පිහිය පෙන්වා පුහුණුකරු බියවැද්දූ හිටපු පාකිස්තාන සුපිරි පිතිකරුවා

317
 

මහත්වරුන්ගේ ක්‍රීඩාව යැයි විරුදාවලිය ලැබුවත් එම නමෙහි අර්ථයට හාත්පසින්ම වෙනස් අයුරින් කටයුතු කළ අවස්ථාවන් ක්‍රිකට් ඉතිහාසය පුරාවට උදාහරණත් සමඟින්ම ඕනෑ තරම් අපට පෙන්වා දිය හැකි නමුත් තරගකාරී ක්‍රීඩාවක් තුල මෙවන් දෑ සිදු විය හැකි බව තේරුම් ගෙන ඒ දෙස විචාරශීලී ඇසකින් දැකීමට තරම් අවබෝධයක් ගොඩනඟා ගැනීම ක්‍රීඩාලෝලී අපගේ ද වගකීමයි. 

ඕස්ට්‍රේලියාව නැවතත් පරණ පන්දුවට

නමුත් එයින් අදහස් වනුයේ ප්‍රචණ්ඩකාරී ලෙස හැසිරෙමින් ක්‍රීඩාවේ ආචාර ධර්ම පද්ධතීන් කෙලෙසන පුද්ගලයින්ගේ ක්‍රියා කලාපයන් සාධාරණීකරණය කිරීමක් නොවන බව ද මතක තබා ගත යුතුය. 

ක්ෂණික කෝපය පාලනය කරගත නොහැකි වීම නිසාවෙන් එල්ල විය හැකි නරක නාමය පිළිබඳ කදිම නිදසුනක් සපයමින් පාකිස්තාන කණ්ඩායම නියෝජනය කළ සුපිරි පිතිකරුවෙකු වන යුනිස් ඛාන් සම්බන්ධ පුවතක් මේ දිනවල ක්‍රීඩා මාධ්‍ය වාර්තා තුල සුලබව දැකගත හැකිවන්නේ ක්‍රිකට් ක්‍රීඩාලෝලීන් ද තරමක් මවිතයට පත් කරමිනි.

මෙහි කතා නායකයා වන සිම්බාබ්වේ ජාතික හිටපු පාකිස්තාන කණ්ඩායම් පුහුණුකරු ග්‍රැන්ඩ් ෆ්ලවර් මහතා අදාළ සිද්ධිය හා බැඳුණු තොරතුරු සියල්ල මාධ්‍ය වෙත හෙළිකොට තිබුණේ ඔහුගේ සහෝදරයා වන ඇන්ඩි ෆ්ලවර් සමඟ එක්ව සහභාගී වූ ගුවන්විදුලි වැඩසටහනක් අතරතුර දී ය. 

එහි දී එම වැඩසටහන මෙහෙයවූ නිවේදකයා “අත්දැකීම් බහුල පුහුණුකරුවෙකු වශයෙන් ක්‍රිකට් පිටියේ දී ඔබට මුණ ගැසී ඇති, තරමක් වෙනස් ආකල්ප දරන චරිත කවුරුන් දැයි?” ඇසූ පැනයට පිළිතුරු දීමට යාමේ දී ග්‍රැන්ඩ් ෆ්ලවර් මේ සිදුවීම සම්බන්ධයෙන් අදහස් දැක්වීමට මුල පුරා තිබේ.

පුහුණු තරගය මඟ දමා කරන්ව නිරෝධායනයට

“යුනිස් කියන්නේ ටිකක් තේරුම් ගන්න අමාරු චරිතයක්. ඔහුගේ නම කියපු ක්ෂණයෙන් මට මතක් වෙන්නෙම බ්‍රිස්බේන් වලදී මුහුණ දෙන්න වුන එක්තරා සිදුවීමක් ගැන. තරගයකට කලින් අපි උදෑසන ආහාර ගන්න වෙලාවේ මම ඔහුට පන්දුවට පහර දෙන්න ඕන ආකාරය ගැන පොඩි උපදෙස් ටිකක් දෙන්න උත්සාහ කළා. ඔහු ඒක ගත්තේ ටිකක් වෙනස් විදියකට කියලා මට තේරුණා. වැඩි වෙලා ගියේ නැහැ ඔහු ඒකට නියම ප්‍රතිචාරයක් දැක්වුවා. මේස උඩ තිබ්බ බටර් පිහිය අරගෙන ඔහු මගේ බෙල්ලට තිබ්බා. ඔහු නවත්වන්න ප්‍රධාන පුහුණුකරු විදියට වැඩ කරපු මිකී ආතර්ටත් සිද්ධ වුනා මැදිහත් වෙන්න.”

“ඉතින් ඔය වගේ දේවල් පුහුණුකරුවෙකු විදියට බලාපොරොත්තු වෙන්න ඕන. හැම ක්‍රීඩකයම එක වගේ නෑ. කවුරුත් එකම විදියට හැමදේටම ප්‍රතිචාර දක්වන්නෙත් නැහැ. වඩාත් වැදගත් වෙන්නේ අපි අනෙක් අයව තේරුම් ගන්න ආකාරයයි. පුහුණුකරුවෙක් විදියට මේ වගේ අමුතු අමුතු සිදුවීම්වලට මුහුණ දෙන්න ලැබීමත් එක්තරා අතකට අපේ වෘත්තීය ගමන තවත් රසවත් කරන්න උදව් වෙනවා කියලයි මට නම් හිතෙන්නේ. මම මේ සෑම දෙයක්ම ඉතාමත් සතුටින් භාර ගත්තා වගේම, මගේ උපරිමය හැම වෙලාවෙම අනෙක් අයට දෙන්න කැපවෙලා වැඩ කළා. ඒක නිසා අවංකවම මම අද ඉන්න තැන ගැන නිහතමානී සතුටක් දැනෙනවා.”

පාකිස්තාන ක්‍රිකට් පුරාවෘත්තයක් ලෙස සැලකෙන යුනිස් ඛාන් තම කණ්ඩායම වෙනුවෙන් ටෙස්ට් තරග බිමේ දී ලකුණු 10,000 සීමාව පසුකොට යමින් ICC ටෙස්ට් පිතිකරු ශ්‍රේණිගත කිරීම්හීද පළමු තැන පවා හිමිකර ගැනීමට සමත්වී තිබෙන්නේ අතිදක්ෂ පිතිකරුවෙකු ලෙස ඔහු අත්පත් කරගෙන ඇති සාර්ථකත්වය පිළිබඳ මනාවට කියාපාමිනි. 

2017 වසරේ දී ජාත්‍යන්තර ක්‍රිකට් පිටියෙන් සමුගන්නා ඔහු මේ වන විට පාකිස්තාන ක්‍රිකට් කණ්ඩායමේ පිතිකරණ අංශයේ ප්‍රධාන පුහුණුකාරවරයා ලෙස සේවය කිරීමට අපේක්ෂාවෙන් පසුවේ.

>> තවත් ක්‍රිකට් පුවත් සඳහා පිවිසෙන්න <<