මෙවර ඔලිම්පික් උළෙලට අලුතින්ම එක්වූ සත් සාමාජික රග්බි ඉසව්ව සඳහා සහභාගී වූ ජනප්‍රියම රග්බි තරුවකට එක් තරගයකින්ම තම ඔලිම්පික් ගමන නිමා කරන්නට සිදු විය. නවසිලන්ත ඕල් බ්ලැක්ස් රග්බි කණ්ඩායමේ සනී බිල් විලියම්ස් ඒ ක්‍රීඩකයායි. ඔහුට මෙසේ තරගාවලියම අහිමි වන්නේ, පිරිමි සත්සාමාජික රග්බි පළමු වටයට අදාලව ජපානය සමග පැවති තරගයේ දෙවන අර්ධය තුළදී ඇතිවූ පාදයේ ආබාධයක් හේතුවෙනි.
පසුගිය ලිපි: මැතිව්ගේ ගමනත් නවති
ලෝක ශූර නවසිලන්ත කණ්ඩායම නියෝජනය කළ ක්‍රීඩකයන් අතරින් ඔලිම්පික් සත් සාමාජික රග්බි තරග සඳහා සහභාගී වූ එකම ක්‍රීඩකයා වූයේද විලියම්ස් පමණයි. ඔහුගේ සේවය කණ්ඩායමට අහිමි වීමත් සමග නවසීලන්තය තවත් අගාධයකට ඇද දමමින් පළමු තරගයෙන් ලකුණු 14-12ක් ලෙස ප්‍රබල නවසීලන්තය පරදවන්නට ජපාන කණ්ඩායම සමත් විය. මේ අනුව ඕල් බ්ලැක්ස් ඉදිරි ගමන ඉතා අසීරු එකක් වනු ඇති.
2015 රග්බි ලෝක කුසලානය දිනාගත් නවසීලන්ත රග්බි කණ්ඩායමේ ප්‍රබල සාමාජිකයෙක් වූ සනී බිල් විලියම්ස්, ලොව පුරා අතිශය ජනප්‍රිය තරුවක් බවට පත් වූයේ තම ගෙල පැළඳි රන් පදක්කම පිටිය මැදට පැමිණීමේදී පොලීසියේ ප්‍රහාරයකට ලක්වූ දරුවෙකුට ලබා දීම හේතුවෙනි.
අංක එකේ දෙදෙනාම කඳුළු මැදින් ඉවතට
ලොව අංක එකේ ටෙනිස් ක්‍රීඩිකා ඇමරිකාවේ සෙරීනා විලියම්ස් හටත් ඔලිම්පික් පදක්කමක බලාපොරොත්තු කඳුලින් දිය කර හරින්නට සිදු විය. ඒ කාන්තා කේවල ටෙනිස් තරග ඉසව්වේ තුන්වන වටයේ තරගයකදී යුක්රේන ක්‍රීඩිකා එලීනා ස්විටෝලීනා හමුවේ අනපේක්ෂිත පරාජයක් ලැබීමෙන් පසුවයි. ජගත් ටෙනිස් ක්‍රීඩිකාවන් වර්ගීකරණයේ 15 වන ස්ථානයේ පසුවන එලීනා මේ තරගය ජයගත්තේ ලකුණු 6-4ක් සහ 6-3ක් ලෙසිනි.
මෙම පරාජය විලියම්ස් පවුලේම පදක්කම් බලාපොරොත්තුවේ අවසානය බවට පත් වූයේ මීට පෙර කාන්තා යුගල ටෙනිස් ඉසව්වේ පළමු වටයේදීම සෙරීනා සහ වීනස් විලියම්ස් සොයුරියන් පරාජය වීම හේතුවෙනුයි.
ලොව අංක එකේ ටෙනිස් ක්‍රීඩක සර්බියාවේ නොවැක් ජොකොවිච් හටද කඳුළු මැදින් ඔලිම්පික් ඉදිරි ගමන අවසන් කරන්නට සිදු වුණේ පසුගිය 7 වනදා පැවති පළමු වටයේ තරගයකදී ආර්ජන්ටිනාවේ ජුවාන් මාර්ටින් ඩෙල් පෝර්ටෝ හමුවේ පරාජය වීම හේතුවෙනි. සෙරීනා මෙන්ම ජොකොවිච් ද, ඔලිම්පික් ටෙනිස් පිටියෙන් නික්ම ගියේ පාලනය කර ගත නොහකිවූ හැඟීම් කඳුළු බවට පත් කරමිනුයි.
විම්බල්ඩන් ශූර ඇන්ඩි මරේ සහ ඔහුගේ සොයුරු ජේමි ට පිරිමි යුගල ඉසව්ව පළමු වටයෙන්ම අවසන් කරන්නට සිදු වූයේ බ්‍රසීල ක්‍රීඩකයන් දෙපලක් හමුවේයි. රොජර් ෆෙඩරර් මෙවර ඔලිම්පික් උළෙලට සහභාගී වූයේ නැත. මේ අනුව පිරිමි තරග අංශයේ ප්‍රධාන තරුවක් ලෙස දැනට ඉතිරිව සිටින්නේ ස්පාඥ්ඥයේ රෆායල් නඩාල් පමණයි.
