அயர்லாந்து அணிக்கு எதிராக இலங்கைக்கு மகளிருக்கு வெற்றி ஆரம்பம்

ஐசிசி மகளிர் வளர்ந்து வரும் கிரிக்கெட் அணிகளுக்கான கிண்ணத் தொடரில் அயர்லாந்துக்கு எதிராக நேற்று (11) நடைபெற்ற தனது முதல் போட்டியில் 10 விக்கெட்டுகளால் இலங்கை அணி இலகு வெற்றியீட்டியது. 

ஐக்கிய அரபு இராச்சியத்தின் அஜ்மானில் நேற்று ஆரம்பமான இப்போட்டித் தொடரில் A குழுவில் இடம்பெற்று ஹர்ஷிதா சமரவிக்ரம தலைமையிலான இலங்கை அணி, அயர்லாந்தை எதிர்கொண்டது. 

இப்போட்டியில் முதலில் துடுப்பெடுத்தாட பணிக்கப்பட்ட அயர்லாந்து மகளிர் அணி 20 ஓவர்களில் 9 விக்கெட்டுகளை இழந்து 105 ஓட்டங்களை மாத்திரமே பெற்றது. லுவிஸ் லிட்டில் அதிகபட்சமாக 36 பந்துகளில் 28 ஓட்டங்களைப் பெற்றார். 

இலங்கை சார்பாக பந்துவீச்சில் சத்யா சந்தீபனி மற்றும் கவிஷா தில்ஹாரி இருவரும் தலா 3 விக்கெட்டுக்களை கைப்பற்றியதுடன் சேதனா விமுக்தி 2 விக்கெட்டுக்களையும் வீழ்த்தினார். இதில் சந்தீபனி தனது 4 ஓவர்களில் 9 ஓட்டங்களை மாத்திரமே விட்டுக் கொடுத்திருந்தார். 

>> வளர்ந்து வரும் அணிகளுக்கான தொடரிலிருந்து சமுதி பிரபோதா திடீர் விலகல்

இந்நிலையில் பதிலெடுத்தாட வந்த இலங்கை மகளிர் அணி 13 ஓவர்களில் விக்கெட் இழப்பின்றி 110 ஓட்டங்களை பெற்று இலகு வெற்றியீட்டியது. விஷ்மி குணரத்ன 37 பந்துகளில் ஆட்டமிழக்காது 53 ஓட்டங்களையும், ஹசினி பெரேரா 41 பந்துகளில் ஆட்டமிழக்காது 53 ஓட்டங்களையும் பெற்றனர். 

போட்டியின் ஆட்ட நாயகியாக சத்யா சந்தீபனி தெரிவானார். 

இலங்கை மகளிர் அணி, தனது இரண்டாவது போட்டியில் இன்று (13) ஸ்கொட்லாந்து அணியை எதிர்கொள்ளவுள்ளது. 

போட்டியின் சுருக்கம் 

அயர்லாந்து – 105/9 (20 ஓவர்கள்) – லூயிஸ் லிட்டில் 28, சத்யா சந்தீபனி 3/9, கவிஷா தில்ஹாரி 3/20, சேதனா விமுக்தி 2/26 

 

இலங்கை – 110/0 (13 ஓவர்கள்) – விஷ்மி குணரத்ன 53*, ஹாசினி பெரேரா 53* 

 

முடிவு – இலங்கை அணி 10 விக்கெட்டுக்களால் வெற்றி பெற்றது 

>>மேலும் கிரிக்கெட் செய்திகளைப் படிக்க<<