හිටපු ඉන්දීය ක්‍රීඩකයෙකු සහ වත්මන් ක්‍රිකට් විස්තර විචාරකයෙකු වන Aakash Chopra පසුගිය දා සිය YouTube නාලිකාව ඔස්සේ වීඩියෝවක් නිකුත් කරමින් මෙවර ඉන්දීය ප්‍රිමියර් ලීග් තරගාවලියේ හයවැනි ස්ථානය ලබා ගත් Kings XI Punjab කණ්ඩායමේ අඩුපාඩු පිළිබඳව අදහස් දක්වා තිබුණි.
මෙවර ඉන්දීය ප්‍රිමියර් ලීග් තරගාවලියේ දී Kings XI Punjab කණ්ඩායම එතරම් සාර්ථක වීමට සමත්වූයේ නැත. තරගාවලියේ මුල් අවධියේ දී තරග 7ක් ක්‍රීඩා කරමින් ඔවුන් ජයග්‍රහණය කර තිබුණේ එක් තරගයක් පමණි.
කෙසේ වෙතත් තරගාවලියේ දෙවන අර්ධයේ දී නැවත සිය දක්ෂතා අතරට පිවිසි ඔවුන් තරගාවලියේ අවසන් පූර්ව වටයට පිවිසීමට ආසන්න දක්ෂතා දැක්වීමට සමත් විය. අවාසනාවන්ත ලෙස තරගාවලියේ අවසන් තරග කීපය පරාජය වීමත් සමඟින් ඔවුන්ට 6 වැනි ස්ථානය ලබා ගනිමින් තරගාවලිය නිමා කිරීමට සිදු විය.
මෙවර තරගාවලිය සඳහා Kings XI Punjab කණ්ඩායම මෙහෙය වීමේ වගකීම ඉන්දීය සුපිරි පිතිකරු K L Rahul හට හිමිව තිබූ අතර තරගාවලියට පෙර ඔවුන් පෙරළිකාර කණ්ඩායමක් වනු ඇති බවට බොහෝ දෙනා අනාවැකි පලකර තිබිණි.
Kings XI Punjab කණ්ඩායමට ප්‍රබල විදෙස් ක්‍රීඩකයන් කීපදෙනෙකු ඇතුළත් වූ අතර ඕස්ට්‍රේලියානු ප්‍රවේගකාරී පිතිකරු Glenn Maxwell මෙන්ම Chris Gayle, Chris Jordan, Sheldon Corttrell සහ Jimmy Neesham ඒ අතරින් සුවිශේෂී විය.
කෙසේ වෙතත් මැදපෙළ පිතිකරුවෙකු ලෙස සාර්ථක වීමට අසමත් වන Glenn Maxwell මෙවර තරගාවලිය නිමා කළේ ඔහු සහභාගී වූ ඉන්දීය ප්‍රිමියර් ලීග් තරගාවලි අතරින් දුර්වලම තරගාවලිය මෙය බවට පත්කරගනිමිනි.
තවත් ක්‍රිකට් පුවත්:
- IPL අලුත් කණ්ඩායම ගැන Dravid කතා කරයි
- සියලු සමාජ ජාලවලින් යොවුන් ක්‍රීඩකයා ඉවත් වෙයි
- ලෝක ටෙස්ට් ශූරතාවයේ ආකෘතිය වෙනස් වෙයි ද?
- “ලෝක කුසාලන සත්කාරකත්වය ලැබීම ආඩම්බරයට කාරණයක්” – BCCI සභාපති
- ක්‍රිකට් ලොව වීරයා හැබැහින් දුටු Yuvrajගේ සැබෑ වුනු සිහිනය
Aakash Chopra සිය අදහස් දැක්වීමේදී ප්‍රධාන වශයෙන් Glenn Maxwellගේ අසමත් වීම පිළිබඳව අදහස් දක්වා තිබුණි.
“Kings XI Punjab පසුබෑමට ප්‍රධානම හේතුවක් වුනේ Glenn Maxwell ඔහුගේ සුපුරුදු ක්‍රීඩා රටාවට ආවේ නැති එක. ඒ වගේම විදෙස් පන්දු යවන්නන් පිළිබඳවත් යම් ගැටලුවක් තිබෙනවා. Sheldon Corttrell මුල් තරගවල දී හොඳින් ක්‍රීඩා කළත් පස්සේ ඔහු අසමත් වෙනවා. ඒ වගේමයි Jimmy Neesham සහ Chris Jordan. මේ ප්‍රශ්න නිසා Kings XI Punjab කණ්ඩායමේ කිසිම ස්ථාවරත්වයක් තිබුණේ නැහැ” Aakash Chopra පවසා තිබුණි.
