ඉන්දීය නායිකාවගෙන් ශ්‍රී ලංකා සංචාරය ගැන ප්‍රකාශයක්

ඉන්දීය කාන්තා ක්‍රිකට් කණ්ඩායමේ ශ්‍රී ලංකා සංචාරය 2022

451

ශ්‍රී ලංකා කාන්තා කණ්ඩායම සමඟ මෙම මාසයේ දී ආරම්භ වීමට නියමිත සීමිත පන්දුවාර තරගාවලිය නවක වේගපන්දු යවන ක්‍රීඩිකාවන් හට සිය දක්ෂතා පෙන්වීමට හොඳ අවස්ථාවක් සහ සුදුසුම කාලය බව ඉන්දීය කණ්ඩායමේ නව නායිකා Harmanpreet Kaur ප්‍රකාශ කර තිබෙනවා.

ශ්‍රී ලංකා තරගාවලියට පිටත්ව යෑමට පෙර ඉන්දීය නායිකාව සහ පුහුණුකරු ඔවුන්ගේ සැලසුම් ඉදිරිපත් කළ අතර ඔවුන්ගේ ප්‍රධාන අරමුණ ලබන මාසයේ දී පැවැත්වීමට නියමිත පොදුරාජ්‍ය මණ්ඩලීය තරගාවලිය සහ ලබන වසරේ පැවැත්වීමට නියමිත විස්සයි විස්ස ලෝක කුසලානයට සිය කණ්ඩායම සූදානම් කිරීමයි.

මෙම තරගාවලියට නම් කළ කණ්ඩායම සඳහා Jhulan Goswami, Shikha Pandey සහ Sneh Rana යන ක්‍රීඩිකාවන් ඇතුළත් නොවීම පිළිබඳව කතාබහට ලක්වූ අතර Rana විවේක ගැන්වූ බව සහ අනෙක් ක්‍රීඩිකාවන් කණ්ඩායමෙන් ඉවත් කළ බවට ඉන්දීය කාන්තා කණ්ඩායමේ පුහුණුකරු Ramesh Powar ඉඟියක් ලබා දී තිබුණා.

මෙම තරගාවලිය පිළිබඳව අදහස් දක්වමින් නව ඉන්දීය නායිකාව ප්‍රකාශ කළේ,

“මම අපේ පන්දු යැවීමේ අංශය පිළිබඳව කතා කළොත් මේ ඔවුන්ට සිය වගකීම භාරගන්න ඕන කාලය වගේම දස්කම් දැක්වීමට මෙම සංචාරය හොඳ අවස්ථාවක්. අපි වගකීම භාරගෙන සම්පූර්ණ පන්දුවාර යවන්න ඕන.

මට අනුව මෙය හොඳ කණ්ඩායමක් ගොඩනැගීමට හම්බවෙන විශාල අවස්ථාවක්. ශ්‍රී ලංකා සංචාරය අපිට ලේසි එකක් නෙවේ. අපි සැලසුම් කරන දේ හරියට කිරීමයි වැදගත්. කණ්ඩායමකින් අපි බලාපොරොත්තු වෙන්නෙත් ඒකයි”

එමෙන්ම තරගාවලිය පිළිබඳව අදහස් දැක්වූ ඉන්දීය පුහුණුකරු Ramesh Powar ප්‍රකාශ කළේ මෙම සංචාරය තරුණ ක්‍රීඩිකාවන්ට දස්කම් වර්ධනය කරගැනීමට දොරටු විවර කරන බවයි.

“ඔබ සංක්‍රාන්ති කාලසීමාවක සිටින විට නවකයන්ට දස්කම් දක්වමින් සිය ස්ථාන තහවුරු කරගැනීමට අවස්ථාවක් ලබා දෙන්න ඕන. ඒ සඳහා කාර්ය මණ්ඩලයක් ලෙස අපි ඔවුන් සමඟ එකඟ වෙන්න ඕන වගේම අනෙකුත් පුහුණුකරුවන් හරහා ඔවුන්ට සහය ලබා දෙන්න ඕන. නවකයන්ට සිය අවස්ථාව අරගෙන ඉදිරියට යන්න හොඳම කාලය මේකයි.“

මාර්තු මාසයේ පැවති කාන්තා ලෝක කුසලානයෙන් පසුව ඉන්දීය කණ්ඩායම ජාත්‍යන්තර තරගාවලියකට සහභාගී වන පළමු අවස්ථාව මෙය වන අතර ඔවුන් එම තරගාවලියේ අර්ධ අවසන් පූර්ව තරගයේ දී දකුණු අප්‍රිකාව හමුවේ පරාජයට පත්වුණා.

එමෙන්ම ඉන්දීය සුපිරි ක්‍රීඩිකා Mithali Raj ක්‍රිකට් පිටියෙන් සමුගැනීමෙන් අනතුරුව ඔවුන් සහභාගී වන පළමු තරගාවලිය මෙය වන අතර දශක දෙකකට පමණ පසුව ඇය කණ්ඩායමේ නොසිටින පළමු අවස්ථාව මෙයයි.

එමෙන්ම ලෝක කුසලානය සහ පොදුරාජ්‍ය මණ්ඩලීය තරගාවලිය ඉදිරියට පැමිණෙන නිසාවෙන් එයට ඇති සැලසුම් පිළිබඳව ද ඉන්දීය නායිකාව අදහස් දැක්වුවා.

“විස්සයි විස්ස තරගවල දී අපේ හොඳම සංචිතය ක්‍රීඩා කරමින් ඔවුන්ට උපරිම තරග ගණනක් ලබා දීමට අපි බලාපොරොත්තු වෙනවා. එක්දින ලෝක කුසලානයට සූදානම් වීමට අපිට කෙටි කාලයක් ඇති නිසා හැම කෙනෙක්ටම අවස්ථාවක් ලබා දෙන්න අපි උත්සහ කරනවා”.

එක්දින තරග තුනකින් සහ විස්සයි විස්ස තරග තුනකින් සමන්විත ශ්‍රී ලංකා තරගාවලිය ජුනි 23 වැනිදා ආරම්භ වීමට නියමිත තර සියලූම තරග දඹුල්ල ජාත්‍යන්තර ක්‍රිකට් ක්‍රීඩාංගණයේ දී පැවැත්වීමට නියමිතයි.

Espncricinfo ඇසුරිනි.

>> තවත් ක්‍රිකට් පුවත් සඳහා පිවිසෙන්න <<