මෙම වසරේ ජාතික මලල ක්‍රීඩා පිටියේ තරග ආරම්භ කරමින් ජාතික සහ සුපිරි සංචිතවල සිටින ක්‍රීඩක ක්‍රීඩිකාවන් වෙනුවෙන් මලල ක්‍රීඩා තේරීම් තරගාවලියක් අප්‍රේල් මාසයේ දී පැවැත්වීමට සූදානමින් පසුවන බව මලල ක්‍රීඩා සංගමයේ සභාපති ජෙනරාල් පාලිත ප්‍රනාන්දු මහතා ප්‍රකාශ කර සිටියා.
එමෙන්ම මෙරට ප්‍රධානතම මලල ක්‍රීඩා සැණකෙළිය වන ජාතික මලල ක්‍රීඩා ශූරතාවය මැයි මාසයේ දී සහ ජාතික කනිෂ්ඨ මලල ක්‍රීඩා ශූරතාවය අගෝස්තු මාසයේ දීත් පැවැත්වීමට සූදානම් කරමින් ඇති බව ද එතුමා ප්‍රකාශ කර සිටියා.
ක්‍රීඩා අමාත්‍යාංශයේ ඩන්කන් වයිට් ශ්‍රවණාගාරයේ දී ඊයේ (03) පැවති ජාතික ක්‍රීඩා කවුන්සිලයේ මාධ්‍ය හමුවක දී වැඩිදුරටත් අදහස් දක්වමින් එතුමා ප්‍රකාශ කර සිටියේ,
“2021 වර්ෂයේ සැලසුම් ක්‍රියාත්මක කිරීමේ දී අපගේ මූලික අරමුණු දෙකක් තියෙනවා, එකක් ඇවිල්ලා 2021 වර්ෂයේ පැවැත්වීමට නියමිත ඔලිම්පික් තරගාවලියට අපේ ක්‍රීඩක ක්‍රීඩිකාවන් සුදුසුකම් ලබා ගැනීම සහ 2022 වර්ෂයේ පැවැත්වෙන ආසියානු ක්‍රීඩා උළෙලේ දී පදක්කම් දිනා ගැනීමේ අභිලාෂයක් ඔවුන්ට ලබා දීම.
මේ අවස්ථාවේ දී අපි කණ්ඩායම් දෙකක් තෝරගෙන තිබෙනවා. සුපිරි කාණ්ඩය කියලා ක්‍රීඩක ක්‍රීඩිකාවන් 21 දෙනෙකුගෙන් යුත් කණ්ඩායමක් සහ ඒ වගේම ජාතික කණ්ඩායමක් තියෙනවා ක්‍රීඩක ක්‍රීඩිකාවන් 20 දෙනෙකුගෙන් සමන්විත.
2021 ඔලිම්පික් තරගාවලියට සුදුසුකම් ලබා ගනී කියලා අපි බලාපොරොත්තු වෙන ඉසව් තමා මීටර් 100 පිරිමි, මැරතන් කාන්තා ඉසව්ව ඒ වගේම පිරිමි දුර පැනීම, මීටර් 3000 බාධක දිවීමේ ඉසව්ව සහ පිරිමි මීටර් 400 සහය දිවීම යන ඉසව්.
විශේෂයෙන්ම සහය දිවීමේ ඉසව්වන්ගෙන් අපි බලාපොරොත්තු වෙනවා පෝලන්තයේ පැවැත්වෙන ලෝක සහය දිවීමේ තරගාවලියට අපෙන් කණ්ඩායම් ඉදිරිපත් කරන්න මීටර් 400X4, මීටර් 400X4 මිශ්‍ර සහ මීටර් 800X4 සහය දිවීමේ තරග සඳහා.
මෙම තෝරාගැනීම්වල දී මීටර් 400X4 ඉසව්ව සඳහා ඔලිම්පික් උළෙලට ලෝක සහය දිවීමේ තරගාවලියේ මුල් ස්ථාන 8 ලබා ගන්නා කණ්ඩායම් සහ ලෝක වර්ගීකරණයෙන් අට දෙනෙක් අරන් කණ්ඩායම් 16ක් පමණයි තෝරාගන්නේ. ඒ නිසා අපි ලෝක සහය දිවීමේ තරග සඳහා සහභාගි වීම ඉතාමත් වැදගත්.
මේ වර්ෂයේ අපි බලාපොරොත්තු වෙනවා අප්‍රේල් මාසයේ දී තේරීම් තරගාවලියක් පැවැත්වීමටත්, ඒක සුපිරි සහ ජාතික සංචිතවල ක්‍රීඩක ක්‍රීඩිකාවන්ගේ දක්ෂතා පරීක්ෂා කරන්නට තියන්නේ.
ඒ වගේම ජාතික ශූරතාවය මැයි මාසයෙත් ඔලිම්පික්වලට කලින් පවත්වනවා. මොකද එහි ජයග්‍රාහකයෙකුට ඔලිම්පික් තරගාවලියට සුදුසුකම් ලබා ගැනීමට යම් අවස්ථාවක් හිමිවන නිසාවෙන්.
ඒ වගේම ජාතික කනිෂ්ඨ මලල ක්‍රීඩා ශූරතාවය අගෝස්තු මාසයේ දී පැවැත්වීමට සැලසුම් කරලා තියෙනවා.
පසුගිය වසරේ කොරෝනා වසංගතය නිසාවෙන් අපිට කනිෂ්ඨ ශූරතාවය පවත්වන්න බැරි වුනා, ඒත් මේ වසරේ දී ලෝක කනිෂ්ඨ ශූරතාවය පවත්වන නිසා අපි අනිවාර්යයෙන් මේ තරගාවලිය පවත්වලා දක්ෂ ක්‍රීඩක ක්‍රීඩිකාවන් සංචිත ගත කරලා ඔවුන්ව එම තරගාවලියට සූදානම් කරන්න ඕන.”
තවත් මලල ක්‍රීඩා පුවත්:
- වසර 27ක් පැරණි ලෝක වාර්තාවකට නව හිමිකරුවෙක්
- හිටපු ජාතික ශූරිය ඕස්ට්‍රේලියාවේ දී තරග බිමට
- ග්‍රීසියේ රිටි පැනීමේ ජාතික ශූරිය ලෙස ලාංකික සම්භවයක් සහිත ක්‍රීඩිකාවක්
කොරෝනා වසංගතය නිසාවෙන් පසුගිය වසරේ පැවැත්වීමට නියමිතව තිබූ ජාතික මලල ක්‍රීඩා පිටියේ තරගාවලි රැසක් අවලංගු කිරීමට සිදු වූ අතර එම වසරේ පැවති ප්‍රථම සහ එකම තරගාවලිය ලෙස 98 වැනි ජාතික මලල ක්‍රීඩා ශූරතාවය දෙසැම්බර් මාසයේ දී පැවැත්වුනා.
එමෙන්ම වසංගත තත්වය නිසාවෙන් පසුගිය වසරේ පැවැත්වීමට තිබූ ගිම්හාන ඔලිම්පික් උළෙල මෙම වසර දක්වා කල්දැමීමට කටයුතු කළ අතර එම තරගාවලිය මෙම වසරේ ජූලි මාසයේ දී ජපානයේ ටෝකියෝ නුවර දී පැවැත්වීමට සූදානමින් ඇත.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
