பாகிஸ்தான் மகளிர் அணிக்கு எதிராக இன்று (02) நடைபெற்ற 2ஆவது T20I போட்டியில் 6 விக்கெட்டுகள் வித்தியாசத்தில் அபார வெற்றி பெற்ற இலங்கை மகளிர் அணி, இன்னும் ஒரு போட்டி எஞ்சியுள்ள நிலையிலேயே T20I தொடரைக் கைப்பற்றி வரலாற்றுச் சாதனை படைத்துள்ளது.
பாகிஸ்தானுக்கு எதிராக இலங்கை அணி பெற்றுள்ள இத்தொடர் வெற்றியானது, சுமார் 11 ஆண்டுகளுக்குப் பிறகு பாகிஸ்தான் பெண்கள் அணிக்கு எதிராக இலங்கை அணி இருதரப்பு T20I தொடர் ஒன்றைக் கைப்பற்றும் முதன்முறையாகும்.
இறுதியாக இலங்கை மகளிர் அணி 2015இல் பாகிஸ்தான் அணிக்கு எதிரான இருதரப்பு T20I தொடரை வெற்றி கொண்டமை குறிப்பிடத்தக்கது.
தம்புள்ளையில் நடைபெற்ற இப்போட்டியில் நாணய சுழற்சியில் வென்று முதலில் துடுப்பெடுத்தாடிய பாகிஸ்தான் மகளிர் அணி, நிர்ணயிக்கப்பட்ட 20 ஓவர்களில் 5 விக்கெட்டுகளை இழந்து 175 ஓட்டங்களைக் குவித்தது.
பாகிஸ்தான் அணி சார்பில் ஷாவால் சுல்பிகார் 35 பந்துகளில் 48 ஓட்டங்களையும், முனீபா அலி 30 பந்துகளில் 45 ஓட்டங்களையும் பெற்றனர். இலங்கை பந்துவீச்சில் சமுதி பிரபோதா 27 ஓட்டங்களுக்கு 2 விக்கெட்டுகளையும், கவீஷா தில்ஹாரி 29 ஓட்டங்களுக்கு ஒரு விக்கெட்டையும் வீழ்த்தினர்.
- பாகிஸ்தானுக்கு எதிரான T20I தொடருக்கான இலங்கை மகளிர் குழாம் அறிவிப்பு
- இமேஷா துலானியின் கன்னி T20I சதத்தால் பாகிஸ்தானை வீழ்த்தியது இலங்கை
176 ஓட்டங்கள் என்ற கடினமான இலக்கை நோக்கிப் பதிலளித்தாடிய இலங்கை மகளிர் அணி, இன்னும் 14 பந்துகள் எஞ்சியிருந்த நிலையிலேயே (17.4 ஓவர்களில்) 4 விக்கெட்டுகளை மட்டுமே இழந்து 178 ஓட்டங்கள் எடுத்து அபார வெற்றி பெற்றது.
இப்போட்டியில் சர்வதேச அரங்கில் அறிமுகமான 17 வயதான இளம் வீரங்கை சஞ்சனா காவிந்தி, தனது அறிமுகப் போட்டியிலேயே அதிரடி காட்டி 24 பந்துகளில் 6 பவுண்டரிகள் மற்றும் 2 சிக்ஸர்கள் அடங்கலாக 46 ஓட்டங்களைக் குவித்து ஆட்டநாயகி விருதை வென்றார். அவருக்கு ஈடுகொடுத்து அதிரடியாக ஆடிய அணித்தலைவி சமரி அத்தபத்து 15 பந்துகளில் 40 ஓட்டங்களை விளாசினார். இதன்போது, T20 சர்வதேசப் போட்டிகளில் 4 ஆயிரம் ஓட்டங்கள் மைல்கல்லையும் எட்டி அவர் சாதனை படைத்தார்.
பாகிஸ்தான் பந்துவீச்சில் உம்மே ஹானி 28 ஓட்டங்களுக்கு 2 விக்கெட்டுகளைக் கைப்பற்றினார்.
இந்த வெற்றியின் மூலம் 3 போட்டிகளைக் கொண்ட T20I தொடரில் 2-0 என இலங்கை மகளிர் அணி முன்னிலை பெற்றுள்ளது.
மறுபுறத்தில் இவ்வாண்டில் இலங்கை மகளிர் அணி பங்கேற்ற அனைத்து இருதரப்புத் தொடர்களிலும் (3 T20I தொடர்கள் மற்றும் 3 ஒருநாள் தொடர்கள்) வெற்றி பெற்று 6-க்கு 6 என்ற தொடர் வெற்றி சாதனையைத் தக்கவைத்துக் கொண்டுள்ளது.
இவ்விரு அணிகளுக்கும் இடையிலான 3ஆவது மற்றும் கடைசி T20I போட்டி 04ஆம் திகதி இதே மைதானத்தில் நடைபெறவுள்ளது.
>>மேலும் கிரிக்கெட் செய்திகளைப் படிக்க<<
 நடைபெற்ற 2ஆவது T20I போட்டியில் 6 விக்கெட்டுகள் வித்தியாசத்தில் அபார வெற்றி பெற்ற இலங்கை மகளிர் அணி, இன்னும் ஒரு போட்டி எஞ்சியுள்ள நிலையிலேயே T20I தொடரைக் கைப்பற்றி வரலாற்றுச் சாதனை படைத்துள்ளது.){kind=link}