இலங்கைத் தொடருக்கான மே.இ.தீவுகள் டெஸ்ட் குழாம் வெளியீடு

மேற்கிந்தியத் தீவுகள் கிரிக்கெட் சபை (CWI) இலங்கை அணியுடன் விளையாடவிருக்கும் இரண்டு போட்டிகள் கொண்ட டெஸ்ட் தொடருக்கான மேற்கிந்திய தீவுகள் குழாத்தினை வெளியிட்டுள்ளது. 

இந்திய – இலங்கை A கிரிக்கெட் வீரர்களுக்கு ஒழுக்காற்று நடவடிக்கை

அறிவிக்கப்பட்டிருக்கும் மேற்கிந்திய தீவுகள் டெஸ்ட் குழாமானது அல்ஷாரி ஜோசப் மற்றும் ஷமார் ஜோசப் ஆகியோருக்கு மீண்டும் வாய்ப்பினை வழங்கியுள்ளதோடு விக்கெட்காப்பு துடுப்பாட்ட வீரரான ஜோசுவா டா சில்வா மற்றும் அமீர் ஜாங்கோ ஆகியோரும் மீண்டும் அணியில் இணைந்துள்ளனர்.  

கடந்த ஆண்டின் இறுதியில் உபாதை காரணமாக அல்சாரி ஜோசப் மற்றும் ஷமார் ஜோசப் ஆகிய இருவரும் இந்தியா மற்றும் நியூசிலாந்துக்கு எதிரான டெஸ்ட் போட்டிகளில் விளையாடவில்லை. அவர்கள் இறுதியாக 2025ஆம் ஆண்டில் அவுஸ்திரேலிய அணிக்கு எதிராக விளையாடினர். தற்போது இவர்களின் மீள்வருகையோடு கீமார் ரோச் மற்றும் ஜெய்டன் சீல்ஸ் ஆகியோர் மேற்கிந்திய தீவுகளின் வேகப்பந்துவீச்சுத்துறையினை பலப்படுத்துகின்றனர்.

27 வயதான ஜோசுவா டா சில்வா, உள்ளூர் போட்டிகளில் வெளிப்படுத்திய சிறந்த ஆட்டம் காரணமாக மீண்டும் மேற்கிந்திய தீவுகள் குழாத்தில் இடம்பெற்றிருக்கின்றார். அவர் அண்மைய உள்ளூர் தொடரில் 7 இன்னிங்ஸ்களில் 413 ஓட்டங்கள் குவித்திருந்தமை சுட்டிக்காட்டத்தக்கது.  

ஜோசுவா டா சில்வா காரணமாக மேற்கிந்திய தீவுகள் அணியில் இருந்து விக்கெட்காப்பு வீரரான டெவின் இமால்ச்சிற்கு ஓய்வு வழங்கப்பட்டிருக்கின்றது. எனினும் டெவின் இமால்ச் இலங்கை அணியுடனான பயிற்சிப் போட்டியில் மேற்கிந்திய தீவுகள் தரப்பினை வழிநடாத்துகின்றமை குறிப்பிடத்தக்கது.  

இடதுகைதுடுப்பாட்டவீரரான அமீர் ஜாங்கோவும் உள்ளூர் தொடரில் சிறந்த ஆட்டத்தினை வெளிப்படுத்தியிருந்தமைக்காக டெஸ்ட் குழாத்தில் இடம்பெற்றுள்ளார். அமீர் ஜாங்கோ குறித்த உள்ளூர் தொடரில் 411 ஓட்டங்கள் குவித்து டா சில்வாவிற்கு அடுத்தபடியாக இரண்டாவது இடத்தைப் பிடித்திருந்தமை சுட்டிக்காட்டத்தக்கது.  

ஐ.சி.சி. உலக டெஸ்ட் சம்பியன்ஷிப்பின் முக்கிய அங்கமாக அமையும் இலங்கை – மேற்கிந்திய தீவுகள் டெஸ்ட் தொடரின் முதல் போட்டியானது முதலாவது டெஸ்ட் போட்டி ஜூன் 25 முதல் 29 வரையும், இரண்டாவது டெஸ்ட் போட்டி ஜூலை 3 முதல் 7 வரையும் எண்டிகுவாவில் ஒழுங்கு செய்யப்பட்டிருக்கின்றமை குறிப்பிடத்தக்கது. 

மேற்கிந்தியத் தீவுகள் குழாம்: ரொஸ்டன் சேஸ் (தலைவர்), ஜோமல் வொர்ரிகன் (பிரதி தலைவர்), ஜோன் கொம்ப்பெல், தக்நரேன் சந்தர்ப்போல், ஜோசுவா டா சில்வா (விக்கெட்காப்பாளர்), ஜஸ்டின் கிரீவ்ஸ், கவேம் ஹோட்ஜ், ஷேய் ஹோப், அமீர் ஜாங்கோ, அல்சாரி ஜோசப், ஷமார் ஜோசப், பிரண்டன் கிங், அண்டர்சன் பிலிப், கீமர் ரோச், ஜெய்டன் சீல்ஸ்.   

>>மேலும் கிரிக்கெட் செய்திகளைப் படிக்க<<