ஆப்கானிஸ்தான் A அணிக்கு எதிராக நடைபெற்ற முத்தரப்பு தொடரின் ஆறாவது போட்டியில் இலங்கை A அணி 103 ஓட்டங்கள் வித்தியாசத்தில் வெற்றிபெற்று இறுதிப் போட்டிக்கு தகுதிபெற்றுள்ளது.
இந்தப் போட்டியில் நாணய சுழற்சியில் வெற்றிபெற்ற ஆப்கானிஸ்தான் அணி முதலில் களத்தடுப்பில் ஈடுபட தீர்மானித்தது.
அதன்படி முதலில் துடுப்பெடுத்தாடிய இலங்கை அணிக்கு அவிஷ்க பெர்னாண்டோ மற்றும் நிரோஷன் டிக்வெல்ல ஆகியோர் மிகச்சிறந்த இணைப்பாட்டத்தை பெற்றுக்கொடுத்தனர்.
>>இலங்கைத் தொடருக்கான மே.இ.தீவுகள் டெஸ்ட் குழாம் வெளியீடு
இவர்கள் இருவரும் முதல் விக்கெட்டுக்காக 133 ஓட்டங்களை இணைப்பாட்டமாக பெற்றுக்கொண்டதுடன், நிரோஷன் டிக்வெல்ல 66 ஓட்டங்களுடன் ஆட்டமிழந்தார்
தொடர்ந்து சிறப்பாக ஆடிய அவிஷ்க பெர்னாண்டோ அற்புதமான பிரகாசிப்பை வெளிப்படுத்தி சதமடித்து அணியின் ஓட்ட எண்ணிக்கையை அதிகரிக்க உதவினார். அவிஷ்க பெர்னாண்டோ 110 ஓட்டங்களை விளாச, அடுத்து களமிறங்கிய நுவனிது பெர்னாண்டோ 45 ஓட்டங்கள், ரவிந்து பெர்னாண்டோ 25 மற்றும் வனுஜ சஹான் 19 ஓட்டங்களை பெற இலங்கை A அணி 50 ஓவர்கள் நிறைவில் 8 விக்கெட்டுகளை இழந்து 322 ஓட்டங்களை பெற்றுக்கொண்டது.
பந்துவீச்சில் பரீதூன் தவூட்ஷாய் 4 விக்கெட்டுகளையும், பர்மனுல்லாஹ் 3 விக்கெட்டுகளையும் கைப்பற்றினர்.
ஆப்கானிஸ்தான் A அணியை பொருத்தவரை இலங்கை அணி நிர்ணயித்த வெற்றியிலக்கை 29.3 ஓவர்களுக்குள் அடைந்தால் மாத்திரமே இறுதிப்போட்டிக்கு தகுதிபெற முடியும் என்ற நிலையில் களமிறங்கியது.
அதன்படி களமிறங்கிய ஆப்கானிஸ்தான் அணியின் முதல் இரண்டு விக்கெட்டுகளை முதல் ஓவரில் வீழ்த்தி துலாஜ் சமுதித்த மிகச்சிறந்த ஆரம்பத்தை கொடுத்தார்.
>>இலங்கை வளர்ந்து வரும் அணிக்காக துடுப்பாட்டத்தில் அசத்திய ஷாருஜன்
இதனையடுத்து தடுமாற்றத்துக்கு மத்தியில் துடுப்பெடுத்தாடிய ஆப்கானிஸ்தான் A அணிக்காக ஆரம்ப துடுப்பாட்ட வீரர் ஹஸன் இஷகில் மாத்திரம் 74 ஓட்டங்களை அதிகபட்சமாக பெற்றுக்கொடுக்க 42.5 ஓவர்கள் நிறைவில் 219 ஓட்டங்களுக்கு சகல விக்கெட்டுகளையும் இழந்து ஆப்கானிஸ்தான் அணி தோல்வியை தழுவியது.
பந்துவீச்சில் துலாஜ் சமுதித்த 5 விக்கெட்டுகளை கைப்பற்ற, குகதாஸ் மாதுளன் மீண்டும் பந்துவீச்சில் பிரகாசித்து 3 விக்கெட்டுகளை கைப்பற்றினார்.
எனவே இந்தப் போட்டியில் வெற்றிபெற்ற இலங்கை அணி இறுதிப்போட்டிக்கு தகுதிபெற்றுள்ளதுடன், எதிர்வரும் ஞாயிற்றுக்கிழமை (21) இந்திய A அணியை எதிர்கொள்ளவுள்ளமை குறிப்பிடத்தக்கது.
சுருக்கம்
இலங்கை ‘A’ – 322/8 (50) அவிஷ்க பெர்னாண்டோ 110, நிரோஷன் டிக்வெல்ல 66, நுவனிது பெர்னாண்டோ 45, ரவிந்து பெர்னாண்டோ 25, பரீதூன் தவூட்ஷாய் 4/60
ஆப்கானிஸ்தான் ‘A’ – 219 (42.5) ஹஸன் இஷகில் 74, துலாஜ் சமுதித்த 5/25, குகதாஸ் மாதுளன் 3/28
முடிவு – இலங்கை ‘A’ அணி 103 ஓட்டங்களால் வெற்றி
>>மேலும் கிரிக்கெட் செய்திகளைப் படிக்க<<