බර ඉසිලීමන් ලෝක වාර්තා 2ක්.
කාන්තා කිලෝග්‍රෑම් 63 බර පන්තියේ බර එසවීමේ ඉසව්වෙන් ලෝක වාර්තා 2ක් අලුත් කරන්නට චීනයේ වෙයි ඩෙන්ග් සමත් විය. ඇය මේ දස්කම දැක්වූයේ අදාළ බර පන්තියේ අවසන් වටයේදී කිලෝග්‍රෑම් 262ක බරක් ඔසවමිනි. මේ දක්ෂතාව හමුවේ බිඳ වැටුණේ චීන තායිපේ ක්‍රීඩිකාවක් කිලෝග්‍රෑම් 261ක් ඔසවමින් පිහිටුවා තිබූ වාර්තාවයි.
වෙයි ඩෙන්ග් ක්ලීන් ඇන්ඩ් ජර්ක් ක්‍රමයට එසවූ කිලෝග්‍රෑම් 147ක බර ප්‍රමාණයත් නව ලෝක වාර්තාවක් ලෙස ඉතිහාසයට එක් විය.
ඔලිම්පික් රජු පදක්කම් පැස තවත් තර කර ගනී
සියවසකට අධික නූතන ඔලිම්පික් ඉතිහාසයේ බිහිවූ සාර්ථකම ක්‍රීඩකයා බවට අවිවාදිතව පිළිගැනෙන ඇමරිකාවේ මයිකල් පෙල්ප්ස් තම රන් පදක්කම් එකතුව 21ක් දක්වා ඉහල දමා ගැනීමට සමත් විය. ඒ ඊයේ දිනය තුල තවත් රන් පදක්කම් 2ක් දිනා ගනිමිනි.
පෙල්ප්ස් ඊයේ මීටර් 200 X 4 නිදහස් ආර සහය පිහිනුම් ඉසව්ව ජයගත් ඇමරිකානු කණ්ඩායමේ ප්‍රධාන සාමාජිකයෙක් ලෙස සිය 20 වන රන් පදක්කම දිනා ගන්නා ලදී. ඔහු 21වන රන් පදක්කම දිනා ගත්තේ මීටර් 200 සමනල ආර ඉසව්ව ජය ගනිමිනුයි. එම කේවල ඉසව්ව අවසන් කරන්නට පෙල්ප්ස් ගත කල කාලය මිනිත්තු 1යි තත්පර 53.36ක්.
මයිකල් පෙල්ප්ස් මේ වන විට ඔලිම්පික් උළෙල 4කදී රන් පදක්කම් 21ක් ඇතුළු සමස්ත පදක්කම් 25ක් දිනාගෙන ඇති අතර ඔලිම්පික් ඉතිහාසයේ වැඩිම රන් පදක්කම් ලාභීන්ගේ ලයිස්තුවේ දෙවන ස්ථානයට හිමිවී ඇත්තේ රන් පදක්කම් 9ක් පමණයි.
ප්‍රවේශ පත්‍ර ජාවාරමක් හෙළිවෙයි
රියෝ ඔලිම්පික් ප්‍රවේශ පත්‍ර නීති විරෝධී ලෙස වැඩි මිලට අලෙවි කළ සමාගමක නියෝජිතයින් දෙදෙනෙක් බ්‍රසීල පොලීසිය විසින් අත්අඩංගුවට ගෙන ඇත. THG ස්පෝර්ට්ස් නම් යුරෝපීය ආයතනයක අධ්‍යක්ෂවරයෙක් වන කෙවින් මාලන් නමැති අයර්ලන්ත ජාතිකයෙක් සහ පෘතුගීසි භාෂා පරිවර්තක වරියක් මෙසේ අත්අඩංගුවට පත්වී ඇති බවයි වාර්තා වන්නේ. පොලිසිය පවසන්නේ ඔවුන් අධික වටිනාකමකින් යුත් VIP ප්‍රවේශපත්‍ර නියමිත වටිනාකමටත් වඩා ඉතා ඉහල මුදලකට අලෙවි කර ඇති බවයි.
THG ස්පෝර්ට්ස් ආයතනය ජාත්‍යන්තර ක්‍රීඩා තරගාවලි සඳහා පහසුකම් සපයන ආයතනයක් වන අතර, 2012 ලන්ඩන් ඔලිම්පික් උළෙලේ ප්‍රවේශ පත් අලෙවිය සිදු කෙරුණේද මෙම ආයතනය හරහායි. නමුත් මෙවර ඔලිම්පික් උළෙලේ ප්‍රවේශපත් අළෙවිය සඳහා ඔවුන්ට අවසර හිමිවී නැත. මෙම ආයතනයේ නියෝජිතයන් සතුව තිබී ශ්‍රී ලංකා මුදලින් රුපියල් කෝටි 100කට වඩා වැඩි වටිනාකමකින් යුක්ත ප්‍රවේශපත්‍ර තොගයක්ද සොයා ගැනීමට බ්‍රසීල පොලීසියට හැකියාව ලැබී ඇත.
මේ අයුරින්ම හෙටත්, රියෝ ඔලිම්පික් හි පුවත් සියල්ල එකම ලිපියකින් බලාපොරොත්තු වන්න.
අද දිනට පදක්කම් සටහන
