ஆசிய கிண்ண கிரிக்கெட் தொடருக்கான இலங்கை குழாத்தில் மீண்டும் காவ்யா காவிந்தி

ஐக்கிய அரபு இராச்சியத்தில் எதிர்வரும் 28ஆம் திகதி முதல் நடைபெறவுள்ள 10ஆவது மகளிர் ஆசியக் கிண்ணக் கிரிக்கெட் தொடரில், நடப்புச் சம்பியனாகக் களமிறங்கும் இலங்கை குழாம் நேற்று (13) அறிவிக்கப்பட்டுள்ளது. சமரி அத்தபத்து தலைமையிலான இந்த அணியில் 15 வீராங்கனைகள் இடம்பெற்றுள்ளனர்.

இளையோர் மற்றும் அண்மைக்காலத்தில் திறமைகளை வெளிப்படுத்திய புதிய வீராங்கனைகளுக்கு அதிக முன்னுரிமை அளித்து அறிவிக்கப்பட்டுள்ள இந்த அணியின் உப தலைவியாக ஹர்ஷிதா சமரவிக்ரம நியமிக்கப்பட்டுள்ளார்.

ஹர்ஷிதாவுடன் சிரேஷ்ட வீராங்கனைகளாகத் துடுப்பாட்டப் பிரிவில் ஹசினி பெரேரா மற்றும் நிலக்ஷி டி சில்வா ஆகியோர் இணைந்துள்ளதுடன், விஷ்மி குணரத்ன, இமேஷா துலானி ஆகியோருடன் 17 வயதான சஞ்சனா காவிந்தியும் அணியில் சேர்க்கப்பட்டுள்ளார். விக்கெட் காப்பாளர் பொறுப்பு கௌஷினீ நுதியங்கனாவிடம் ஒப்படைக்கப்பட்டுள்ளது.

• ஐ.சி.சி. ஜூலை மாத சிறந்த வீராங்கனைகள் பரிந்துரையில் ஹர்சிதா
• 17 வயது சஞ்சனாவின் அசத்தல் ஆட்டம்: T20I தொடரைக் கைப்பற்றியது இலங்கை

சமரியுடன் கவீஷா தில்ஹாரி மற்றும் தெவ்மி விஹங்கா ஆகியோர் சகலதுறை வீராங்கனைகளாக அணியில் இடம்பெற்றுள்ளதுடன், சுழல்பந்து வீச்சைப் பலப்படுத்தும் வகையில் சுகந்திகா குமாரி மற்றும் சமுதி ப்ரபோதா ஆகியோரும் அழைக்கப்பட்டுள்ளனர். மிதாலி அயோத்யா, காவ்யா காவிந்தி மற்றும் சேத்தனா விமுக்தி ஆகியோர் வேகப்பந்து வீச்சாளர்களாக அணியில் இணைந்துள்ளனர்.

இந்த ஆண்டு T20 வடிவில் நடைபெறவுள்ள மகளிர் ஆசியக் கிண்ண கிரிக்கெட் தொடரில் இந்தியா, பாகிஸ்தான், தாய்லாந்து மற்றும் ஹொங்கொங் ஆகிய அணிகள் ‘A’ குழுவிலும்; இலங்கை, பங்களாதேஷ், இந்தோனேசியா மற்றும் போட்டியை நடத்தும் ஐக்கிய அரபு இராச்சியம் ஆகிய அணிகள் ‘B’ குழுவிலும் போட்டியிடவுள்ளன. லீக் சுற்றின் போட்டிகள் செப்டம்பர் 8ஆம் திகதி வரை நடைபெறவுள்ளதுடன், இறுதிப் போட்டி செப்டம்பர் 13ஆம் திகதி துபாய் சர்வதேச கிரிக்கெட் விளையாட்டரங்கில் நடைபெறவுள்ளது.

2024 ஆம் ஆண்டு இலங்கையில் நடைபெற்ற ஆசியக் கிண்ண இறுதிப் போட்டியில் இந்தியாவை வீழ்த்தி இலங்கை அணி சம்பியன் பட்டம் வென்றது குறிப்பிடத்தக்கது.

இலங்கை மகளிர் T20 குழாம்:

 

சமரி அத்தபத்து (தலைவி), இமேஷா துலானி, சஞ்சனா காவிந்தி, விஷ்மி குணரட்ன, ஹர்ஷிதா சமரவிக்ரம (உப தலைவி), கவிஷா தில்ஹாரி, நிலக்ஷிகா சில்வா, ஹசினி பெரேரா, கௌஷினி நுதியங்கனா, தெவ்மி விஹங்கா, சுகந்திகா குமாரி, சமுதி ப்ரபோதா, சேத்தனா விமுக்தி, காவ்யா காவிந்தி, மிதாலி அயோத்யா.

>>மேலும் கிரிக்கெட் செய்திகளைப் படிக்க<<