හෆීස්, අලී ඇතුළු පාකිස්තානය එකට එක කරයි

පාකිස්තාන කණ්ඩායමේ එංගලන්ත සංචාරය 2020

268
 

සිය මංගල විස්සයි විස්ස තරගය සඳහා ක්‍රීඩා කළ වයස අවුරුදු 19ක් වන හයිඩර් අලී සහ මොහොමඩ් හෆීස් දියත් කළ දක්ෂ පිතිකරණය නිසාවෙන් එංගලන්තය සහ පාකිස්තානය අතර පැවති තෙවන සහ අවසන් විස්සයි විස්ස තරගයෙන් ලකුණු 5ක තියුණු ජයක් හිමිකර ගැනීමට පාකිස්තානය සමත් විය.

“මෙවර IPL තරගාවලිය නිසැකවම රූපවාහිනී වාර්තා බිඳ දමනවා”

මැන්චෙස්ටර්හි දී පැවති මෙම තරගයේ කාසියේ වාසිය දිනාගත් එංගලන්ත නායක ඔයින් මෝර්ගන්, පළමුව පන්දුවට පහරදීම සඳහා පාකිස්තාන කණ්ඩායම වෙත ආරාධනා කළ අතර එහිදී ඔවුන් සිය නියමිත පන්දුවාර විස්ස අවසානයේ කඩුළු 4ක් පමණක් දැවී ලකුණු 190ක් වාර්තා කරගන්නා ලදි. 

ඔවුන්ගේ ආරම්භක පිතිකරුවන් යුගලයේ සබඳතාවය තරගයේ දෙවන පන්දුවාරය තුළ බිඳ දැමීමට මොයින් අලී සමත් වූ අතර power-play අවස්ථාව තුළ පාකිස්තාන කණ්ඩායමේ ප්‍රහාරාත්මක පිතිකරුවෙකු වන බාබර් ආසාම්ව ද දවා ගනිමින් සාර්ථක ලෙස තරගයට අවතීර්ණ වීමට එංගලන්තය සමත් විය. කෙසේ නමුත් තරගය වෙනස් වූයේ ඉන්පසු ගොඩනැංවුනු ශතක සබඳතාවය නිසාවෙනි. 

සිය මංගල විස්සයි විස්ස තරගය සඳහා ක්‍රීඩා කළ හයිඩර් අලී සමඟ එක්වූ හෆීස් තුන්වන කඩුල්ල සඳහා පන්දු 61ක් තුළ වේගවත් ලකුණු 100ක සබඳතාවයක් ගොඩනංවමින් පාකිස්තානු කණ්ඩායමේ ලකුණු පුවරුව සඳහා නව ජවයක් ලබාදෙන ලදි. 

මංගල විස්සයි විස්ස තරගයේ දීම අර්ධ ශතක රැස්කර ගෙන ඇති පිතිකරුවන් අතරට එක්වූ පළමු පාකිස්තාන පිතිකරුවා බවට පත්වූ හයිඩර් අලී, පන්දු 33ක් තුළ හතරේ පහර 5ක් සහ හයේ පහර 2ක් එල්ල කරමින් ලකුණු 54ක් වාර්තා රැස්කර ගත්තේ අනෙක් අන්තයෙන් ක්‍රීඩා කළ හෆීස් හට විශාල රුකුලක් ලබාදෙමිනි. 

සිය හතරේ පහර ප්‍රමාණයට වඩා හයේ පහර ප්‍රමාණය වැඩි කරගනිමින් සිය විස්සයි විස්ස ක්‍රිකට් දිවියේ 13 වන අර්ධ ශතකය වාර්තා කරගත් හෆීස්, සිය විස්සයි විස්ස ක්‍රිකට් දිවියේ මෙතෙක් රැස්කර ගත් වැඩිම ලකුණු ප්‍රමාණය වූයේ මෙම තරගයේ දී නොදැවී රැස්කර ගත් ලකුණු 86*යි. එය පාකිස්තාන පිතිකරුවෙකු විසින් එංගලන්තයට එරෙහිව විස්සයි විස්ස තරගයක දී මෙතෙක් වාර්තා කරගෙන තිබෙන වැඩිම ලකුණු ප්‍රමාණයයි. පන්දු 52ක දී වාර්තා වුනු එම ඉනිම සඳහා හතරේ පහර 4ක් සහ හයේ පහර 6ක් ඇතුළත් වීම මඟින් ඔහුගේ ප්‍රහාරයේ තරම සිතා ගැනීමට හැකිය. පන්දු යැවීමේ දී ක්‍රිස් ජෝර්ඩ්න් ලකුණු 29කට කඩුලු 2ක් දවා ගන්නා ලදි.

