මෙරට මලල ක්‍රීඩා පිටියේ ප්‍රධානම ක්‍රීඩා තරගාවලිය ලෙස සැලකෙන ජාතික මලල ක්‍රීඩා ශූරතාවයේ පසුගිය වසරේ අගෝස්තු මාසයේ දී පැවති 97 වැනි අදියර මලල ක්‍රීඩක ක්‍රීඩිකාවන් හට වඩාත් වැදගත් වූයේ 13 වැනි දකුණු ආසියානු ක්‍රීඩා උළෙල සඳහා සුදුසුකම් ලැබීමට හිමිවන අවසන් අවස්ථාව එය වූ නිසාවෙනි.
එම නිසාවෙන් එම තරගාවලිය සඳහා විශාල ක්‍රීඩක ක්‍රීඩිකාවන් සංඛ්‍යාවක් සහභාගි වූ අතර ආරම්භක දිනයේ සිටම ඉතාම තරගකාරී ස්වරූපයක් ගත් එම තරගාවලිය අවසන් වූයේ නොසිතූ ප්‍රතිඵල කිහිපයක් ද ලබා දෙමිනි.
මෙවර Photo Story ලිපිය වෙන් වන්නේ නිමා වූ 97 වැනි ජාතික මලල ක්‍රීඩා ශූරතාව අතරතුර දී ThePapare.com කැමරා කාචයේ සටහන් වූ සේයා රූ කිහිපයක් වෙනුවෙනි.
- වසර නවයක වාර්තාවක් බිඳ හෙලූ ජාතික ශූරිය
මීටර් 1500 ඉසව්වේ ජාතික ශූරිය වන නිමාලි ලියනආරච්චි තරගාවලිය ආරම්භයේ දී ම මීටර් 1500 කාන්තා ඉසව්ව මිනිත්තු 04:15.86ක කාලයකින් අවසන් කරමින් වසර නවයක් පැරණි එම ඉසව්වේ ජාතික වාර්තාව බිඳ හෙළීමට සමත් විය.
2. දුර පැනීමේ කිරුළ දිනා ගත් තුන්පිම්ම ශූරිය
කාන්තා තුන්පිම්ම ඉසව්වේ ජාතික ශූරිය වන විදූෂා ලක්ෂානි 97 වැනි ජාතික මලල ක්‍රීඩා ශූරතාවයේ කාන්තා දුර පැනීමේ ඉසව්වේ මීටර් 6.23ක දක්ෂතාවක් දක්වමින් රන් පදක්කම දිනා ගැනීමට සමත් විය.
3. දිගුදුර ශූරියගේ මුල්ම ජාතික ශූරතාවය
ඇමරිකාවේ වෙසෙන ශ්‍රී ලාංකික මලල ක්‍රීඩිකා හිරුණි විජයරත්න සිය ප්‍රථම ජාතික මලල ක්‍රීඩා උළෙල ලෙස 97 වැනි ජාතික මලල ක්‍රීඩා ශූරතාවට සහභාගි වෙමින් මීටර් 10,000 ඉසව්ව මිනිත්තු 35:30.0ක කාලයකින් අවසන් කරමින් ජාතික මලල ක්‍රීඩා පිටියේ ප්‍රථම පදක්කම දිනා ගැනීමට සමත් විය.
4. යොවුන් ශූරියගේ බලාපොරොත්තු බොඳ වීම
මෙරට කාන්තා කෙටිදුර ධාවනයේ විශාල බලාපොරොත්තුවක් වන යොවුන් ක්‍රීඩිකා ශෙලින්ඩා ජැන්සන් තරගාවලියේ මීටර් 100 තේරිම් තරග අතරතුර දී ආබාධයකට ලක් වීම නිසාවෙන් තරගාවලියෙන් ඉවත් වීමට ඇයට සිදු විය.
5. මලල ක්‍රීඩාවේ යුගයක් නිමා කළ කෙටිදුර ශූරයා
ශ්‍රී ලාංකීය කෙටිදුර ධාවනය ජාත්‍යන්තරයට රැගෙන යමින් මෙරට මලල ක්‍රීඩාවට ඉමහත් සේවාවක් ඉටු කළ හිටපු දකුණු ආසියානු මීටර් 100 ශූර
ශෙහාන් අඹේපිටිය 97 වැනි ජාතික මලල ක්‍රීඩා උළෙලේ දී සිය වසර 16ක මලල ක්‍රීඩා ගමනට තිත තබමින් ක්‍රීඩාවෙන් සමුගැනීමට තීරණය කළ බව ප්‍රකාශ කළේය.
තවත් Photo Stories:
- Photo Story – ලාංකීය කෙටිදුර ධාවනය කලඑලි කරන යොවුන් ශූරිය
- කඳුළු අතරට සිනහවක් ගෙන ආ මීගමු වීරවරිය
- Photo Story – දකුණු ආසියානු කිරුළ රැක ගත් මැදිදුර ශූරයා
- Photo Story – දකුණු ආසියාව රජ කළ වේගයේ කුමාරයා
6. දශමෙන් රැකගත් ජාතික කිරුළ
තරගාවලියේ පිරිමි මීටර් 100 තරගයේ දී හිමාෂ ඒෂාන්, විනෝජ් සුරංජය සහ යුපුන් අබේකෝන් අතර ඉතා තියුණු සටනක් දක්නට ලැබුණු අතර අවසානයේ දී තත්පර 10.49ක කාලයකින් ඉසව්ව අවසන් කළ හිමාෂ ඒෂාන් විනෝජ්ට වඩා තත්පර 0.1ක් ඉදිරියෙන් සිටිමින් සිය කිරුළ රැක ගැනීමට සමත් විය.
