டெல்லி கெபிடல்ஸ் அணியில் இங்கிலாந்தின் இளம் சகலதுறை கிரிக்கெட் வீரர்

டெல்லி கெபிடல்ஸ் (DC) அணி இந்தப் பருவத்திற்கான IPL T20 தொடரின் எஞ்சிய போட்டிகளில் விளையாடுவதற்காக இங்கிலாந்து கிரிக்கெட் அணியின் இளம் சகலதுறை வீரர் ரெஹான் அஹ்மட்டை ஒப்பந்தம் செய்துள்ளது.

>>IPL போட்டிகளில் ஆடும் வாய்ப்பினைப் பெற்றுக் கொண்ட ஸ்டார்க்<<

டெல்லி கெபிடல்ஸ் அணிக்காக முன்னர் ஒப்பந்தம் செய்யப்பட்டிருந்த மற்றுமொரு இங்கிலாந்து துடுப்பாட்ட வீரரான பென் டக்கட்டின் பிரதியீட்டு வீரராகவே ரெஹான் அஹ்மட்டிற்கு வாய்ப்பு வழங்கப்பட்டிருக்கின்றது. இதுவரை IPL போட்டிகளில் அறிமுகம் பெறாத ரெஹான் அஹ்மட் 75 லட்சம் இந்திய ரூபாய்களுக்கு (இலங்கை நாணயப்படி சுமார் 2.5 கோடி ரூபாய்களுக்கு) அணியில் சேர்க்கப்பட்டுள்ளார்.

பென் டக்கட் இங்கிலாந்து கிரிக்கெட் அணியில் அதிக கவனம் செலுத்துவதற்காக இந்த ஆண்டுக்கான IPL தொடரிலிருந்து விலகியிருந்தார். டெல்லி கெபிடல்ஸ் நிர்வாகம் உடனடியாக அவருக்குப் பதில் யாரையும் அறிவிக்காத நிலையில், இலங்கை கிரிக்கெட் அணியின் வீரர் பெதும் நிஸ்ஸங்க, KL ராகுலுடன் இணைந்து ஆரம்பத் துடுப்பாட்ட வீரராக விளையாடி வருகின்றார். இந்த நிலையில் தற்போது தொடரில் வெற்றிகளை எதிர்பார்த்து காணப்படும் டெல்லி கெபிடல்ஸ் அணிக்கு ரெஹான் அஹ்மட்டின் இணைப்பு கூடுதல் பலமாக அமையும் என கருதப்படுகின்றது.

>>பாக். வீரர் மொஹமட் நவாஸ் மீது போதைப்பொருள் குற்றச்சாட்டு<<

21 வயது நிரம்பிய ரெஹான் அஹமட் ஆரம்பத்தில் மணிக்கட்டு சுழற்பந்துவீச்சாளராக அறிமுகமாகிய போதும் அவரது துடுப்பாட்ட ஆற்றல் அண்மைய நாட்களில் பல மடங்கு உயர்ந்துள்ளது. கடந்த 2025ஆம் ஆண்டுக்கான கவுண்டி சம்பியன்ஷிப் தொடரில் லெய்கெஸ்டர்ஷையர் (Leicestershire) அணிக்காக ஆடிய ரெஹான் தனது அணி டிவிஷன் 1 இற்கு முன்னேற பங்காற்றியதோடு, தொடரில் 5 சதங்கள் அடங்கலாக 50.66 சராசரியுடன் 760 ஓட்டங்களை குவித்திருந்தமையும் சுட்டிக்காட்டத்க்கது. அதேநேரம் அவர் தொடரில் மொத்தமாக 23 விக்கெட்டுக்களையும் வீழ்த்தியிருந்தமை குறிப்பிடத்தக்க விடயமாகும்.

>>மேலும் கிரிக்கெட் செய்திகளைப் படிக்க<<