සුවිසල් නම් අතරින් සැඟව ගිය අපේ හෙල්ල විසිකිරීමේ ශූරයා

160
Javelin Thrower Sam Joseph

මෙරට ක්‍රීඩාවන් හා සසඳා බැලීමෙ දී මෙරටට වැඩිම ජාත්‍යන්තර ජයග්‍රහණ ප්‍රමාණයක් සහ පදක්කම් ප්‍රමාණයක් දිනා දීමට සමත් වූ ක්‍රීඩාව මලල ක්‍රීඩාවයි. නමුත් මලල ක්‍රීඩාවට මෙරටින් ලැබෙන සහයෝගය ඉතාමත් අසතුටුදායක එකකි.

එම නිසාවෙන් දිනෙන් දින ප්‍රේක්ෂකයන්ගෙන් දුරස් වන මලල ක්‍රීඩාවේ අතීතයේ දී ඉහළ දස්කම් දැක්වීමට සමත් වූ ක්‍රීඩක ක්‍රීඩිකාවන් බොහෝමයක් පිළිබඳව මතකය දිනෙන් දින මැකී යාම ඉතා කනගාටුවට කරුණකි.

1950 දශකයේ සුන්දර අවිස්සාවේල්ල ප්‍රදේශයේ පිහිටි සාන්ත මරියා විද්‍යාලයේ එක් පන්ති කාමරයක ගුරුවරුන්ට ඉතාම දැඩි හිසරදයක් වූ, සෑමවිටම ගුරුවරුන්ගේ උදහසට සහ දඬුවමට ලක් වූ කරදරකාරී සිසුන් දෙදෙනෙකු විය.

එම කරදරකාරී වැඩකටයුතු නිසාවෙන් සෑම සතියකම කාලපරිච්ඡේද ගණනාවක්ම පන්ති කාමරයෙන් පිටත කාලය ගත කිරීමට වූ මොවුන් දෙදෙනාගේ විනෝදාංශය වූයේ කුඩා ගල් කැබලි ගසා වෙල් වල සිටි කොකුන් පන්වා දැමීම වූ අතර ඔවුන් දෙදෙනා අතරින් එක් අයෙකු මෙරට බිහි වූ ශ්‍රේෂ්ඨතම කඩුලු පැනීමේ ශූරයෙකු වූ මාෂල් පෙරේරාය.

අනෙකා නැතහොත් මෙහි කතා නායකයා වසර විසි හයක් මුළුල්ලේ මෙරට හෙල්ල විසි කිරීමේ වාර්තාවට හිමිකම් කියූ ශ්‍රේෂ්ඨයෙකු වන සෑම් ජෝශප් ය.

සාන්ත මරියා විද්‍යාලයේ 50 දශකයේ සිටි විදුහල්පතිවරයා වූ ජෝශප් මහතාගේ පුත්‍රයෙකු වූ සෑම් ජෝශප් කුඩා කල සිට සිටම ඉතා දඟකාරී දරුවෙකු වූ අතර කුඩා කල සිටම ක්‍රීඩාවෙහි අති දක්ශයෙකු ද විය.

එවකට මලල ක්‍රීඩාවේ ශූරයන් තනන මැෂිම ලෙස විරුදාවලිය ලත් සාන්ත මරියා විද්‍යාලයේ ක්‍රීඩා ගුරුවරයා වූ ක්ලීටස් සුරවීර මහතාගේ මගපෙන්වීම යටතේ ඉතා ඉක්මනින්ම සිය දස්කම් වැඩි දියුණු කර ගත් සෑම් 1950 දශකයේ අග භාගයේ දී සබරගමු පළාතේ හෙල්ල විසිකිරීමේ කනිෂ්ඨ ශූරයා වීමට ද සමත් විය.

පසුව සිය පියානන් හට ලැබූ ස්ථාන මාරුව නිසාවෙන් කොළඹ සාන්ත ජෝසප් විද්‍යාලයට ඇතුළත් වීමට වරම් ලැබූ සෑම් ජෝශප් වැඩි කලක් යාමට මත්තෙන් මෙරට පාසල් ක්‍රීඩා පිටියේ සියලූම තරගාවලිවල දී ජයග්‍රහණය ලබා ගනිමින් හෙල්ල විසි කිරීමේ ඉසව්වේ ජයකෙහෙළි නංවන්නට විය.

එම ජයග්‍රහණ සමඟින් මෙරට බිහි වූ විශිෂ්ටතම පුහුණුකරුවෙකු වූ ඇන්තනී අබේසිංහයන් හා එක්ව සිය ඉදිරි ක්‍රීඩා ගමන ඇරඹූ සෑම් ජෝශප් ඇන්තනී ගුරුමහතාගේ මගපෙන්වීම යටතේ සිය දස්කම් වැඩි දියුණු කරගනිමින් 1970 වසරේ ඔක්තෝබර් මස 06 වැනිදා හෙල්ල විසි කිරීම ඉසව්වේ මීටර් 64.09 (අඩි 210 අඟල් 3) දස්කමක් දක්වමින් මුල්ම වරට ජාතික වාර්තාව බිඳ හෙළන්නට සමත් විය.

