ශ්‍රී ලංකාව සහ එංගලන්තය අතර මේ වන විට පැවැත්වෙන පළමු ටෙස්ට් ක්‍රිකට් තරගය සඳහා මාධ්‍යවේදීන් හට ක්‍රීඩාංගණය තුළට ඇතුල් වීම තහනම් කර ඇති නමුත් The Island පුවත්පතේ ක්‍රිකට් වාර්තාකරු ලෙස කටයුතු කරනු ලබන රෙක්ස් ක්ලෙමන්ටයින් තීරණය කර ඇත්තේ එය ගාලුකොටුව මත සිට නරඹමින් ආවරණය කිරීමටයි.
සංචාරක එංගලන්ත කණ්ඩායම සහ සත්කාරක ශ්‍රී ලංකා කණ්ඩායම අතර ගාල්ල ජාත්‍යන්තර ක්‍රිකට් ක්‍රීඩාංගණයේ දී පැවැත්වෙන මෙම ටෙස්ට් තරගය COVID-19 වසංගත තත්ත්වය උත්සන්න වීමෙන් අනතුරුව මෙරට තුළ පවත්වනු ලබන පළමු ජාත්‍යන්තර ක්‍රිකට් තරගාවලිය යි. ඒ අනුව මෙය COVID-19 නීතිරීති සහ සීමා කිරීම් යටතේ පැවැත්වීම හේතුකර ගෙන එය නැරඹීම සඳහා ක්‍රීඩාංගණය තුළට පිවිසීමට මාධ්‍යවේදීන් සහ ක්‍රීඩකයින් ද ඇතුළු කිසිවෙකුට අවස්ථාව හිමි වන්නේ නැත.
කෙසේ නමුත් පසුගිය දශක දෙකක කාලය පුරාවට ක්‍රිකට් වාර්තාකරුවෙකු ලෙස කටයුතු කර ඇති මාධ්‍යවේදී රෙක්ස්, 2000 වසරේ සිට මේ දක්වාම ශ්‍රී ලංකාව තුළ පවත්වනු ලැබූ සෑම ටෙස්ට් තරගයක්ම කිසිඳු අතපසු වීමකින් තොරව අඛණ්ඩව ආවරණය කර ඇති අතර ඒ අනුව එම වාර්තාව තවදුරටත් පවත්වා ගෙන යාමේ අරමුණින් ගාලු කොටුව මත සිට තරගය නරඹමින් එය ආවරණය කිරීමට කටයුතු කරමින් සිටියි.
දෙරට අතර පැවැත්වෙන පළමු ටෙස්ට් තරගයේ පළමු දිනය වූ ඊයේ (14) දිනයේ දී ඔහු ගාලු කොටුව මතට ගොස් තරගය හොඳින් දිස්වන ස්ථානයක් තෝරාගනිමින් සිය වාර්තාකරණ කටයුතු සිදුකිරීම ආරම්භ කරනු ලැබීය. එහිදී පසුගිය වසරේ පැවති ශ්‍රී ලංකා කණ්ඩායමේ ඕස්ට්‍රේලියානු සංචාරයේ දී ඔහුට හිමි වූ හිස්වැස්මක් පිළිබඳව ඔහුගේ පෞද්ගලික twitter ගිණුමේ සටහනක් තබමින් ඔහු පවසා සිටියේ,
“ගිය අවුරුද්දේ Canberra වලදී ඕස්ට්‍රේලියානු ක්‍රිකට් ආයතනය අපිට මේක ලබාදුන්නා. කවදාවත් මේක පාවිච්චි වුනේ නැහැ. ඒත් අද නම් මේක ගොඩක් ප්‍රයෝජනවත් වුනා.” යනුවෙනි.