7. තුන්පිම්ම වාර්තාව නැවත වරක් බිඳ හෙලීම
තරගාවලියේ අවසන් දිනයේ පැවති කාන්තා තුන්පිම්ම ඉසව්ව සඳහා සහභාගි වූ විදූෂා ලක්ෂානි එම ඉසව්වේ මීටර් 13.66ක දස්කමක් දක්වමින් ඇය විසින්ම පිහිටුවා තිබූ ජාතික වාර්තාව බිඳ හෙළීමට සමත් විය.
8. හිරුණි විජයරත්නට තවත් පදක්කමක්
97 වැනි ජාතික මලල ක්‍රීඩා ශූරතාවයේ සිය දෙවන ඉසව්ව ලෙස මීටර් 5000 කාන්තා ඉසව්ව නියෝජනය කළ හිරුණි විජයරත්න එම තරගය මිනිත්තු 16.54ක කාලයකින් අවසන් කරමින් තරගාවලියේ දෙවැනි රන් පදක්කම දිනා ගැනීමට සමත් විය.
9. ජාතික ශූරියන්ට අභියෝග කළ යොවුන් ශූරිය
97 වැනි ජාතික මලල ක්‍රීඩා ශූරතාවයේ දී මුල්ම වරට මීටර් 200 ඉසව්ව නියෝජනය කළ යොවුන් ක්‍රීඩිකා ශර්මිලා ජාන් එම ඉසව්ව තත්පර 24.85ක කාලයකින් අවසන් කරමින් එම ඉසව්වේ ජාතික කිරුළ දිනා ගැනීමට සමත් විය.
10. ජාතික කිරුළ නැවත ලබා ගත් දිගුදුර ශූරයා
තරගාවලියේ මීටර් 800 ඉසව්ව නියෝජනය කළ එම ඉසව්වේ හිටපු ජාතික ශූරයෙකු වූ ඉඳුනිල් හේරත් ඉතාමත් තියුණු සටනකින් පසු එවකට එම ඉසව්වේ ජාතික ශූරයා වූ රුසිරු චතුරංග පරාජය කරමින් රන් පදක්කම දිනා ගැනීමට සමත් විය.
11. වාර්තා මැද ජය ගත් හෙල්ල විසිකිරීමේ ශූරයා
තරගාවලියේ හෙල්ල විසිකිරීමේ ඉසව්ව සඳහා සහභාගි වූ එහි ජාතික ශූරයෙකු ද වන සුමේධ රණසිංහ එම ඉසව්වෙ මීටර් 80.76ක දුරක් වාර්තා කරමින් නව තරග වාර්තාවක් ද සමඟින් ජය ගැනීමට සමත් විය.
මෙම ජයග්‍රහණවලට අමතරව තවත් ඉහළ දස්කම් දක්වමින් දකුණු ආසියානු ක්‍රීඩා උළෙල සඳහා සිය අසුන වෙන් කරවා ගැනීමට ක්‍රීඩක ක්‍රීඩිකාවන් රැසක් සමත් විය. එමෙන්ම මීට පෙර මෙරට දේශීය පිටියේ ඉහළ දස්කම් දැක්වූ ක්‍රීඩක ක්‍රීඩිකාවන් කිහිප දෙනෙකුම දැඩි පසුබෑමකට ලක්විම ද එහි දී කැපී පෙනුණි.
එමෙන්ම මෙම වසර සඳහා දේශීය මලල ක්‍රීඩා පිටියේ කිසිදු තරගාවලියක් පැවැත්වීමට කොරෝනා වසංගතය නිසාවෙන් නොහැකි වූ අතර මෙම වසරේ පැවැත්වෙන මුල්ම සහ අවසාන දේශීය මලල ක්‍රීඩා උළෙල ලෙස 98 වැනි ජාතික මලල ක්‍රීඩා ශූරතාව මේ සතිඅන්තයේ දී පැවැත්වීමට නියමිතව ඇත.
ඒ අනුව වසරක පමණ විවේකයකින් පසුව මෙරට මලල ක්‍රීඩක ක්‍රීඩිකාවන් හට දස්කම් දැක්වීමට අවස්ථාවක් හිමිවන අතර එම තරගාවලිය සඳහා සහභාගි වන සියලූම ක්‍රීඩිකාවන් හට සිය උපරිම දස්කම් අතරට පැමිණීමට අවශ්‍ය ශක්තිය ධෛර්යය ලැබේවායි ThePapare.com අප ප්‍රාර්ථනා කරන්නෙමු.
තවත් Photo Story ලිපියක් සමඟින් හමුවෙමු. රැඳී සිටින්න ThePapare.com සමඟින්
.>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
