නායකත්වයේ වගකීම් පිතිකරණය සඳහා බලපෑම් එල්ල කර ඇති බව සලකමින් බංග්ලාදේශ ටෙස්ට් කණ්ඩායමේ නායක Mominul Haque හට ටෙස්ට් නායකත්වය තවදුරටත් දැරිය හැකි ද, නොහැකි ද යන්න පිළිබඳව තීරණයක් ගන්නා ලෙස බංග්ලාදේශ ක්‍රිකට් ආයතනය ඔහුගෙන් විමසා තිබෙනවා.
නායකත්වය ලැබීමෙන් පසුව Mominul Haqueගේ පිතිකරණ දක්ෂතා කැපී පෙනෙන ලෙස අඩු වී ඇති බව දක්නට ලැබෙන අතර ඔහු ක්‍රීඩා කළ අවසන් ඉනිම් 15 තුළ 12.57 සාමාන්‍යයක් රඳවා ගනිමින් රැස්කර ගෙන ඇත්තේ ලකුණු 176ක් පමණයි.
එමෙන්ම අවසන් ටෙස්ට් ඉනිම් 07 තුළ දී ඔහු ලකුණු 10 සීමාව ද පසුකර යෑමට අපොහොසත් වී ඇති අතර ඔහු එම ඉනිම් සියල්ල තුළ රැස්කරගෙන ඇත්තේ ලකුණු 24ක් වීම විශේෂත්වයක්.
ටෙස්ට් තරග 17ක දී බංග්ලාදේශ කණ්ඩායමට නායකත්වය ලබා දුන් Mominul Haque 31.44 පිතිකරණ සාමාන්‍යයක් පවත්වා ගනිමින් ලකුණු 912ක් රැස්කර ගැනීමට සමත්ව තිබෙන අතර එයට ශතක තුනක් සහ අර්ධ ශතක දෙකක් ඇතුළත්.
එම ටෙස්ට් තරග අතරින් බංග්ලාදේශය ටෙස්ට් තරග තුනක් ජයග්‍රහණය කරමින් දෙකක් ජය පැරදුමෙන් තොරව අවසන් කිරීමට සමත්ව තිබූ නමුත් ඉතිරි තරග 12 ම ඔවුන් පරාජයට පත්වුනා.
- 2022 IPL තරගාවලියේ ධනවත්ම ක්‍රීඩකයා Jos Buttler
- නාවිකයින්ට එරෙහිව මිලාන්ගෙන් සුපිරි පන්දු යැවීමක්
- IPL අවසන් මහා තරගය වාර්තා පොත් අතරට
- පාකිස්තානය හමුවේ ශ්‍රී ලංකාවට පූර්ණ තරගාවලි පරාජයක්
ශ්‍රී ලංකාවට එරෙහිව පසුගිය දා ලැබූ කඩුලු 10ක පරාජයෙන් පසුව බංග්ලාදේශ නායකයා සහ බංග්ලාදේශ ක්‍රිකට් බලධාරි Nazmul Hasan අතර සාකච්ඡාවක් පැවති නමුත් Mominulගේ නායකත්වය ගැන තීරණයක් ගැනීමෙන් තොරව එම සාකච්ඡා අවසන්ව තිබුණා.
Nazmul එහි දී ප්‍රකාශ කර තිබුණේ Mominul තමන්ගේ අනාගතය ගැන සිතන බවත් සහ නායකත්වය ඔහුගේ පිතිකරණයට කෙසේ බලපානවා ද යන්න බටහිර ඉන්දීය කොදෙව් සංචාරයට පෙර දන්වන ලෙසයි.
එමෙන්ම බංග්ලාදේශ ක්‍රිකට් නිලධාරි Jalal Yunus මේ පිළිබඳව අදහස් දක්වමින් ප්‍රකාශ කර තිබුණේ Mominulගේ පිතිකරණයට නායකත්වය බලපාන්නේ නම් නායකත්වය ඉදිරියටත් දරන ලෙස ඔහුට බලපෑම් නොකරන බවයි.
“අපගේ ක්‍රිකට් ආයතනයේ සභාපති ඔහු සමඟ සාකච්ඡා කළත් ඒවා සාර්ථකව අවසන් කිරීමට හැකි වුනේ නැහැ. ඔහු විදේශ ගතව සිටින නිසා මෙම සාකච්ඡාවට සහභාගි වීමට නොහැකි වූවත් ඔහු පැමිණි වහාම මේ පිළිබඳව නැවත සාකච්ඡා කරනු ඇත”.
කෙසේ නමුත් Mominul Haque කණ්ඩායම මෙහෙය වීම ප්‍රතික්ෂේප නොකළහොත් බටහිර ඉන්දීය කොදෙව් සංචාරයට පෙර බංග්ලාදේශ කණ්ඩායමේ නායකත්වය වෙනස් නොවන බව වාර්තා වනවා
ජුනි 16 වැනිදා ආරම්භ වීමට නියමිත බටහිර කොදෙව් සංචාරයේ දී Mominul Haque පිතිකරණයෙන් හා නායකත්වයෙන් සාර්ථකව වීමට අපොහොසත් වුවහොත් පමණක් නව නායකයෙකු පිළිබඳව සාකච්ඡා කිරීමට බොහෝ ඉඩක් ඇත.
Cricbuzz ඇසුරිනි.
>> තවත් ක්‍රිකට් පුවත් සඳහා පිවිසෙන්න <<