පසුගියදා අවසන් වූ ශ්‍රී ලංකා කණ්ඩායමේ දකුණු අප්‍රිකානු සංචාරය යටතේ පැවති තරග ද COVID-19 වසංගත තත්ත්වය හේතුවෙන් මාධ්‍යවේදීන් සහ ප්‍රේක්‍ෂකයින්ගේ සහභාගීත්වයකින් තොරව පැවැත්වීම හේතුවෙන් රෙක්ස් හට ඊටද සහභාගී වීමට අවස්ථාවක් හිමි වූයේ නැත. එහිදී බොක්සිං දින තරගය අතරතුර ක්‍රීඩාංගණයේ මාධ්‍ය කුටිය තුළ ඔහුට නියමිත අසුනේ ඡායාරූපයක් ද සමඟින් සිය twitter ගිණුමේ සටහනක් තබමින් ඔහු අදහස් දක්වා සිටියේ,
“බොහෝ දුරට මේක, මාධ්‍ය කුටිය තුළ මගේ අසුන වෙන්න ඉඩ තිබුනා. ඒත් අවාසනාවකට වගේ මේ තියෙන තත්වයත් එක්ක අපි වගේ සමහරක් අයට මෙහේට වෙලා ඉන්න සිදුවීමත් එක්ක ඒක එහෙම වුනේ නැහැ. මේ 2003 වසරේ ඉඳන් දකුණු අප්‍රිකාව තුළ මට මඟහැරෙන පළමු තරගාවලිය.” ලෙසයි.
තවත් ක්‍රිකට් පුවත් කියවන්න:
- කාටත් කලින් කොරෝනා එන්නත බංග්ලාදේශ ක්‍රීඩකයින්ට
- එංගලන්තයේ වාර්තාගත සබඳතාවය හමුවේ ශ්‍රී ලංකාව අසීරු අඩියක
- තරගාවලිය වෙනුවෙන් මාස 10ක් ලංකාවේ රැඳී සිටි එංගලන්ත ක්‍රිකට් ලෝලියා
- මුරලිගේ වාර්තාව කඩන්නේ කවුද? මුරලිම තෝරයි
කෙසේ නමුත් පසුගිය වසර 20ක කාලය පුරාවටම ශ්‍රී ලංකාව තුළ පැවැත්වූ සෑම ටෙස්ට් තරගයක්ම නොකඩවා නැරඹීමට ඔහු කටයුතු කර ඇත. මේ පිළිබඳව AFP වෙබ් අඩවිය සමඟ අදහස් දක්වමින් ඔහු පවසා සිටියේ,
“ඔවුන් මාධ්‍යවේදීන්ට ක්‍රීඩාංගණය තුළට යන්න අවස්ථාවක් දුන්නේ නැතත් මට අවශ්‍යයි මගේ වාර්තාව දිගටම ඉදිරියට අරන් යන්න.” යනුවෙනි.
ඊයේ දිනයේ දී ගාලු කොටුව මත සිටිමින් තරගය නැරඹීමට උත්සාහ කළ ප්‍රේක්ෂකයින්ව එතැනින් ඉවත් කිරීමට පොලිස් නිලධාරීන් කටයුතු කරනු ලැබූ අතර එසේ ඉවත් කරනු ලැබූ ප්‍රේක්‍ෂකයින් අතරට එංගලන්ත කණ්ඩායම ශ්‍රී ලංකාවේ ක්‍රීඩා කරනු නැරඹීමට මාස 10ක කාලයක් මෙරට රැඳී සිටි එංගලන්ත ජාතික Rob Lewis ද අයත් වේ.
කෙසේ නමුත් තරගය නැරඹීම සඳහා නිසි ස්ථානයක් සොයා ගැනීමේ දී රෙක්ස් සාර්ථක වී ඇති අතර ඒ අනුව තරගයේ සෑම දිනයක්ම ආවරණය කිරීමට ඔහු දැඩි අධිෂ්ඨානයකින් පසුවේ.
තරගයේ පළමුව පන්දුවට පහර දුන් ශ්‍රී ලංකා කණ්ඩායම සියලු දෙනා දැවී ලකුණු 135ක් පමණක් වාර්තා කරගන්නා විට පළමු දිනය සඳහා තරගය නතර කරන විට පළමු ඉනිම ක්‍රීඩා කරන එංගලන්ත කණ්ඩායම කඩුලු 2ක් දැවී වාර්තා කරගෙන සිටි ලකුණු සංඛාව ලකුණු 127කි.
https://newscenter.lk/ වෙබ් අඩවියේ පළවූ ලිපියක පරිවර්තනයකි.
>> තවත් ක්‍රිකට් පුවත් සඳහා පිවිසෙන්න <<
