තරගයකට එහා ගිය පිය සෙනෙහස

345

දරුවෙකුට තියෙන ලොකුම ශක්තිය තම දෙමව්පියන් කිව්වොත් නිවැරදියි. මවගේ ආදරය සමඟ හැඩී වැඩෙන දරුවාගේ සෑම දෙයකටම සවියක් වෙන්නේ පියා ය. අපිරිමිත කැප කිරීම් තුළින් තම දරුවාගේ අනාගතය ගොඩ නැගීමට වෙහෙස වෙන පියවරුන්ගේ දරු සෙනෙහස ලොවට පෙන්නුම් කරන්නේ කලාතුරකිනි.

ටෝකියෝ ඔලිම්පික් ජය ගන්න සිහින දකින පඬුවස්නුවර තරුව

ඒ 1992 වසරේ ගිම්හානයයි. 65,000කට අධික ප්‍රේක්ෂකයන් සංඛ්‍යාවක් ස්පාඤ්ඤයේ බාසිලෝනා නුවර ඔලිම්පික් ක්‍රීඩාංගණයට රැස්ව සිටියේ එවර ගිම්හාන ඔලිම්පික් උළෙලේ මලල ක්‍රීඩා තරග දැක ගැනීම සඳහායි.

තරගාවලියේ කැපී පෙනෙන ඉසව්වක් වූ 400m අවසන් පූර්ව අදියර ආරම්භ වීමට සියල්ල සූදානමින් පසු විය. මුල් අදියරවල සිටම ඉතා කැපී පෙනෙන දස්කම් දැක්වූ බ්‍රිතාන්‍ය මලල ක්‍රීඩක ඩෙරෙක් රෙඩ්මන්ඩ් මෙම තරගය පහසුවෙන් ජය ගනු ඇතැයි සියල්ලන් බලාපොරොත්තුවෙන් පසු විය.

තරගය ආරම්භ විය, ක්‍රීඩකයන් සියල්ලම කරට කර තරග වදින්නට වූ අතර රෙඩ්මන්ඩ් කෙමින් තරගය තමන් වෙත නතු කරගැනීමට උත්සහ කරමින් සිටියා. නමුත් තරගයේ සම්පූර්ණ දුරින් අඩක් නිමා කිරීමටත් ප්‍රථමයෙන් අවාසනාවන්ත ලෙස ඔහු පාදයේ ආබාධයකට ලක්වන්නට විය.

ඩෙරෙක් රෙක්මන්ඩ් ආබාධයට ලක් වූ අවස්ථාව

ආබාධය නිසාවෙන් දැඩි වේදනාවට පත් වූ ඔහු ධාවන තීරුව මත ඇදවැටෙන්නට වූ අතර ඔහුව පරීක්ෂා කර බලධාරීන් ඔහුට තරගයෙන් ඉවත් වන ලෙස පවසන්නට විය. එම උපදෙස් ප්‍රතික්ෂේප කළ ඔහු තනි පාදයෙන් නැගී සිටිමින් පනිමින් නැවතත් තරග වැදීම ආරම්භ කරන්නට විය.

අනෙකුත් තරගකරුවන් තරගය සම්පූර්ණ කර අවසන් වූවත් කෙසේ හෝ තරගය නිමා කිරීමේ අරමුණින් ඔහු ඉදිරියට ඇදෙන්නට වූ අතර එක් වරම ප්‍රේක්ෂකාගාරයේ සිටි පුද්ගලයෙක් ඔහු දෙසට දිව එන්නට විය. ආරක්ෂකයින් එම පුද්ගලයා නතර කිරීමට සැදුවත් එම පුද්ගලයා රෙඩ්මන්ඩ්ගේ පියා බව දැන ගත් පසුව ආරක්ෂකයන් ඔහුට රෙඩ්මන්ඩ් අසලට යාමට ඉඩ සලසන්නට විය.

ඩෙරෙක්ගේ උදව්වට දිව එන ඔහුගේ පියා වූ ජිම් රෙක්මන්ඩ්

ඩෙරෙක් වෙත ලං වූ පියා ඔහුව අල්ලා ගන්නා අතර පියාගේ උරහිසක් තම ආධාරකයක් කර ගත් ඩෙරෙක් කෙමින් කෙමින් ඉදිරියට යෑමට පටන් ගනු ලබනවා. කෙසේ නමුත් ඔහුගේ වේදනාව දුටු තරග සංවිධායකයින් නැවතත් ඔහුට තරගයෙන් ඉවත් වන ලෙස පවසනවා.

