වත්මන් ක්‍රීඩා අමාත්‍ය ගරු නාමල් රාජපක්ෂ මහතා මෙරට ක්‍රිකට් ආයතනයේ කැපී පෙනෙන වෙනස්කම් කිහිපයක් සිදු කිරීමට තීරණය කර තිබේ.
ජාතික ක්‍රීඩා කවුන්සිලය, ශ්‍රී ලංකා ක්‍රිකට් ආයතනයේ නිලධාරීන් සහ ශ්‍රී ලංකා ක්‍රිකට් ප්‍රධාන පුහුණුකරු Mickey Arthur සමඟින් අද (27) පැවති රැස්වීමක දී මෙම තීරණ ගත් බව වාර්තා වේ.
Concluded meeting with officials of @OfficialSLC, @MoYS_SriLanka, NSC & National Coach.
▪️New selection committee
▪️Competitive domestic & provincial tournaments.
▪️Priority for Discipline&fitness
▪️Performance based contracts
▪️Director&Mentor to assist coach @Mickeyarthurcr1— Namal Rajapaksa (@RajapaksaNamal) January 27, 2021
ශ්‍රී ලංකා ක්‍රිකට් කණ්ඩායම පසුගිය සති කිහිපය තුළ දකුණු අප්‍රිකාවේ දී සහ මෙරට දී ටෙස්ට් තරගාවලි දෙකක් සඳහා එක්වූ අතර එම සියලු ටෙස්ට් තරග පරාජය විය. පසුගිය දා ගාල්ලේ දී අවසන් වූ එංගලන්ත ටෙස්ට් තරගාවලිය 2-0ක් ලෙස පරාජය වීම එහි ආසන්නතම සිදුවීම විය.
ශ්‍රී ලංකා කණ්ඩායම මෙලෙස දිගින් දිගටම අසාර්ථක වීම හමුවේ මෙරට ක්‍රීඩාලෝලීන්, ක්‍රිකට් ආයතනයට සම්බන්ධ පාර්ශවකරුවන් සහ හිටපු ජ්‍යේෂ්ඨ ක්‍රීඩකයන් මෙරට ක්‍රිකට් ක්‍රීඩාව සම්බන්ධයෙන් ගත යුතු ව්‍යුහමය වෙනස්කම් පිළිබඳව අවස්ථා කිහිපයක දී අදහස් දක්වා තිබුණි. ඒ මෙරට ක්‍රිකට් ක්‍රීඩාව නැවත නැංවීමේ අරමුණිනි.
ඒ අනුව අද දින පැවති රැස්වීමේ දී නව තේරීම් කමිටුවක් පත්කිරීමට ද තීරණය වී තිබේ. ඒ බව අමාත්‍යවරයාගේ නිල twitter ගිණුමේ සටහන් වූ පණිවුඩයක දක්වා තිබුණි. ඒ වත්මන් තේරීම් කමිටු ප්‍රධානියා වූ අසන්ත ද මෙල් මහතා සිය ධුරයෙන් ඉල්ලා අස්වීමෙන් අනතුරුවය.
තවත් ක්‍රිකට් පුවත් කියවන්න:
- ඕස්ට්‍රේලියානු ක්‍රිකට් පාලක මණ්ඩලය ඉන්දියාවෙන් සමාව ඉල්ලයි
- ක්‍රිකට් තේරීම් කමිටු සභාපති තනතුර හිස්වෙයි
- තරග පාවාදීමක් නිසා UAE ප්‍රබලයන් දෙදෙනෙකුට වැඩ වරදී
එළඹෙන පෙබරවාරි මාසයේ දී ශ්‍රී ලංකා ක්‍රිකට් ආයතනය සහ ක්‍රීඩකයන් අතර අත්සන් කිරීමට නියමිත වාර්ෂික කොන්ත්‍රාත් සම්බන්ධයෙන් ද විශේෂ තීරණ කිහිපයක් අද රැස්වීමේ දී ගෙන තිබේ. ඒ අනුව ක්‍රීඩක කොන්ත්‍රාත් සඳහා නව ක්‍රමවේදයක් අනුගමනය කිරීමට නියමිතය.
මෙතෙක් පැවති කොන්ත්‍රාත් ක්‍රමය වෙනුවට ක්‍රීඩකයන්ගේ දක්ෂතා මත පදනම් වූ කොන්ත්‍රාත් ක්‍රමයක් (Performance Based Contract System) හඳුන්වා දීමට තීරණය කර තිබේ.
එමෙන්ම ශ්‍රී ලංකා කණ්ඩායම සඳහා නව අධ්‍යක්ෂ/උපදේශක තනතුරක් ද හඳුන්වා දී තිබේ. එම ධුරය මඟින් ප්‍රධාන පුහුණුකරු Mickey Arthur හට උපදෙස් සහ සහය ලබා දීමට නියමිතය. ඒ පිළිබඳව ද මෙම රැස්වීමේ දී සාකච්ඡා කර තිබේ.
එමෙන්ම ක්‍රීඩකයන් සිය ශාරීරික යෝග්‍යතාවට සහ විනය කෙරෙහි දැඩි අවධානයක් යොමු කළ යුතු බව ද ක්‍රීඩා අමාත්‍යවරයා අවධාරණය කර තිබේ.
ThePapare.com වෙත වාර්තා වූ ආකාරයට එළඹෙන ශ්‍රී ලංකා – බටහිර ඉන්දීය කොදෙව් තරගාවලිය සඳහා නම් කළ සංචිතය, එළඹෙන පෙබරවාරි මස 03 වැනිදා ශාරීරික යෝග්‍යතා පරීක්ෂණයක් සඳහා පෙනී සිටීමට නියමිතව තිබේ. එම පරීක්ෂණයෙන් අසමත් වන කිසිඳු ක්‍රීඩකයෙකු තරගාවලිය සඳහා සහභාගී කර නොගැනීමට ප්‍රධාන පුහුණුකරු Mickey Arthur සහ නව ශාරීරික යෝග්‍යතා කළමනාකරු Grant Luden දැඩි තීරණයක් ගෙන තිබේ.
2020/21 වසර සඳහා වන පළමු පෙළ තරගාවලිය කෙරෙහි ද මෙම රැස්වීමේ දී අවධානය යොමුවී තිබුණි.
කොරෝනා වයිරසයේ දෙවන රැල්ල හේතුවෙන් මෙරට පළමු පෙළ සහ සෙසු තරග සියල්ල තාවකාලිකව අත්හිටුවා ඇති අතර ඒවා හැකි ඉක්මණින් ආරම්භ කිරීමට ගත යුතු පියවර සම්බන්ධයෙන් විශේෂ අවධානයක් යොමු කර තිබේ.
>> තවත් ක්‍රිකට් පුවත් සඳහා පිවිසෙන්න <<
