නවසීලන්තය, ඕස්ට්‍රේලියාව හා ආජන්ටිනාව සමඟින් පැවැත්වෙන Rugby Championship තරගාවලිය සඳහා දකුණු අප්‍රිකාව සහභාගී නොවන බව නිල වශයෙන් තමන්ට දැනුම් දුන් බව SANZAAR විසින් අද නිවේදනය කර ඇත.
දකුණු අප්‍රිකානු රජය විසින් පනවා ඇති සංචාරක සීමාවන්, ක්‍රීඩකයන්ගේ සෞඛ්‍යාරක්ෂිතභාවය සහ ආරක්ෂාව පිළිබඳ කරුණු මෙන්ම දකුණු අප්‍රිකාවේ මෙන්ම එක්සත් රාජධානියේ සහ යුරෝපයේ විවිධ ක්‍රීඩා සමාජ හරහා දකුණු අප්‍රිකානු ක්‍රීඩකයින්ට COVID-19 වසංගතයේ අඛණ්ඩ බලපෑමක් තිබීම ඇතුළු සාධක කිහිපයක් හේතුවෙන් දකුණු අප්‍රිකාව මෙලෙස එම තරගාවලිය සඳහා සහභාගී නොවීමට තීරණය කර තිබේ.
දකුණු අප්‍රිකාවේ මෙම තීරණය පිළිබඳව නවසීලන්ත රග්බි ප්‍රධාන විධායක මාක් රොබින්සන් මහතා අදහස් දක්වා තිබුණි.
“ඇත්තෙන්ම මෙම නිවේදනය ගැන අපි කනගාටුවට පත්වෙනවා. තරගාවලියට සංශෝධිත කාලසටහනක් සකස් කරන්න SANZAAR ඕස්ට්‍රේලියානු රග්බි සම්මේලන සමඟ සමීපව කටයුතු කරන්න අපි බලාපොරොත්තු වෙනවා. ඉදිරි සති කිහිපය තුළ අපි බලාපොරොත්තු වෙනවා තරගකාරී ජාත්‍යන්තර ටෙස්ට් රග්බි තරගාවලියකට සහභාගී වෙන්න. ”
දකුණු අප්‍රිකාව තරගාවලියෙන් ඉවත් වීමත් සමඟින් මෙම තරගාවලිය ආජන්ටිනාව, ඕස්ට්‍රේලියාව සහ නවසීලන්තය සම්බන්ධ කර ගනිමින් Tri Nations තරගාවලියේ තරඟ ආකෘතියක් ලෙස පැවැත්වෙනු ඇතැයි SANZAAR හි ආරංචි මාර්ග පවසා ඇත.
පවතින කොරෝනා වසංගතය හේතුවෙන් මෙලෙස ජාත්‍යන්තර තරගාවලියක් සංවිධානය කෙතරම් දුෂ්කර දැයි SANZAAR සහ එහි පාර්ශවකරුවන් වටහාගෙන ඇත. කෙසේ වෙතත් මෙම නව කාලසටහනට අනුව තරගාවලිය අඛණ්ඩව සති අන්ත හයක් පුරා ඕස්ට්‍රේලියාවේ දී පැවැත්වීමට සැලසුම් කර තිබේ. තරග 6කින් යුත් Tri Nations තරගාවලිය සිඩ්නි, බ්‍රිස්බේන් සහ නිව්කාසල් යන නගරවල දී පැවැත්වීමට නියමිතව ඇත. එහි දී එක් කණ්ඩායමක් දෙවරක් සෙසු කණ්ඩායම් සමඟින් ක්‍රීඩා කරනු ඇත.