ඩෙරෙක්ගේ වේදනාව වැටහීමෙන් පසුව ඔහුගේ පියා ද ඔහුව ක්‍රීඩා පිටියෙන් ඉවතට රැගෙන යාමට තැත් කරමින් පවසන්නේ ඔබ මෙය කළ යුතුම නැත, තරගයෙන් ඉවත් වන ලෙසයි.

නමුත් මෙම තරගය කෙසේ හෝ අවසන් කළ යුතු යැයි ඔහු තම පියා වෙත පවසන අතර නැවතත් ඔහුව ධාවනයේ යෙදුණු තීරුවට ගෙන යන්නැයි ඉල්ලා සිටියා. තම පුත්‍රයාගේ ඉල්ලීමට කන් දුක් ජිම් රෙඩ්මන්ඩ් ඔහුව නැවතත් ඔහුගේ තීරුවට ගෙන යන අතර තරගය නිමා කරන තුරු ඔහුට සහයක් වීමට ද අදිටන් කර ගනු ලබනවා.

ඩෙරෙක් රෙඩ්මන්ඩ් (වමේ) තම පියා වූ ජිම් රෙඩ්මන්ඩ් ( දකුණේ ) සමඟින්

තම පියාගේ සහයත් හිතෙහි තිබූ අධිෂ්ඨානයත් නිසාවෙන් සෙමින් සෙමින් ඉදිරියට ඇදුණු ඔහු තරගයේ අවසානයට ළඟාවනවා. 65,000කට අධික ප්‍රේක්ෂකයන් සිය අසුන්වලින් නැගිට අත්පොළසන් දෙමින් ඔහුව දිරිමත් කරද්දී ඩෙරෙක් රෙඩ්මන්ඩ් සිය පියා ද සමඟින් තරගය අවසන් කරනවා.

ඔහු තරගය නිමා කළත් තරගය නිමා කළ තරගකරුවන්ගේ ගොන්නට එක්වීමට ඔහුට අවස්ථාව හිමිවන්නේ නැහැ. තරග නීති රීති වලට අනුව බාහිරින් උපකාරයක් ලබා ගැනීම නිසාවෙන් ඔහු තරගයෙන් ඉවත් වූ තරගකරුවන්ගේ ගොන්නට වැටෙනවා.

ඩෙරෙක් රෙඩ්මන්ඩ් තම තරගය නිම කරමින්

කෙසේ නමුත් මෙම සිදුවීම තුළින් ඔලිම්පික් ඉතිහාසය තුළ නොමැකෙන සටහනක් තැබීමට මෙම පිය පුතු දෙදෙනාට හැකි වන අතර පසුව එම අවස්ථාව අන්තර්ජාතික ඔලිම්පික් කමිටුව විසින් “මානුෂීයත්වය සැමරීමේ” අවස්ථාවක් ලෙස ද එය නම් කරනු ලබනවා. 

එම සිදුවීමෙන් පසුව දිගින් දිගටම ආබාධයන්ට ලක්වීමට සිදු වීම නිසාවෙන් ඩෙරෙක් රෙඩ්මන්ඩ් 1994 වසරේ දී ක්‍රීඩාවෙන් සමුගන්නා අතර මෙම සිදුවීමට ගෞරවයක් දැක්වීමක් ලෙස 2012 ඔලිම්පික් තරගාවලියේ දී ගිනිසිළුව රැගෙන යන්නෙකු ලෙස ඔහුගේ පියා නම්වනවා. එම අවස්ථාවට එක් වෙමින් ජිම් රෙඩ්මන්ඩ් ප්‍රකාශ කර සිටින්නේ, 

“ලෝකයේ ඉන්න ආඩම්බරකාරම තාත්තා මම විය යුතුයි. ඩෙරෙක් කළ දේ කිරීමට සැබෑවටම විශාල ධෛර්යයක් අවශ්‍යයි. මෙම සිදුවීම නිසා රන් පදක්කම දිනා ගැනීමට වඩා මම ඔහු ගැන ආඩම්බරයට පත්වනවා” ලෙසයි.

ඩෙරෙක් රෙඩ්මන්ඩ් ක්‍රීඩාවෙන් සමුගෙන දශකයට අධික කාලයක් ගත වූවත් ඔලිම්පික් ඉතිහාසය දෙස නැවත හැරී බැලීමේ දී මෙම සිදුවීම ඔලිම්පික් ඉතිහාසයේ අමතක නොවන සිදුවීම් අතලොස්සේ අදටත් ඉහළින්ම ඇත.

“එය කෙතරම් දුෂ්කර ද යන්න ඵලක් නැත,

ඔබ ආරම්භ කළ දේ අවසන් කළ යුතුය” – ඩෙරෙක් රෙඩ්මන්ඩ්

>> තවත් විශේෂාංග ලිපි සඳහා පිවිසෙන්න <<