයෙන් අදහස් විමසීමට කොම්රේඩ්ස් ක්‍රීඩා සමාජයේ සහ ශ්‍රී ලංකා පාපන්දු සම්මේලනයේ නිලධාරියෙක් සම්බන්ධ කර ගැනීමට අප උත්සාහ කළ ද එය සාර්ථක වූයේ නැත.  

>> තවත් පාපන්දු පුවත් සඳහා පිවිසෙන්න – පාපන්දු ක්‍රීඩා පිටුවට <<