එතැන් පටන් ජාතික මලල ක්‍රීඩා පිටියේ හෙල්ල විසි කිරීම ඉසව්ව තමන්ගේ කර ගත් සෑම් පිළිවෙළින් 1970 නොවැම්බර් මස 22 වැනිදා මීටර් 65.07ක්, 1972 මාර්තු 26 වැනිදා මීටර් 66.01ක් සහ 1972 අප්‍රේල් 15 වැනිදා මීටර් 68.36ක දස්කමක් දක්වමින් තමන්ගේම වාර්තාව තෙවරක් බිඳ හෙළීමට ද සමත් විය.

එමෙන්ම 1973 වසරේ පේරාදෙණිය විශ්වවිද්‍යාලයේ පැවති තරගයක් අතරතුර දී සෑම් ජෝශප් විසින් හෙල්ල විසි කිරීම ඉසව්වේ මීටර් 71.08ක වාර්තාගත දුරක් වාර්තා කිරීමට සමත් වූවත් එම දක්ෂතාවය ශ්‍රී ලංකා වාර්තාවක් ලෙස නිල වශයෙන් ඇතුළත් වූයේ නැත.

නමුත් මෙරට දී නොකඩවා දැක්වූ දස්කම් නිසාවෙන් 1974 වසරේ බැංකොක් නුවර දී පැවති 7 වැනි ආසියානු ක්‍රීඩා උළෙල සඳහා සහභාගී වීමට සෑම් වරම් ලැබුවත් එහි දී ඇති වූ තාක්ෂණික දෝෂයක් නිසාවෙන් ඔහුට ස්ථානයක් ලබා ගැනීමේ අවස්ථාව අවාසනාවන්ත ලෙස අහිමි වී ගියේය.

තවත් විශේෂාංග ලිපි:

පසුව ක්‍රීඩා අමාත්‍යාංශයේ ක්‍රීඩා නිලධාරියෙකු ලෙස ද සේවය කළ සෑම් ජෝශප් පසු කාලයක ස්ථීර පදිංචිය ලෙස මෙරට අතහැර ඕස්ට්‍රේලියාව වෙත පිටත් වූවත් ඔහු විසින් පිහිටවූ හෙල්ල විසි කිරීමේ ජාතික වාර්තාව 1996 වසර තෙක් වසර 26ක් මුළුල්ලේ බිඳ හෙළීමට කිසිවෙකුට හැකි වූයේ නැත.

මෙරට අතහැර ඕස්ට්‍රේලියාව බලා පිටත් වූවත් මෙරටට සහ අවිස්සාවේල්ල ප්‍රදේශයට දැඩි ඇල්මක් දැක්වූ සෑම් ජෝශප් මහතා වරින් වර මෙරටට පැමිණීමට කටයුතු කළ අතර පසු කලෙක ඔහු නැවත වරක් මෙරට ස්ථීර පදිංචියට පැමිණෙන්නේ මෙරටට දැක්වූ විශාල ඇල්ම නිසාවෙනි.

එලෙස පැමිණීමෙන් පසු පන්නිපිටිය ප්‍රදේශයේ පදිංචි වූ සෑම් මහතා තමන් බොහෝ සෙයින් ඇලුම් කළ අවිස්සාවේල්ල ප්‍රදේශය ගැන සිය මිතුරෙකුට පැවසුවේ මෙලෙසිනි,

“අවිස්සාවේල්ලේ මම කැමති එදා සිට තවමත් වෙනස් වෙලා නැති අපේ ඉස්කෝලේ පැත්ත, ඒ ගොඩනැගිලි, පන්සල, කුඹුරු, ඉබ්බන්, බෝක්කුව වගේ දේවල් දකිද්දී හිතට පුදුම සහනයක් දැනෙන්නේ. නැවත ඉපදෙනවා නම් මම කැමතිම එදා ඒ අවිස්සාවේල්ලේ ඉපදෙන්නයි” 

මෙරට ක්‍රීඩාවට මෙන්ම සමාජයට විවිධ ආකාරයෙන් අමිල සේවයක් කළ සෑම් ජෝශප් මහතා පිළිබඳව මතකය රැඳී ඇත්තේ බොහෝ ටික දෙනෙකුගේ සිත්වල පමණි. ක්‍රිකට් ක්‍රීඩකයෙකු හැර මෙරට බොහෝ ක්‍රීඩාවල විශිෂ්ටයන් බොහෝමයකට අත්වන ඉරණම මෙයයි.

එක් ක්‍රීඩාවකට පමණක් සීමා නොවී සෑම ක්‍රීඩාවකටම නිසි තැන ලබා දී ක්‍රීඩාවන් වෘත්තීය මට්ටමට ගෙන ඒමට අවශ්‍ය කටයුතු සිදු කළහොත් මෙරට ක්‍රීඩාවට ජාත්‍යන්තර තලයේ විශාල නාමයක් ලබා ගැනීමට හැකි වී සෑම් ජෝශප් වැනි විශිෂ්ටයන් පිළිබඳව ඉතිහාසයේ ඉහළින්ම සටහන් වනු ඇත. 

සෑම් ජෝශප් පිළිබඳව තොරතුරු අන්තර්ජාලය මගින් උපුටා ගැනීමක් නිසාවෙන් එහි හිමිකම මුල් කතෘවරයා සතු වේ.

>> තවත් විශේෂාංග ලිපි සඳහා පිවිසෙන්න <<