“ක්‍රිකට් කියන්නේ ජීවිතේ පොඩි කොටසක් කියලා තේරුණා” – කෝලි

පළමු තරගය ප්‍රතිඵලයක් රහිතව අවසන් වීමත්, දෙවන තරගය එංගලන්තය ජයගෙන තිබීමත් නිසා තරගාවලිය ජය ගැනීමට නම් මෙම තෙවන තරගය ජය ගැනීම එංගලන්තයට වැදගත් විය. කෙසේ නමුත් ඔවුන්ට හඹා යාමට තිබුනේ ලකුණු 191ක දැවැන්ත ඉලක්කයකි. 

එංගලන්ත මුල්පෙළ සවිමත් කළ ටොම් බැන්ටන් හතරේ පහර අටක් සමඟින් ලකුණු 46ක් රැස්කර ගන්නා ලදි. නමුත් ඔවුන්ගේ මැදපෙළ කඩුලු කිහිපයක් එක ළඟ බිඳ වැටීම නිසාවෙන් ඔවුන්ට නිසි දළ ලකුණු ලබා ගැනීමේ වේගයක් රඳවා ගැනීමට නොහැකි විය. නමුත් මොයින් අලී හතරේ පහර 4ක් සහ හයේ පහර 4ක් එල්ල කරමින් පන්දු 33ක දී රැස්කර ගත් ලකුණු 61 නිසාවෙන් තරගය නැවතත් තීරණාත්මක මුහුණුවරක් ගන්නා ලදි. 

අවසන් පන්දු 14 තුළ එංගලන්තයට සිය ජයග්‍රහණය සඳහා ලකුණු 21ක් රැස්කර ගැනීමට තිබුනි. ශහීන් ශා අෆ්රිඩි, වහබ් රියාස් සහ මොහොමඩ් රෞෆ් පාකිස්තානය වෙනුවෙන් අවසන් පන්දුවාර තුන යොමු කළ අතර එංගලන්ත ඉනිමේ 19 වන පන්දුවාරය තුළ වහබ් රියාස් ක්‍රිස් ජෝර්ඩ්න්ව දුවද්දී දැවී යාමකට හසුකර ගැනීම මෙම තරගයේ තවත් එක් ප්‍රබල හැරවුම් ලක්ෂ්‍යක් විය. 

ඕස්ට්‍රේලියාවට එරෙහිව එංගලන්තයෙන් ප්‍රබල සංචිත දෙකක්

එංගලන්තයට අවසන් පන්දු 8 තුළ ලකුණු 17ක් රැස්කර ගැනීමට නියමිතව තිබූ නමුත් වහබ් රියාස් මොයින් අලීව ද දවා ගනිමින් එංගලන්ත ඉනිමේ 19වන පන්දුවාරය තරගයේ තීරණාත්මක පන්දුවාරය බවට පරිවර්තනය කරන ලදි. අවසානයේ ලකුණු 5ක තියුණු ජයක් හිමිකර ගැනීමට පාකිස්තානය සමත් වූයේ තරග 1-1ක් ලෙස තරගාවලිය සම කරමිනි. පන්දු යැවීමේ දී රියාස් සහ ශහීන් ශා අතරේ කඩුලු 2ක බැඟින් බෙදී ගියේය. 

පාකිස්තානය – 190/4 (20): මොහොමඩ් හෆීස් 86*, හයිඩර් අලී 54, බාබර් අසාම් 21, ක්‍රිස් ජෝර්ඩ්න් 2/29. 

එංගලන්තය – 185/8 (20): මොයින් අලී 61, ටොම් බැන්ටන් 46, සෑම් බිලින්ග්ස් 26, වහබ් රියාස් 2/26, ශහීන් ශා අෆ්රිඩි 2/28.

තරගයේ වීරයා සහ තරගාවලියේ වීරයා – මොහොමඩ් හෆීස් (පාකිස්තානය) 

>> තවත් ක්‍රිකට් පුවත් සඳහා පිවිසෙන්න <<