තවත් රග්බි පුවත්:
- CH වෙනසකට මුල පුරයි; කාන්තා නියෝජනයකට ඉඩප්‍රස්තාව
- පුහුණුකරුවන්ගේ කමිටුවේ මුල්පුටුව ‘වයිපර්’ ගුණරත්නට
- කොරෝනා නිසාවෙන් නැවතුන දේශීය ක්‍රීඩා පිටිය
- පාසල් රග්බි ඇතුළු සියල්ල අවලංගු කරයි
- CH හමුදාව ශක්තිමත් කිරීමට ප්‍රබල CR සෙන්පතියෝ දසදෙනෙක්!
නව තරග ආකෘතිය පිළිබඳව SANZAAR හි ප්‍රධාන විධායක ඇන්ඩි මැරිනෝස් ද අදහස් දක්වා තිබුණි.
“පවතින වයිරසයත් එක්ක දකුණු අප්‍රිකාව ඔවුන්ගේ රජයේ සහ සෙසු රෙගුලාසි නිසා මේ තරගාවලියට සහභාගී වෙන්න නොහැකි බව අපිට දන්වලා තිබෙනවා. අපි මීට කලින් සැලසුම් කරලා තිබුණේ වට හයකින් සමන්විත Rugby Championship තරගාවලියක්. දකුණු අප්‍රිකාවේ ඉවත් වීමත් එක්ක අපි තීරණය කළා අපේ 25 වැනි තරගාවලිය පූර්ණ Tri Nations තරගාවලියක් විදිහට ක්‍රීඩා කරන්න.”
මෙම තරගාවලිය සඳහා සත්කාරකත්වය සපයන ඕස්ට්‍රේලියානු රග්බි සම්මේලනය තරගාවලිය සැලසුම් කිරීමේ දී දැක්වූ සහයෝගය පිළිබඳව ද ඇන්ඩි මැරිනෝස් සිය කෘතඥතාව පලකර තිබුණි. නිව් සවුත් වේල්ස් ප්‍රාන්ත ආණ්ඩුව සහ සෙසු ආයතන ද තමන්ට ලබා දුන් සහයෝගය පිළිබඳව ද ඔහු සඳහන් කර තිබුණි.
පෙර සැලසුම් කර තිබූ Rugby Championship තරගාවලිය සඳහා මාධ්‍ය ආවරණය සැපයීමට ඉදිරිපත් වී සිටි ආයතන මෙම Tri Nations තරගාවලිය සඳහා ද සිය ආවරණය සැපයීමට ඉදිරිපත් වී ඇත.
Tri Nations තරගාවලියේ තරග කාලසටහන:
- ඔක්තෝබර් 31: ඕස්ට්‍රේලියාව සහ නවසීලන්තය අතර තරගය (ANZ ක්‍රීඩාංගණය, සිඩ්නි)
- නොවැම්බර් 7: ඕස්ට්‍රේලියාව සහ නවසීලන්තය අතර තරගය (සන්කෝර්ප් ක්‍රීඩාංගණය, බ්‍රිස්බේන්)
- නොවැම්බර් 14: නවසීලන්තය සහ ආර්ජන්ටිනාව අතර තරගය (බෑන්ක්වෙස්ට් ක්‍රීඩාංගණය, සිඩ්නි)
- නොවැම්බර් 21: ආජන්ටිනාව සහ ඕස්ට්‍රේලියාව අතර තරගය (මැක්ඩොනල්ඩ් ජෝන්ස් ක්‍රීඩාංගණය, නිව්කාසල්)
- නොවැම්බර් 28: ආජන්ටිනාව සහ නවසීලන්තය අතර තරගය (මැක්ඩොනල්ඩ් ජෝන්ස් ක්‍රීඩාංගණය, නිව්කාසල්)
- දෙසැම්බර් 5: ඕස්ට්‍රේලියාව සහ ආජන්ටිනාව අතර තරගය (බෑන්ක්වෙස්ට් ක්‍රීඩාංගණය, සිඩ්නි)
>> තවත් රග්බි පුවත් සඳහා පිවිසෙන්න – රග්බි පිටුවට <<