“Glenn Maxwell ගත්තම ඔහුට අවස්ථාවන් ගොඩක් ලැබුණා. ඔහු සුළු ලෙස නෙමෙයි විශාල ලෙස අසමත් වුනා. ඒක තමයි ප්‍රධාන හේතුව වුනේ මේ කණ්ඩායමේ පසුබෑමට. මම හිතන්නේ Maxwellගේ අසමත්වීමත් එක්ක Kings XI Punjab කණ්ඩායමට ඔවුන්ගේ ප්‍රධාන තුරුම්පු කීපයක් මඟහැරුණා.”
තවදුරටත් අදහස් දක්වමින් Aakash Chopra පවසා සිටියේ Kings XI Punjab මීළඟ තරගාවලියට පෙර Glenn Maxwell සහ සෙසු විදෙස් පන්දු යවන්නන් ඉවත් කර නව ක්‍රීඩකයන් එක් කරගත යුතු බවයි.
“මම හිතනවා Kings XI Punjab ඔවුන්ගේ ක්‍රීඩකයන් ගැන තීරණයක් ගන්න ඕනේ. ඔවුන් ඊළඟ ක්‍රීඩක වෙන්දේසියේ දී ක්‍රීඩකයන් මුදා හැරලා නව ක්‍රීඩකයන් ගන්න ඕනේ. ඒකට ඔවුන්ට ඕනේ තරම් හේතු තියනවා. ඔවුන්ගේ වේගපන්දු බලඇණිය මීට වඩා ශක්තිමත් වෙන්න ඕනේ. දැන් ඉන්න ක්‍රීඩකයන් එක්ක ඒක කරන්න බැහැ. මම හිතනවා ඔවුන් Sheldon Corttrell ඉවත් කරන්න ඕනේ. ඒ වගේම Hardus Viljoen වත් ඉවත් කරන්න ඕනේ. ඔහු ක්‍රීඩා කරන්නේ නැත්නම් ඔහුව තියාගෙන ඉන්න එකේ තේරුමක් නැහැ. ඔවුන් Glenn Maxwell වත් ඉවත් කරන්න ඕනේ. ”
“අපි Chris Gayle ගැන කතා කළොත් ඔහු තවමත් ක්‍රීඩා කරන්න බලාපොරොත්තු වෙනවා නම් ඔහු Kings XI Punjab කණ්ඩායමට වටින ක්‍රීඩකයෙක්. ඒත් දැන් ඔහුට වයස 41ක්. 2021 ඉන්දීය ප්‍රිමියර් ලීග් තරගාවලියට තවත් ටික කාලයයි තියෙන්නේ. ඒ නිසා ඒක ප්‍රශ්නයක් වෙන්නේ නැති වේවි. මම හිතනවා Kings XI Punjab කණ්ඩායමේ X Factor එක විදිහට Chris Gayle තියාගන්න එක සුදුසුයි කියලා” Aakash Chopra තවදුරටත් පවසා සිටියා.
“මේ ක්‍රීඩකයන් ඉවත් නොකලත් Kings XI Punjab කණ්ඩායමට එළඹෙන ඉන්දීය ප්‍රිමියර් ලීග් තරගාවලියේදී යම් බලපෑමක් කරන්න අවස්ථාවක් තියනවා. ඒත් මේ ලොකු වෙනස්කම් කළොත් ඔවුන්ට හොඳ අවස්ථාවක් තියනවා තරගාවලියේ පෙරළියක් කරන්න. මම හිතනවා ඔවුන් ඒ විකල්පය තෝරාගනීවි කියලා.”
2021 ඉන්දීය ප්‍රිමියර් ලීග් තරගාවලිය එළඹෙන වසරේ මාර්තු – මැයි අතර පැවැත්වීමට ඉන්දීය ක්‍රිකට් ආයතනය සූදානම් වන බව එහි ප්‍රධානී සෞරව් ගංගුලි පසුගිය දා මාධ්‍ය වෙත පවසා තිබුණි. එහි දී ඔහු පවසා සිටියේ ඒ වන විට මෙම කොරෝනා වසංගත තත්ත්වය යම් මට්ටමකට පාලනය කිරීමට හැකි වනු ඇතැයි ඔවුන් බලාපොරොත්තු වන බවත්, ඒ අනුව තරගාවලිය ඉන්දියාව තුල පැවැත්වීමට තමන් සූදානම් බවත්ය.
Hindustan Times ඇසුරිනි
>> තවත් ක්‍රිකට් පුවත් සඳහා පිවිසෙන්න <<
