முத்தரப்பு ஒருநாள் தொடரின் சம்பியனாகிய பாகிஸ்தான்

இலங்கை, பாகிஸ்தான் மற்றும் இங்கிலாந்து அணிகள் பங்கெடுத்த முத்தரப்பு ஒருநாள் தொடரின் இறுதிப் போட்டியில், இலங்கையை பாகிஸ்தான் 5 விக்கெட்டுக்களால் வீழ்த்தியிருக்கின்றது.

>>இளையோர் ஆசியக் கிண்ணத் தொடருக்கான இலங்கை குழாம் வெளியீடு

லாஹூரில் நடைபெற்று முடிந்திருக்கும் இந்த போட்டிக்கு பாகிஸ்தான் – இலங்கை ஆகிய அணிகள் லீக் போட்டிகளின் புள்ளிகள் அடிப்படையில் தெரிவாகியிருந்தன. போட்டியின் நாணய சுழற்சியில் வென்ற பாகிஸ்தான் அணியின் தலைவர் சஹீன் அப்ரிடி முதலில் இலங்கையை துடுப்பாடப் பணித்தார்.

அதன்படி நாணயச் சுழற்சியில் வென்று முதலில் துடுப்பெடுத்தாடத் தொடங்கிய இலங்கை அணிக்கு சிறந்த ஆரம்பம் கிடைத்தது. ஆரம்பவீரர் அவிஷ்க பெர்னாண்டோ 38 ஓட்டங்கள் பெற்று நல்ல ஆரம்பம் வழங்கினார்.

அதனைத் தொடர்ந்து கமிந்து மெண்டிஸ், பாகிஸ்தானின் வேகப்பந்துவீச்சை நிதானமாகவும் நேர்த்தியாகவும் கையாண்டு அபார சதம் விளாசினார். தன்னுடைய கன்னி ஒருநாள் சதத்தினைப் பதிவு செய்த அவர் 128 பந்துகளில் 12 பௌண்டரிகள் மற்றும் 2 சிக்ஸர்களுடன் 131 ஓட்டங்களைக் குவித்தார்.  அவருடன் ஜோடி சேர்ந்த பவன் ரத்நாயக்க அதிரடியாக ஆடி 65 பந்துகளில் 77 ஓட்டங்கள் குவித்தார். இந்த ஜோடி 3ஆவது விக்கெட் இணைப்பாட்டமாக 146 ஓட்டங்களையும் பகிர்ந்தது. இது இலங்கை அணியை வலுவான நிலைக்கும் இட்டுச் சென்றது.

இறுதி ஓவர்களில் தடுமாறிய இலங்கை அணியானது தடுமாறிய போதும் நிர்ணயிக்கப்பட்ட 50 ஓவர்களில் 8 விக்கெட்டுகள் இழப்புக்கு 325 ஓட்டங்கள் குவித்தது.

பாகிஸ்தான் தரப்பில் ஷஹின் அப்ரிடி, நசீம் ஷாஹ், ஹரிஸ் ரவூப் மற்றும் சல்மான் அகா ஆகியோர் தலா 2 விக்கெட்டுகள் வீதம் வீழ்த்தினர்.

பின்னர் 326 ஓட்டங்கள் எடுத்தால் வெற்றி என்ற கடினமான இலக்குடன் களமிறங்கிய பாகிஸ்தான் அணிக்கு ஆரம்பத்தில் அழுத்தம் ஏற்பட்ட போதும், பகார் சமான் சதம் விளாசினார். அவருக்கு சாட் பயிக் உறுதுணையாக இருந்தார்.

அத்துடன் அரபாத் மின்ஹாஸ் இறுதிநேர அதிரடி காட்ட பாகிஸ்தான் 48.3 ஓவர்களில் 7 விக்கெட்டுக்களை 331 ஓட்டங்களுடன் போட்டியின் வெற்றி இலக்கை அடைந்து கொண்டது.

பாகிஸ்தான் அணிக்கு வெற்றியைப் பெற்றுக் கொடுத்த பகார் சமான் 127 ஓட்டங்களையும், சாட் பயிக் 74 ஓட்டங்களையும் எடுத்தனர். இது ஒரு பக்கமிருக்க அரபாத் மின்ஹாஸ் 31 பந்துகளில் 4 சிக்ஸர்கள் மற்றும் 3 பௌண்டரிகள் அடங்கலாக 61 ஓட்டங்களையும் பெற்றனர்.

இலங்கை அணியின் பந்துவீச்சில் டில்ஷான் மதுசங்க 3 விக்கெட்டுக்களையும், அசித பெர்னாண்டோ 2 விக்கெட்டுக்களையும் கைப்பற்றிய போதும் அது வீணாகியது.

போட்டியின் ஆட்டநாயகனாக பகார் சமானும், தொடர் நாயகனாக அரபாத் மின்ஹாஸூம் தெரிவாகினர்.